ທ່ານນາງອອງຊານຊູຈີເຂົ້າຢ້ຽມຄຳນັບຜູ້ນຳສິງກະໂປ
(GMT+08:00) 2013-09-24 11:19:44 cri
ວັນທີ 23 ກັນຍານີ້, ທ່ານນາງອອງຊານຊູຈີ, ຜູ້ນຳພັກຝ່າຍຄ້ານລັດຖະບານມຽນມາທີ່ພວມຢ້ຽມຢາມສິງກະໂປໄດ້ເຂົ້າຢ້ຽມຄຳນັບແລະພົບປະກັບທ່ານໂທນີ ຕັນຄິງຢາມ ປະທານາທິບໍດີສິງກະໂປ, ທ່ານລີຊຽນຫຼົງ, ນາຍົກລັດຖະມົນຕີສິງກະໂປແລະຜູ້ນຳທ່ານອື່ນໆຂອງສິງກະໂປ, ແລະໄດ້ແລກປ່ຽນຄວາມຄິດຄວາມເຫັນກ່ຽວກັບບັນຫາການພັດທະນາຂອງມຽນມາ. ໃນການພົບປະ ທ່ານນາງອອງຊານຊູຈີກ່າວເນັ້ນວ່າ, ປະຈຸບັນ ຈຸດສຳຄັນໜຶ່ງທີ່ນາງສົນໃຈທີ່ສຸດໃນການພັດທະນາຂອງມຽນມາແມ່ນຄວນຍົກສູງຄວາມສາມາດດ້ານການປະກອບອາຊີບຂອງປະຊາຊົນມຽນມາ.
ທ່ານລີສຽນຫຼົງ ນາຍົກລັດຖະມົນຕີສິງກະໂປກ່າວຫຼັງການພົບປະວ່າ, ໃນການພົບປະ ສອງຝ່າຍໄດ້ກ່າວເຖິງບັນຫາການພັດທະນາຂອງມຽນມາແລະໄດ້ປຶກສາຫາລືກັນກ່ຽວກັບການຈະເພີ່ມທະວີມິດຕະພາບລະຫວ່າງສອງປະເທດແນວໃດ. ທ່ານລີຊຽນຫຼົງຍັງກ່າວຢ້ຳວ່າ, ສິງກະໂປຈະສະໜັບສະໜູນມຽນມາຂຶ້ນດຳລົງຕຳແໜ່ງປະເທດປະທານໝູນວຽນຂອງອາຊຽນໃນປີ 2014, ແລະກ່າວເນັ້ນວ່າສິງກະໂປຈະໃຫ້ການຊ່ວຍເຫຼືອໃນການພັດທະນາຂອງມຽນມາ.
ທ່ານນາງອອງຊານຊູຈີຈະສິ້ນສຸດການຢ້ຽມຢາມແລະເດີນທາງອອກຈາກສິງກະໂປໃນວັນທີ 24 ກັນຍານີ້.