ງານວາງສະແດງສິນຄ້າຈີນ-ອາຊຽນເນັ້ນໜັກການບໍລິການດ້ານການປ້ອງກັນຄວາມປອດໄພ
ຫ້ອງການໂຄສົກພະແນກປ້ອງກັນຄວາມສະຫງົບນະຄອນນານນິງເຂດປົກຄອງຕົນເອງເຜົ່າຈວ້າງກວາງຊີຈີນແຈ້ງໃຫ້ຊາບໃນຕອນບ່າຍວັນທີ 28 ສິງຫານີ້ວ່າ, ຄຽງຄູ່ກັບມື້ໄຂງານວາງສະແດງສິນຄ້າຈີນ-ອາຊຽນຄັ້ງທີ 10 ຫຍັບມໍ່ເຂົ້າມາ, ວຽກງານການບໍລິການດ້ານການປ້ອງກັນຄວາມປອດໄພທຸກດ້ານຂອງພະແນກປ້ອງກັນຄວາມສະຫງົບນະຄອນນານນິງໄດ້ເຂົ້າສູ່ສະພາບປະຕິບັດຕົວຈິງແລ້ວ. ການໃກ້ຊິດຕິດແທດກັບຊີວິດການເປັນຢູ່ຂອງປະຊາຊົນ,ບໍ່ລົບກວນປະຊາຊົນ, ແລະເນັ້ນໜັກການບໍລິການດ້ານການປ້ອງກັນຄວາມປອດໄພໄດ້ກາຍເປັນຈຸດເດັ່ນຂອງວຽກງານປ້ອງກັນຄວາມປອດໄພຂອງງານວາງສະແດງສິນຄ້າໃນຄັ້ງນີ້.
ຕາມເຈົ້າໜ້າທີ່ຕຳຫຼວດນະຄອນນານນິງໃຫ້ຮູ້ວ່າ, ວຽກງານການປ້ອງກັນຄວາມປອດໄພໃນປີນີ້ຈະຮັບປະກັນໃຫ້ເຮັດຫຼ້ອນໜ້າທີ່ປ້ອງກັນຄວາມປອດໄພທຸກດ້ານຢ່າງສຳເລັດຜົນ, ພ້ອມດຽວກັນນັ້ນ, ຈະພະຍາຍາມຈົນສຸດຄວາມສາມາດບໍ່ໃຫ້ວຽກງານປ້ອງກັນຄວາມປອດໄພສົ່ງຜົນກະທົບຕໍ່ຊີວິດປະຈຳວັນຂອງຊາວເມືອງນານນິງ,ເພື່ອໃຫ້ຊາວເມືອງນານນິງໄດ້ຮັບຄວາມເບີກບານມ່ວນຊື່ນຮ່ວມກັນຈາກງານວາງສະແດງໃນຄັ້ງນີ້, ຮັບປະກັນໃຫ້ປະຕິບັດໜ້າທີ່ວຽກງານປ້ອງກັນຄວາມປອດໄພໄດ້ຮັບຜົນສຳເລັດຢ່າງຈົບງາມ, ທັງຮັກສາໃຫ້ການສັນຈອນຕາມຖະໜົນຫົນທາງຢ່າງປອດໄພສະດວກດີ. ນອກນີ້, ເຈົ້າໜ້າທີ່ຕຳຫຼວດຍັງຈະເຜີຍແຜ່ຂໍ້ມູນຂ່າວສານຜ່ານຈາກສື່ມວນຊົນ, ຂໍ້ຄວາມສັ້ນຫຼືSM, MicroBlogແລະWeChatເພື່ອໃຫ້ຄຳເຕືອນດ້ວຍຄວາມຫວັງດີກ່ຽວກັບການປ້ອງກັນຄວາມປອດໄພ, ການອອກເດີນທາງ, ການເຂົ້າຮ່ວມງານວາງສະແດງແລະອື່ນໆ,ເພື່ອບໍ່ໃຫ້ວຽກງານປ້ອງກັນຄວາມປອດໄພຂອງເຈົ້າໜ້າທີ່ຕຳຫຼວດສ້າງຄວາມບໍ່ສະດວກໃຫ້ແກ່ຊີວິດປະຈຳວັນແລະວຽກການງານຂອງຊາວເມືອງທັງຫຼາຍ.
ພ້ອມດຽວກັນນັ້ນ, ເຈົ້າໜ້າທີ່ຕຳຫຼວດນະຄອນນານນິງຍັງໄດ້ຈັດສົ່ງຕຳຫຼວດຍິງ ຈຳນວນ 150 ຄົນເຂົ້າສູ່ໜ່ວຍກວດກາຄວາມປອດໄພ,ໂດຍຈະຈັດວາງໃຫ້ມີພະນັກງານຍິງໃນການກວດກາຄວາມປອດໄພໃນການເຂົ້າປະຕູຫໍວາງສະແດງດ້ວຍອັດຕາ 1:3 ຊຶ່ງໄດ້ສະແດງໃຫ້ເຫັນເຖິງແນວຄິດການປ້ອງກັນຄວາມປອດໄພແບບເປັນກັນເອງ.
