ປະທານາທິບໍດີອິນໂດເນເຊຍຕ້ອນຮັບການເຂົ້າຢ້ຽມຂໍ່ານັບຂອງທ່ານຢາງເຈຍສື
ຕາມຂ່າວສານຈີນ: ຕອນເຊົ້າວັນທີ 19 ກັນຍານີ້, ທ່ານຊູຊີໂລ ບັງບາງ ຢູດໂຮໂຢໂນ ປະທານາທິບໍດີອິນໂດເນເຊຍໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານຢາງເຈຍສື ທີ່ເປິກສາແຫ່ງລັດຈີນຢູ່ຈາກາຕາ.
ທ່ານຊູຊີໂລກ່າວວ່າ, ການພົວພັນລະຫວ່າງອິນໂດເນເຊຍກັບຈີນຂະຫຍາຍຕົວເປັນຢ່າງດີ, ສອງປະເທດຄວນສືບຕໍ່ເພີ່ມທະວີການຮ່ວມມືຮອບດ້ານ. ປະຊາຊົນອິນໂດເນເຊຍຍິນດີຕ້ອນຮັບທ່ານປະທານສີຈີ້ນພິງຈະມາຢ້ຽມຢາມອິນໂດເນເຊຍທາງລັດຖະກິດແລະເຂົ້າຮ່ວມກອງປະຊຸມບໍ່ເປັນທາງການຂອງຜູ່ນຳອົງການ OPEC ຄັ້ງທີ 21 ທີ່ຈະຈັດຂຶ້ນຢູ່ເກາະບາລີ.
ທ່ານຢາງເຈຍສືກ່າວວ່າ, ຈີນແລະອິນໂດເນເຊຍລ້ວນແຕ່ແມ່ນປະເທດໃຫຍ່ໃນອາຊີແລະແມ່ນປະເທດທີ່ຕະຫຼາດຈະເລີນຂຶ້ນໃໝ່, ການເພີ່ມທະວີການພົວພັນຄູ່ຮ່ວມຍຸດທະສາດລະຫວ່າງສອງປະເທດແມ່ນຄວາມປາຖະໜາຮ່ວມຂອງລັດຖະບານແລະປະຊາຊົນສອງຊາດ, ມີບົດບາດອັນສຳຄັນຕໍ່ການຮັກສາສັນຕິພາບ, ສະຖຽນລະພາບ, ການພັດທະນາຂອງເຂດແຄວ້ນແລະຊຸກຍູ້ປະເທດທີ່ພວມພັດທະນາໃຫ້ສາມັກຄີຮ່ວມມື. ເຊື່ອໝັ້ນວ່າຜ່ານການທຳຄວາມພະຍາຍາມຮ່ວມມືຂອງສອງປະເທດ, ການຢ້ຽມຢາມອິນໂດເນເຊຍຂອງທ່ານສີຈີ້ນພິງໃນໄວໆນີ້ຍ່ອມຈະໄດ້ຮັບໝາກຜົນອັນອຸດົມສົມບູນ, ຊຸກຍູ້ການພົວພັນລະຫວ່າງສອງປະເທດໃຫ້ຂະຫຍາຍຕົວໄປສູ່ລະດັບເລິກເຊິ່ງກວ່າເກົ່າ, ຂົງເຂດກວ້າງຂວາງກວ່າເກົ່າ, ແລະລະດັບສູງກວ່າເກົ່າອີກ. ຝ່າຍຈີນຕັ້ງໜ້າສະໜັບສະໜູນອິນໂດເນເຊຍຈັດກອງປະຊຸມບໍ່ເປັນທາງການຂອງຜູ່ນຳອົງການ OPEC , ຈະເພີ່ມທະວີການປະສານສົມທົບກັບອິນໂດເນເຊຍ, ເຮັດໃຫ້ກອງປະຊຸມບັນລຸເປົ້າໝາຍທີ່ໄດ້ກຳນົດໄວ້.
ມື້ດຽວກັນ, ທ່ານຢາງເຈຍສືແລະທ່ານໂດໂຄ ຊູຢັງໂຕ ລັດຖະມົນຕີວ່າການກະຊວງວາງແຜນຄວາມປອດໄພກົດໝາຍການເມືອງອິນໂດເນເຊຍໄດ້ເປັນປະທານກົນໄກການສົນທະນາລະດັບຮອງນາຍົກລັດຖະມົນຕີລະຫວ່າງສອງປະເທດຈີນອິນໂດເນເຊຍຄັ້ງທີ 4.
