ປະທານາທິບໍດີອາເມລິກາແລະອີຣານໂທລະສັບລົມກັນ,ທັບມ້າງສະພາບການຕ່າງປະເທດທີ່ແຂງກະດ້າງເປັນເວລາ30ກວ່າປີ
ຕາມຂ່າວCRI: ວັນທີ 27 ກັນຍານີ້ ຕາມເວລາທ້ອງຖິ່ນ, ທ່ານບາຣັກ ໂອບາມາ ປະທານາທິບໍດີອາເມລິກາໄດ້ໂທລະສັບລົມກັບທ່ານຮາຊານ ຣູຮານີ ປະທານາທິບໍດີອີຣານກ່ຽວກັບການແກ້ໄຂບັນຫານິວເຄຼຍອີຣານ, ແລະຫວັງວ່າ,ການແລກປ່ຽນກັນຄັ້ງທຳອິດລະຫວ່າງປະມຸກລັດສອງປະເທດນັບແຕ່ 30 ກວ່າປີມານີ້ສາມາດຊຸກຍູ້ປະຫວັດອັນຫຍຸ້ງຍາກລຳບາກລະຫວ່າງສອງປະເທດຂະຫຍາຍໄປໜ້າ.
ທ່ານປະທານາທິບໍດີໂອບາມາເປີດເຜີຍໃຫ້ຮູ້ວ່າ, ໃນເວລາໂທລະສັບລົມກັນ, ທ່ານໄດ້ກ່າວຢ້ຳຫຼັກໝັ້ນທີ່ທ່ານບັນລະຍາຍໃນເວລາກ່າວຄຳປາໄສຢູ່ສະມັດຊາໃຫຍ່ສະຫະປະຊາຊາດ, ກໍຄື, ທ່ານເຊື່ອວ່າບັນຫານິວເຄຼຍອີຣານຈະໄດ້ຮັບການແກ້ໄຂຢ່າງຮອບດ້ານໃນທີ່ສຸດ.
ທ່ານປະທານາທິບໍດີໂອບາມາກ່າວວ່າ, ທ່ານສັ່ງໃຫ້ທ່ານຈອນ ເກຣີ ລັດຖະມົນຕີວ່າການກະຊວງການຕ່າງປະເທດສືບຕໍ່ຕິດຕໍ່ພົວພັນກັບລັດຖະບານອີຣານໂດຍທາງການທູດ, ສ່ວນທ່ານປະທານາທິບໍດີຣູຮານີກໍ່ໄດ້ສັ່ງໃຫ້ພາກສ່ວນທີ່ກ່ຽວຂ້ອງຂອງອີຣານສືບຕໍ່ຮ່ວມມືກັບ 5 ປະເທດສະມາຊິກຖາວອນຂອງສະພາຄວາມໝັ້ນຄົງສະຫະປະຊາຊາດ ແລະເຢັຍລະມັນ, ເພື່ອຊຸກຍູ້ຂະບວນການດັ່ງກ່າວ.
ສື່ມວນຊົນອາເມລິກາໄດ້ເຈາະຈົງລາຍງານຂ່າວດັ່ງກ່າວໂດຍກ່າວວ່ານີ້ແມ່ນ "ການບຸກທະລຸປະຫວັດສາດ", ແມ່ນ "ໄຊຊະນະຂອງນະໂຍບາຍການຕ່າງປະເທດໂອບາມາ". ອີກດ້ານໜຶ່ງ,ຍັງມີສຽງສົງໄສຢູ່.
