ກອງປະຊຸມເປິດສົກຮຽນໃໝ່ຂອງຄະນະສະມາຄົມນັກສຶກສາລາວປະຈຳປັກກິ່ງ ສົກຮຽນ 2013-2014
ຕອນບ່າຍວັນທີ 14 ກັນຍານີ້,ຢູສະຖານເອກອັກຄະລັດຖະທູດ ສປປ ລາວ ປະຈຳນະຄອນຫລວງປັກກິ່ງ ຄະນະສະມາຄົມນັກສຶກສາລາວ ປະຈຳປັກກິ່ງໄດ້ຈັດກອງປະຊຸມເປິດສົກຮຽນໃໝ່ 2013-2014 ຂນ ໂດຍການເປັນປະທານຂອງ ທ່ານ ສົມດີ ບຸນຄຸ້ມ ເອກອັກຄະລັດຖະທູດ ສປປ ລາວ ປະຈຳ ສປ ຈີນ, ທ່ານ ດາລາສັກ ລາດຊະວົງ ວ່າການຫົວໜ້າຫ້ອງການທີ່ປຶກສາຝ່າຍສຶກສາ-ວັດທະນະທຳ ແລະ ທ່ານ ຕຸລາໄຊ ພັນທະວົງ ປະທານຄະນະສະມາຄົມນັກສຶກສາລາວປະຈຳປັກກິ່ງ ກອງ
ປະຊຸມຄັ້ງນີ້ມີນັກສຶກສາ ນັກຄົ້ນຄວ້ານັບແຕ່ລະດັບປະລິນຍາຕີ ປະລິນຍາໂທ ແລະ ປະລິນຍາເອກ ທີ່ກຳລັງສຶກສາຄົ້ນຄວ້າ ຮ່ຳຮຽນ ນັບທັງນັກສຶກສາທັງເກົ່າແລະໃໝ່ຢູ່ຕາມມະຫາວິທະຍາໄລແຫ່ງຕ່າງໆຢູ່ນະຄອນຫລວງປັກກິ່ງແລະແຂວງອ້ອມຂ້າງເຂົ້າຮ່ວມ.
ໃນກອງປະຊຸມນອກຈາກໄດ້ມີການສະເໜີຄະນະສະມາຄົມນັກສຶກສາລາວປະຈຳປັກກິ່ງຊຸດໃໝ່, ນັກສຶກສາທີ່ມາສຶກສາໃໝ່, ແຜນການເຄື່ອນໄຫວປະຈຳປີຂອງສະມາຄົມ ແລະ ການເຄື່ອນໄຫວວຽກງານອົງການຈັດຕັ້ງມະຫາຊົນແລ້ວ ກອງປະຊຸມຍັງໄດ້ຮັບຟັງການເຜີຍແຜ່ຂໍ້ຕົກລົງຂອງລັດຖະມົນຕີກະຊວງສຶກສາ ແລະ ກິລາ ວ່າດ້ວຍລະບຽບການຄຸ້ມຄອງນັກຮຽນ ນັກສຶກສາລາວ ທີ່ໄປສຶກສາຢູ່ຕ່າງປະເທດ ເລກທີ 3552/ສສກ.ກນ.13 ລົງວັນທີ 28 ສິງຫາ 2013 ຂອງທ່ານ ອາຈານ ດາລາສັກ ລາດຊະວົງ ແລະ ການໃຫ້ກຽດໂອ້ລົມຂອງທ່ານ ສົມດີ ບຸນຄຸ້ມ ເອກອັກຄະລັດຖະທູດລາວ ປະຈຳ ສປ ຈີນ ເຊິ່ງທ່ານໄດ້ເນັ້ນໜັກເຖິງການເອົາໃຈໃສ່ ຕັ້ງໜ້າສຶກສາຮ່ຳຮຽນ ນຳເອົາບົດຮຽນແລະເຕັກນິກວິຊາການທີ່ກ້າວໜ້າກັບໄປສ້າງສາພັດທະນາປະເທດຊາດ ຕະຫລອດເຖິງການດຳລົງຊີວິດ, ການເອົາໃຈໃສ່ນັບຖືການຈັດຕັ້ງປະຕິບັດລະບຽບວິໄນ ກໍຄືກົດໝາຍຂອງປະເທດເຈົ້າພາບແລະກໍ່ສ້າງຕົນເອງເພື່ອໃຫ້ໄດ້ເຂົ້າໃນການຈັດຕັ້ງມະຫາຊົນແລະອື່ນໆ.
ປະຈຸບັນ ມີນັກສຶກສາລາວລະດັບຕ່າງໆ ທີ່ກຳລັງສຶກສາຮ່ຳຮຽນຢູ່ສປ ຈີນ ຫລາຍກວ່າ 2000 ຄົນ, ສະເພາະຢູ່ນະຄອນຫລວງປັກກິ່ງ ມີນັກສຶກສາລາວກຳລັງຄົ້ນຄວ້າ, ຮ່ຳຮຽນ ມີ ຈຳນວນທັງໝົດ123 ຄົນ ໃນນັ້ນມີຍິງ 41 ຄົນ.
ໃນແຕ່ລະປີ ລັດຖະບານ ສປ ຈີນໄດ້ໃຫ້ທຶນແກ່ນັກສຶກສາລາວ (ທັງເກົ່າ ແລະ ໃໝ່) ຈຳນວນ 300 ທຶນ ສະເພາະສົກຮຽນ 2013-2014 ນັກສຶກສາໃໝ່ໄດ້ຮັບທຶນຈາກລັດຖະບານ ສປ ຈີນ ຈຳນວນ 68 ທຶນ ໃນນັ້ນລະດັບປະລິນຍາເອກ 6 ທຶນ ລະດັບປະລິນຍາໂທ 43 ທຶນ ແລະ ປະລິນຍາຕີ 19 ທຶນ.
