ຊາວຈີນຕ່າງດ້າວແລະຄົນລາວເຊື້ອສາຍຈີນຈັດກິດຈະກຳບໍລິຈາກເພື່ອການກຸສົນ
ທ່ານກວ່ານຮວາປິ່ງເຂົ້າຮ່ວມກິດຈະກຳບໍລິຈາກເພື່ອການກຸສົນທີ່ຈັດຂຶ້ນໃນວັນທີ 1 ກັນຍານີ້
ຂ່າວສານຊິນຮວາລາຍງານວ່າ: ສະມາຄົມຊາວຈີນວຽງຈັນຊຶ່ງເປັນອົງການຈັດຕັ້ງຊາວຈີນຕ່າງດ້າວແລະຄົນລາວເຊື້ອສາຍຈີນທີ່ໃຫຍ່ທີ່ສຸດຂອງລາວໄດ້ຈັດກິດຈະກຳສະເຫຼີມສະຫຼອງວັນສ້າງຕັ້ງສະມາຄົມຈີນມູນນິທິວຽງຈັນຄົບຮອບ 47 ປີ, ວັນສ້າງຕັ້ງຫໍຈືເຈີ່ນຄົບຮອບ 11 ປີແລະສະເຫຼີມສະຫຼອງບຸນວັນສາດຈີນຊຶ່ງຄ້າຍໆກັບບຸນຫໍ່ເຂົ້າປະດັບດິນຂອງລາວ.
ທ່ານທູດກວ່ານຮວາປິ່ງມອບເຄື່ອງຊ່ວຍເຫຼືອໃຫ້ຜູ້ຮັບບໍລິຈາກ
ທ່ານວິໄລວັນ ພົມ ລັດຖະມົນຕີວ່າການກະຊວງກະສິກຳລາວ, ທ່ານສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ, ທ່ານກວ່ານຮວາປິ່ງ ເອກອັກຄະລັດຖະທູດຈີນປະຈຳລາວພ້ອມພັນລະຍາແລະເຈົ້າໜ້າທີ່ທີ່ກ່ຽວຂ້ອງໄດ້ເຂົ້າຮ່ວມງານກິດຈະກຳໃນຄັ້ງນີ້,ໂດຍໄດ້ມອບເຂົ້າ,ອາຫານແລະເຄື່ອງໃຊ້ປະຈຳວັນໃຫ້ຜູ້ຮັບບໍລິຈາກ. ກ່ອນກິດຈະກຳເລີ່ມຕົ້ນຂຶ້ນ, ທ່ານກວ່ານຮວາປິ່ງໄດ້ຕາງໜ້າສະຖານທູດຈີນປະຈຳລາວມອບເງິນບໍລິຈາກໃຫ້ສະມາຄົມຈີນມູນນິທິວຽງຈັນ. ໃນໄລຍະດຳເນີນກິດຈະກຳໃນຄັ້ງນີ້ໄດ້ແຈກຢາຍເຂົ້າ 20 ກວ່າໂຕນພ້ອມດ້ວຍອາຫານແລະເຄື່ອງໃຊ້ປະຈຳວັນປະເພດຕ່າງໆໃຫ້ຜູ້ຮັບບໍລິຈາກ 3000 ກວ່າຄົນ.
ສະມາຄົມຈີນມູນນິທິວຽງຈັນທີ່ຕັ້ງຢູ່ນະຄອນຫຼວງວຽງຈັນຂອງລາວໄດ້ສ້າງຕັ້ງຂຶ້ນເມື່ອປີ1966, ຊຶ່ງເປັນອົງການກຸສົນຂອງຊາວຈີນຕ່າງດ້າວແລະຄົນລາວເຊື້ອສາຍຈີນທີ່ມີຊື່ສຽງທີ່ຂຶ້ນກັບສະມາຄົມຊາວຈີນວຽງຈັນລາວ. ຫໍຈືເຈີ່ນສ້າງຕັ້ງຂຶ້ນເມື່ອປີ2002, ເປັນສະຖາປັດຕະຍາກຳທາງພຸດທະສາສະໜາທີ່ສັ້ງຂຶ້ນຢູ່ໃນສະມາຄົມຈີນມູນນິທິວຽງຈັນ,ແລະຍັງເປັນອົງການຈັດຕັ້ງຊາວຈີນຕ່າງດ້າວແລະຄົນລາວເຊື້ອສາຍຈີນທີ່ຮ່ວມກັບສະມາຄົມຈີນມູນນິທິວຽງຈັນດຳເນີນກິດຈະກຳເພື່ອການກຸສົນ. ໃນໄລຍະບຸນປະເພນີສຳຄັນຕ່າງໆເປັນຕົ້ນແມ່ນບຸນ ຢູລານຫຼືຄ້າຍກັບບຸນຫໍ່ເຂົ້າປະດັບດິນໃນແຕ່ລະປີ,ອົງການກຸສົນສອງແຫ່ງນີ້ລ້ວນແຕ່ໄດ້ຈັດກິດຈະກຳບໍລິຈາກເພື່ອຊ່ວຍເຫຼືອຄົນທຸກຍາກ, ຜູ້ເຖົ້າທີ່ປ່ຽວພອຍແລະຄົນພິການ.
