ທ່ານຫວາງອີ້ສົນທະນາຜ່ານທາງໂທລະສັບກັບທ່ານຈອນ ເຄຣີ, ເພື່ອແລກປ່ຽນຄຳຄິດຄຳເຫັນກັນກ່ຽວກັບການພົວພັນລະຫວ່າງຈີນ-ອາເມລິກາ ແລະບັນຫາຊີຣີ
(GMT+08:00) 2013-09-09 15:27:41 cri
ວັນທີ 8 ກັນຍານີ້, ຢູ່ນະຄອນຫຼວງຕັສເກັນຂອງອຸສເບກີສະຖານ, ທ່ານຫວາງອີ້, ລັດຖະມົນຕີວ່າການກະຊວງການຕ່າງປະເທດຈີນທີ່ພວມຕິດຕາມທ່ານສີຈິ້ນຜິງ, ປະທານປະເທດຈີນຢ້ຽມຢາມຢູ່ອຸສເບກີສະຖານໄດ້ສົນທະນາຜ່ານທາງໂທລະສັບກັບທ່ານຈອນ ເຄຣີ, ລັດຖະມົນຕີວ່າການກະຊວງການຕ່າງປະເທດອາເມລິກາ.
ໂດຍແນໃສ່ບັນຫາຊີຣີ, ທ່ານຫວາງອີ້ກ່າວເນັ້ນວ່າ, ຖ້າຢາກຍຶດໝັ້ນໃນສອງຫຼັກການຄື: ປົກປັກຮັກສາຫຼັກມາດຖານທີ່ເປັນພື້ນຖານໃນການພົວພັນສາກົນແລະຕໍ່ຕ້ານການກະທຳໃດໆທີ່ໃຊ້ອາວຸດເຄມີ, ກໍ່ຄວນກັບຄືນສູ່ຂອບສະພາຄວາມໝັ້ນຄົງອົງການສະຫະປະຊາຊາດ, ສະແຫວງຫາຄວາມຮັບຮູ້ທີ່ເປັນເອກະສັນກັນ, ແກ້ໄຂບັນຫາຢ່າງເໝາະສົມ, ແຕ່ບໍ່ແມ່ນກະທຳການປະພຶດທີ່ກົງກັນຂ້າມ. ຈີນແລະອາເມລິກາລ້ວນແຕ່ແມ່ນປະເທດສະມາຊິກຖາວອນໃນສະພາຄວາມໝັ້ນຄົງສະຫະປະຊາຊາດ, ຄວນເປັນຜູ້ນຳໜ້າປົກປັກຮັກສາຈຸດປະສົງຂອງ "ກົດບັດສະຫະປະຊາຊາດ", ເສີມຂະຫຍາຍບົດບາດທີ່ສຳຄັນຂອງສະພາຄວາມໝັ້ນຄົງສະຫະປະຊາຊາດໃນການປົກປັກຮັກສາສັນຕິພາບແລະຄວາມໝັ້ນຄົງສາກົນ.
ທ່ານຫວາງອີ້ໄດກ່າວຢ້ຳຫຼັກການຫຼັກໝັ້ນຂອງຈີນທີ່ຄັດຄ້ານການໃຊ້ກຳລັງ ທະຫານໃນການພົວພັນສາກົນ, ເຕືອນໃຫ້ປະເທດທີ່ກ່ຽວຂ້ອງຕ້ອງໃຊ້ທ່າທີອັນສຸຂຸມຮອບຄອບ, ແລະພິຈາລະນາຢ່າງລະອຽດກ່ອນການດຳເນີນການເຄື່ອນໄຫວທາງການທະຫານ. ສອງຝ່າຍເຫັນດີຈະສືບຕໍ່ຮັກສາການຕິດຕໍ່ພົວພັນກັນກ່ຽວກັບບັນຫາດັ່ງກ່າວ.