ຈັດງານສຳມະນາຄວາມປອດໄພດ້ານອິນເຕີເນັດປີ2013ຂອງARFຢູ່ນະຄອນຫຼວງປັກກິ່ງ
(GMT+08:00) 2013-09-11 16:32:41 cri
ງານສຳມະນາຄວາມປອດໄພດ້ານອິນເຕີເນັດປີ2013ຂອງເວທີປຶກສາຫາລືດ້ານການເມືອງແລະຄວາມໝັ້ນຄົງໃນພາກພື້ນອາຊຽນຫຼືARFໄດ້ໄຂຂຶ້ນໃນວັນທີ 11 ກັນຍານີ້ທີ່ນະຄອນຫຼວງປັກກິ່ງ ໂດຍມີຜູ້ແທນຈາກ20ປະເທດແລະອົງການຈັດຕັ້ງທີ່ເປັນສະມາຊິກຂອງARF, ຫ້ອງການບັນຫາຢາເສບຕິດແລະອາຊະຍາກຳອົງການສະຫະປະຊາຊາດ, ສະພາຄວາມໝັ້ນຄົງອາຊີປາຊີຟິກໄດ້ເຂົ້າຮ່ວມເວທີປຶກສາຫາລືໃນຄັ້ງນີ້ເພື່ອຮ່ວມກັນຊຸກຍູ້ARFສືບຕໍ່ເສີມຂະຫຍາຍບົດບາດທີ່ດີໃນການສົນທະນາແລະການຮ່ວມມືດ້ານບັນຫາອິນເຕີເນັດ.
ຈີນແລະມະເລເຊຍໄດ້ຮ່ວມກັນເປັນເຈົ້າພາບຈັດງານສຳມະນາໃນຄັ້ງນີ້ພາຍໃຕ້ຫົວຂໍ້ "ງານສຳມະນາເພີ່ມທະວີມາດຕະການປ້ອງກັນຄວາມປອດໄພດ້ານອິນເຕີເນັດຂອງARF---ແງ່ມຸມດ້ານກົດໝາຍແລະວັດທະນະທຳ", ຊຶ່ງໃນນັ້ນມີຫົວຂໍ້ປຶກສາຫາລື 5 ຂໍ້ຄື, ສະພາບການພັດທະນາຫຼ້າສຸດໃນການປະຕິບັດຕົວຈິງເພື່ອປ້ອງກັນຄວາມປອດໄພດ້ານອິນເຕີເນັດຂອງປະເທດແລະເຂດແຄວ້ນຕ່າງໆ, ການສ້າງຄວາມສາມາດປ້ອງກັນຄວາມປອດໄພດ້ານອິນເຕີເນັດ, ຂອບເຂດວັດທະນະທຳຂອງຄວາມປອດໄພດ້ານອິນເຕີເນັດ, ການຮ່ວມມືໃນພາກພື້ນເພື່ອຕໍ່ຕ້ານອາຊະຍາກຳທາງອິນເຕີເນັດແລະບົດບາດຂອງປະເທດໜຶ່ງຢູ່ໃນອິນເຕີເນັດ.
ງານສຳມະນາຄັ້ງນີ້ຈະດຳເນີນເປັນເວລາ2ວັນ, ນີ້ເປັນເທື່ອທຳອິດທີ່ຈີນເປັນເຈົ້າພາບຈັດງານສຳມະນາຄວາມປອດໄພດ້ານອິນເຕີເນັດພາຍໃຕ້ຂອບເວທີປຶກສາຫາລືດ້ານການເມືອງແລະຄວາມໝັ້ນຄົງໃນພາກພື້ນອາຊຽນ.