ຮອງນາຍົກລັດຖະມົນຕີໄທກ່າວວ່າ ການຮ່ວມມືລະຫວ່າງຈີນ-ອາຊຽນແມ່ນຊ່ອຍຊູຍູ້ໜູນກັນໃນດ້ານທ່າແຮງ
(GMT+08:00) 2013-09-05 16:22:31 cri
ວັນທີ 5 ກັນຍານີ້, ທ່ານນິວັດທຳຣົງ ບຸນສົງໄພສານ, ຮອງນາຍົກລັດຖະມົນຕີທັງເປັນລັດຖະມົນຕີວ່າການກະຊວງການຄ້າໄທທີ່ໄດ້ເຂົ້າຮ່ວມງານວາງສະແດງສິນຄ້າຈີນ-ອາຊຽນຄັ້ງທີ 10 ໃນມໍ່ໆນີ້ກ່າວວ່າ, ການຮ່ວມມືລະຫວ່າງຈີນ-ອາຊຽນແມ່ນການຮ່ວມມືແບບຕ່າງຝ່າຍຕ່າງມີຜົນປະໂຫຍດແລະຕ່າງຊ່ອຍຊູຍູ້ໜູນກັນ. ຈີນສາມາດຊອກຫາໂອກາດການລົງທຶນຢູ່ອາຊຽນໄດ້, ຜະລິດຕະພັນເອເລັກໂຕຼນິກ, ຄອມພິວເຕີ, ກົນຈັກແລະສິນຄ້າປະເພດອື່ນໆທີ່ຈີນຜະລິດກໍ່ສາມາດຊອກໄດ້ຕະຫຼາດຢູ່ອາຊຽນທີ່ມີຈຳນວນປະຊາກອນ 600 ລ້ານຄົນ; ປະເທດອາຊຽນສ່ວນຫຼາຍແມ່ນປະເທດກະສິກຳ, ສາມາດຕອບສະໜອງຄວາມຮຽກຮ້ອງຕ້ອງການດ້ານຜະລິດຕະພັນກະສິກຳແລະວັດຖຸດິບໃຫ້ແກ່ການພັດທະນາເສດຖະກິດຂອງຈີນໄດ້.
ທ່ານນິວັດທຳຣົງ ບຸນສົງໄພສານກ່າວວ່າ, ໃນ 10 ປີຜ່ານມານີ້, ຈີນກັບອາຊຽນໄດ້ເພິ່ງພາອາໄສກັນຢ່າງແໜ້ນແຟ້ນ, ໄດ້ດຳເນີນການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ, ການຮ່ວມມືລະຫວ່າງສອງຝ່າຍໃນອະນາຄົດກໍ່ຈະນັບມື້ນັບກວ້າງອອກກວ່າເກົ່າ.