ຕຶກອາຄານຫຼັງໜຶ່ງຢູ່ນະຄອນມຸມບາຍຂອງອິນເດຍພັງທະລາຍລົງ ເຮັດໃຫ້ 50 ກວ່າຄົນຖືກຝັງຢູ່ໃຕ້ກອງຊາກສະຫຼັກຫັກພັງ
ຕຶກອາຄານທີ່ມີ 5 ຊັ້ນ ຫຼັງໜຶ່ງຢູ່ພາກໃຕ້ຂອງນະຄອນມຸມບາຍ ເມືອງໃຫຍ່ທີ່ສຸດຂອງອິນເດຍໄດ້ພັງທະລາຍລົງຢ່າງກະທັນຫັນໃນຕອນເຊົ້າວັນທີ 27 ກັນຍານີ້, ຊຶ່ງເຫດການນີ້ຢ່າງໜ້ອຍໄດ້ເຮັດໃຫ້ມີຜູ້ໄດ້ຮັບບາດເຈັບ 5 ຄົນ, 50ກວ່າຄົນຖືກຝັງຢູ່ໃຕ້ກອງຊາກສະຫຼັກຫັກພັງ.
ຕາມຂ່າວແຈ້ງວ່າ, ຕຶກອາຄານຫຼັງນີ້ແມ່ນຫໍພັກຂອງຄອບຄົວພະນັກງານບໍລິສັດກໍ່ສ້າງພື້ນຖານໂຄງລ່າງເມືອງບຸມບາຍ, ເຫດການໃນຄັ້ງນີ້ເກີດຂຶ້ນໃນເວລາ 6 ໂມງເຊົ້າ, ປະຊາຊົນສ່ວນຫຼາຍຍັງນອນຫຼັບຢູ່, ດ້ວຍເຫດນີ້,ຈິ່ງມີຄົນຈຳນວນຫຼວງຫຼາຍຖືກຄ້າງຢູ່ໃຕ້ກອງຊາກສະຫຼັກຫັກພັງ.
ພາຍຫຼັງເຫດການເກີດຂຶ້ນແລ້ວ, ເຈົ້າໜ້າທີ່ດັບເພີງແລະເຈົ້າໜ້າທີ່ກູ້ໄພໄດ້ເດີນທາງໄປສະຖານທີ່ເກີດເຫດເປັນການດ່ວນເພື່ອດຳເນີນການກູ້ໄພ. ຜູ້ຮັບຜິດຊອບວຽກງານການກູ້ໄພຜູ້ໜຶ່ງກ່າວວ່າ, ຖ້າວ່າການກູ້ໄພດຳເນີນໄປດ້ວຍດີ, ກໍອາດຈະສາມາດຫຼີກເວັ້ນບໍ່ໃຫ້ມີຜູ້ເສຍຊີວິດໄດ້.
ໄລຍະເດືອນມິຖຸນາຫາເດືອນກັນຍາແຕ່ລະປີແມ່ນລະດູຝົນຂອງອິນເດຍ. ໃນຫຼາຍມື້ມານີ້, ມຸມບາຍມີຝົນຕົກໜັກຢ່າງຕໍ່ເນື່ອງ, ຊຶ່ງອາດຈະເປັນສາເຫດຕົ້ນຕໍທີ່ເຮັດໃຫ້ອາຄານພັງທະລາຍໃນຄັ້ງນີ້.
