ເກີດເຫດການກຸ່ມປະກອບອາວຸດໂຈມຕີສູນການຄ້າຢູ່ນະຄອນຫຼວງໄນໂຣບີຂອງເຄັນຢາເຮັດໃຫ້ມີຜູ້ເສຍຊີວິດ43ຄົນ
ວັນທີ 21 ກັນຍານີ້, ມືປືນທີ່ບໍ່ຊາບຝ່າຍກຸ່ມໜຶ່ງໄດ້ຫຼອນໂຈມຕີສູນການຄ້າເວັສທ໌ເກັດຂອງນະຄອນຫຼວງໄນໂຣບີຂອງເຄັນຢາແລະໄດ້ຍິງປະທະກັນກັບເຈົ້າໜ້າທີ່ຕຳຫຼວດ
ຕອນທ່ຽງວັນທີ 21 ກັນຍານີ້, ຕາມເວລາທ້ອງຖິ່ນ,ຢູ່ສູນການຄ້າທີ່ມີຊື່ສຽງແຫ່ງໜຶ່ງທີ່ນະຄອນຫຼວງໄນໂຣບີຂອງເຄັນຢາໄດ້ເກີດການຍິງປະທະກັນຢ່າງຮຸນແຮງລະຫວ່າງເຈົ້າໜ້າທີ່ຕຳຫຼວດກັບກຸ່ມປະກອບອາວຸດ,ມາຮອດປະຈຸບັນຢ່າງໜ້ອຍໄດ້ເຮັດໃຫ້ມີຜູ້ເສຍຊີວິດ 43 ຄົນ, ບາດເຈັບ 200ຄົນ. ປະຈຸບັນ, ສອງຝ່າຍຍັງປະເຊີນໜ້າກັນຢູ່.
ມືປືນຍິງປະທະກັນກັບເຈົ້າໜ້າທີ່ຕຳຫຼວດ
ທ່ານເບັນເຊີນ ຄີບູ ຜູ້ບັນຊາການຕຳຫຼວດໄນໂຣບີກ່າວວ່າ: ໃນວັນທີ 21 ກັນຍານີ້, ຢ່າງໜ້ອຍມີຜູ້ປະກອບອາວຸດ 5 ຄົນໄດ້ບຸກເຂົ້າໄປໃນອາຄານສູນການຄ້າເວັສທ໌ເກັດເພື່ອປຸ້ນສະດົມສິ່ງຂອງ, ພາຍຫຼັງເຈົ້າໜ້າທີ່ຕຳຫຼວດໄປເຖິງສູນການຄ້າເປັນການດ່ວນແລ້ວ, ສອງຝ່າຍໄດ້ຍິງປະທະກັນຢ່າງດຸເດືອດ.
ຕາມເຈົ້າໜ້າທີ່ຕຳຫຼວດທີ່ຢູ່ສະຖານທີ່ເກີດເຫດແຈ້ງໃຫ້ຊາບວ່າ: ມີຜູ້ປະກອບອາວຸດຜູ້ໜຶ່ງຖືກຍິງໄດ້ຮັບບາດເຈັບ, ແລະໄດ້ຖືກສົ່ງໄປປິ່ນປົວແລະຄຸມຕົວຢູ່ໂຮງໝໍແລ້ວ. ນອກນີ້,ຍັງມີຜູ້ປະກອບອາວຸດປະມານ 10ຄົນຍັງບໍ່ຍອມວາງອາວຸດແລະທຳການຕໍ່ສູ້ກັບເຈົ້າໜ້າທີ່ຕຳຫຼວດຢູ່ໃນຮ້ານຊຸບເປີມາເກັດແຫ່ງໜຶ່ງຢູ່ຊັ້ນທີໜຶ່ງຂອງສູນການຄ້າ, ທະຫານແລະຕຳຫຼວດບໍ່ສາມາດເຂົ້າໃກ້ໄດ້. ຕາມສື່ມວນຊົນເຄັນຢາລາຍງານວ່າ: ພວກປະກອບອາວຸດໄດ້ກັກຕົວປະກັນໄວ້. ມີຜູ້ເຫັນເຫດການໃຫ້ຮູ້ວ່າ, ພວກປະກອບອາວຸດໄດ້ແກວ່າງໝາກແຕກ, ລູກຄ້າຈຳນວນຫຼວງຫຼາຍໄດ້ໂຕນໜີອອກຈາກສູນການຄ້າ.
ນອກນີ້, ສະຖານທູດຈີນປະຈຳເຄັນຢາໄດ້ຢືນຢັນຕໍ່ສື່ມວນຊົນວ່າ, ຕາມການກວດກາໃນເບື້ອງຕົ້ນແລ້ວ,ບໍ່ໄດ້ພົບວ່າມີຄົນຈີນໄດ້ຮັບບາດເຈັບໃນເຫດການຫຼອນໂຈມຕີໃນຄັ້ງນີ້.
