ງານພົບປະສັງສັນຈັດຊື້ສິນຄ້າຂອງງານວາງສະແດງສິນຄ້າຈີນ-ອາຊຽນຄັ້ງທີ 10 ໄດ້ດຶງດູດຄະນະຈັດຊື້ສິນຄ້າຕ່າງປະເທດຈຳນວນຫຼວງຫຼາຍມາເຂົ້າຮ່ວມງານ
ງານພົບປະສັງສັນຈັດຊື້ສິນຄ້າຂອງງານວາງສະແດງສິນຄ້າຈີນ-ອາຊຽນຄັ້ງທີ 10 ໄດ້ຈັດຂຶ້ນໃນວັນທີ 4 ກັນຍານີ້ທີ່ສູນປະຊຸມຂອງງານວາງສະແດງສາກົນນະຄອນນານນິງເຂດປົກຄອງຕົນເອງເຜົ່າຈວ້າງກວາງຊີຂອງຈີນ,ຊຶ່ງໄດ້ດຶງດູດຄະນະຈັດຊື້ສິນຄ້າຕ່າງປະເທດຈຳນວນຫຼວງຫຼາຍໂດຍມີຄະນະຊ່ຽວຊານດ້ານການຈັດຊື້ສິນຄ້າຈາກປະເທດອາຊຽນ, ອິນເດຍແລະປະເທດຕ່າງໆໃນອາຟິຼກກາມາເຂົ້າຮ່ວມງານ.
ງານພົບປະສັງສັນຈັດຊື້ສິນຄ້າຂອງງານວາງສະແດງສິນຄ້າຈີນ-ອາຊຽນຄັ້ງນີ້ມີຈຸດປະສົງເພື່ອຊຸກຍູ້ການຮ່ວມມືແລະແລກປ່ຽນກັນລະຫວ່າງຜູ້ປະກອບການທີ່ເຂົ້າຮ່ວມງານວາງສະແດງແລະນັກທຸລະກິດຈັດຊື້ສິນຄ້າໃຫ້ດີກວ່າເກົ່າ, ງານພົບປະສັງສັນໃນວັນທີ 4 ກັນຍານີ້ໄດ້ຮັບຄວາມນິຍົມຊົມຊອບເປັນພິເສດຈາກຫຼາຍ ບໍລິສັດເກືອບ100ແຫ່ງຂອງຈີນແລະຕ່າງປະເທດ, ຫຼາຍບໍລິສັດຍັງໄດ້ຕົກລົງໃນເບື້ອງຕົ້ນໃນການຮ່ວມມື,ຊຶ່ງມີບັນຍາກາດຟົດຟື້ນຫຼາຍ.
ງານວາງສະແດງສິນຄ້າໃນຄັ້ງນີ້ໄດ້ມີການເຊັນສັນຍາໂຄງການຮ່ວມມືສາກົນທັງໝົດ 73 ໂຄງການ ໃນມູນຄ່າລົງທຶນລວມທັງໝົດ 8ຕື້ 600 ລ້ານໂດລາ, ໂຄງການຮ່ວມມືພາຍໃນປະເທດຈີນມີ 94 ໂຄງການ ໃນມູນຄ່າລົງທຶນລວມທັງໝົດ 68 ຕື້ 100 ລ້ານຢວນຫຼືປະມານ1ຕື້800ລ້ານໂດລາ. ຊຶ່ງໂຄງການທັງພາຍໃນຈີນແລະຕ່າງປະເທດເຫຼົ່ານີ້ມີມູນຄ່າຫຼາຍກວ່າ100ຕື້ຢວນຫຼື ປະມານ15ຕື້ 800ລ້ານໂດລາ.
