ພິມຈຳໜ່າຍສະແຕມທີ່ລະນຶກເປັນເທື່ອທຳອິດນັບແຕ່ການຈັດງານວາງສະແດງສິນຄ້າຈີນ-ອາຊຽນໃນຮອບ 10 ປີຜ່ານມາ
ເພື່ອລະລຶກວັນສ້າງຕັ້ງງານວາງສະແດງສິນຄ້າຈີນ-ອາຊຽນຄົບຮອບ 10ປີ , ກຸ່ມບໍລິສັດໄປສະນີຈີນໄດ້ພິມຈຳໜ່າຍສະແຕມຊຸດພິເສດຂອງງານວາງສະແດງສິນຄ້າຈີນ-ອາຊຽນຈຳນວນ 1 ດວງ ໃນວັນທີ 15ສິງຫາແລ້ວນີ້. ນີ້ແມ່ນເທື່ອທຳອິດທີ່ພິມຈຳໜ່າຍສະແຕມທີ່ລະນຶກຂອງງານວາງສະແດງສິນຄ້າຈີນ-ອາຊຽນນັບແຕ່ໄດ້ມີການຈັດງານໃນຮອບ 10 ປີຜ່ານມາ.
ສະແຕມຊຸດພິເສດຂອງງານວາງສະແດງດັ່ງກ່າວນີ້ມີຫົວຂໍ້ອັນພົ້ນເດັ່ນ,ຊຶ່ງອອກແບບໂດຍອີງໃສ່ຮູບແຕ້ມຈີນທີ່ມີຊື່ວ່າ "ຟານຮວາຊືຈິ່ນ" ແປວ່າ ດວງໄມ້ບານເຮືອງເຮື່ອ, ຊຶ່ງເປັນຜົນງານຂອງທ່ານເຈິ້ງຈຸ່ນ ນັກແຕ້ມຮູບແລະຂຽນງາມທີ່ມີຊື່ສຽງຂອງເຂດກວາງຊີຈີນ. ຊຶ່ງສະແຕມດວງນີ້ໄດ້ຖືຮູບແຕມ "ຟານຮວາຊືຈິງ" ທີ່ແຕ້ມໃຫ້ມີດອກໄມ້ທີ່ມີຊື່ສຽງຂອງຈີນແລະ10ປະເທດອາຊຽນທີ່ກຳລັງເບັ່ງບານຢູ່ນັ້ນເປັນຕົ້ນຕໍ,ແລະຖືສູນປະຊຸມວາງສະແດງສາກົນນານນິງທີ່ເປັນສະຖານທີ່ຖາວອນໃນການຈັດງານວາງສະແດງສິນຄ້າຈີນ-ອາຊຽນນັ້ນເປັນສາກເບື້ອງຫຼັງ, ອັນໄດ້ສ່ອງແສງໃຫ້ເຫັນຢ່າງມີຊີວິວຊີວາກ່ຽວກັບຫົວຂໍ້ຂອງງານວາງສະແດງສິນຄ້າຈີນ-ອາຊຽນຄືມິດຕະພາບ,ການຮ່ວມມື, ການພັດທະນາແລະຄວາມຈະເລີນຮຸ່ງເຮືອງ, ແລະມີຄວາມໝາຍ ວ່າ ການຮ່ວມມືລະຫວ່າງຈີນກັບອາຊຽນມີອະນາຄົດອັນດີງາມ.ໃນນາມເປັນໜຶ່ງໃນບັນດາຜູ້ປະດິດສ້າງສະແຕມດວງນີ້, ທ່ານເຈີ້ງຈຸ່ນ ໄດ້ກ່າວດ້ວຍຄວາມພາກພູມໃຈວ່າ, ການພິມຈຳໜ່າຍສະແຕມໃນໂອກາດທີ່ງານວາງສະແດງສິນຄ້າຈີນ-ອາຊຽນສ້າງຕັ້ງຂຶ້ນຄົບຮອບ 10 ປີ ເປັນເລື່ອງທີ່ມີຄວາມໝາຍຄວາມສຳຄັນຫຼາຍ, ສະແຕມດວງນີ້ມີຄຸນຄ່າສູງໃນດ້ານການສະສົມ, ແລະໄດ້ດຶງດູດຄວາມສົນໃຈຈາກຜູ້ນິຍົມສະສົມສະແຕມຢ່າງຫຼວງຫຼາຍ.ສະເພາະແຕ່ຢູ່ທີ່ພິທີເປີດການຈຳໜ່າຍສະແຕມ ກໍ່ໄດ້ຈຳໜ່າຍຊອງພິເສດທີ່ມີລາຍເຊັນຂອງຜູ້ປະດິດນັບເປັນພັນຊອງແລ້ວ.
