ເຂດການຄ້າເສລີຊຽງໄຮຈະສະໜອງບົດຮຽນທີ່ຜົນດີສຳລັບຈີນຍົກລະດັບການປະຕິຮູບແລະໄຂປະຕູສູ່ພາຍນອກ
ເຂດການຄ້າເສລີຊຽງໄຮໄດ້ເປີດບໍລິການຢ່າງເປັນທາງການໃນວັນທີ 29 ກັນຍາຜ່ານມານີ້. ບຸກຄົນຝ່າຍຕ່າງໆລ້ວນແຕ່ເຫັນວ່າ, ການຜ່ອນຄາຍເງື່ອນໄຂຂໍ ອະນຸມັດເຂົ້າຕະຫຼາດ,ແລະການເປີດກວ້າງການໄຂປະຕູສູ່ພາຍນອກ ແມ່ນຂໍ້ຄວາມສຳຄັນທີ່ສຸດຂອງເຂດການຄ້າເສລີຊຽງໄຮໂດຍບໍ່ຕ້ອງສົງໃສ. ສ່ວນເຂດການຄ້າເສລີຈະຄົ້ນຄວ້າຮູບແບບໃໝ່ຂອງການປະຕິຮູບ ໄຂປະຕູສູ່ພາຍນອກແລະການພັດທະນາຂອງຈີນໃນອະນາຄົດຈາກຫຼາຍດ້ານເຊັ່ນລະບຽບການ, ການປະດິດສ້າງດ້ານການເງິນແລະອື່ນໆ.
ແຜນແມ່ບົດການພັດທະນາເຂດການຄ້າເສລີຊຽງໄຮລະບຸວ່າ, ພາຍໃຕ້ເງື່ອນໄຂເບື້ອງຕົ້ນທີ່ສາມາດຄວບຄຸມຄວາມສ່ຽງນັ້ນ, ສາມາດສ້າງເງື່ອນໄຂໃຫ້ທົດລອງປະຕິບັດກ່ອນໃນວຽກງານດ້ານຕ່າງໆຢູ່ເຂດທົດລອງເປັນຕົ້ນແມ່ນການແລກປ່ຽນເງິນຢວນຈີນພາຍໃຕ້ໂຄງການເງິນທຶນ, ອັດຕາດອກເບັ້ຍຕະຫຼາດການເງິນເກີດຂຶ້ນຕາມກົດເກນຕະຫຼາດ,ການນຳໃຊ້ເງິນຢວນຈີນຂ້າມຊາດແລະອື່ນໆ. ນອກນີ້, ຈະຊຸກຍູ້ຂະແໜງການບໍລິການດ້ານການເງິນເປີດປະຕູຢ່າງຮອບດ້ານຕໍ່ທຶນເອກະຊົນແລະສະຖາບັນການເງິນຕ່າງປະເທດທີ່ໄດ້ມາດຕະຖານ, ສະໜັບສະໜູນການສ້າງຕັ້ງທະນາຄານ ຕ່າງປະເທດແລະທະນາຄານຮ່ວມທຶນຈີນແລະຕ່າງປະເທດຢູ່ເຂດທົດລອງ.
ການປະດິດສ້າງດ້ານລະບຽບການຂອງເຂດການຄ້າເສລີຊຽງໄຮກໍ່ແມ່ນຈຸດສຸມຈຸດໜຶ່ງທີ່ຜູ້ຄົນເອົາໃຈໃສ່. ໃນນັ້ນ, ລະບຽບການຂໍ້ໜຶ່ງກໍ່ແມ່ນອີງຕາມຫຼັກມາດຕະຖານທີ່ໃຊ້ໂດຍທົ່ວໄປໃນສາກົນ, ປະຕິບັດການຄຸ້ມຄອງການລົງທຶນຂອງນັກທຸລະກິດຕ່າງປະເທດໃນຮູບແບບທີ່ປະຕິບັດຕໍ່ເທົ່າກັບພົນລະເມືອງຈີນກ່ອນອະນຸມັດເຂົ້າຕະຫຼາດແລະກຳນົດບັນຊີລາຍຊື່ຂົງເຂດຫ້າມບໍ່ໃຫ້ລົງທຶນ. ການປະຕິບັດຕໍ່ເທົ່າກັບພົນລະເມືອງຈີນໝາຍຄວາມວ່າໃຫ້ການປະຕິບັດຕໍ່ນັກລົງທຶນພ້ອມດ້ວຍການລົງທຶນຈາກຕ່າງປະເທດທີ່ບໍ່ຕ່ຳກວ່າລະດັບການປະຕິບັດຕໍ່ນັກລົງທຶນພ້ອມດ້ວຍການລົງທຶນຂອງປະເທດຕົນພາຍໃຕ້ສະພາບການທີ່ຄ້າຍຄືກັນ. ຄຳວ່າ "ການປະຕິບັດຕໍ່ ເທົ່າກັບພົນລະເມືອງກ່ອນອະນຸມັດເຂົ້າຕະຫຼາດ" ໝາຍຄວາມວ່າ, ແກ່ຍາວເວລາການໃຫ້ການປະຕິບັດຕໍ່ເທົ່າກັບພົນລະເມືອງໄປເຖິງໄລຍະກ່ອນການລົງທຶນເກີດຂຶ້ນຢ່າງແທ້ຈິງ. ສ່ວນຄຳວ່າ ບັນຊີລາຍຊື່ຂົງເຂດຫ້າມບໍ່ໃຫ້ລົງທຶນ , ຄວາມຈິງແລ້ວ ເປັນການກຳນົດບັນຊີດຳສະເພາະຂົງເຂດການລົງທຶນ, ນອກຈາກຂົງເຂດທີ່ກຳນົດໄວ້ໃນບັນຊີສະບັບນີ້ແລ້ວ, ຂໍແຕ່ເປັນຂົງເຂດທີ່ກົດໝາຍບໍ່ໄດ້ເກືອດຫ້າມ,ນັກລົງທຶນກໍ່ສາມາດລົງທຶນໄດ້.
ນອກນີ້, ເຂດການຄ້າເສລີຊຽງໄຮ ຍັງໄດ້ຄັດເລືອກ 6 ຂົງເຂດໃຫຍ່ຄື ການບໍລິການດ້ານການເງິນ, ການບໍລິການດ້ານການຂົນສົ່ງທາງນ້ຳ, ການບໍລິການດ້ານການຄ້າ, ການບໍລິການຕາມຂະແໜງການ, ການບໍລິການດ້ານວັດທະນະທຳແລະການບໍລິການທາງສັງຄົມ, ເພື່ອປະຕິບັດມາດຕະການໄຂປະຕູສູ່ພາຍນອກ ຈຳນວນ 32 ມາດຕາ, ຢຸດເຊົາຫຼືຍົກເລີກມາດຕະການຈຳກັດການອະນຸມັດເຂົ້າຕະຫຼາດ, ສ້າງສະພາບແວດລ້ອມທີ່ອະນຸມັດໃຫ້ນັກລົງທຶນປະເພດຕ່າງໆສາມາດເຂົ້າຕະຫຼາດໄດ້ຢ່າງສະເໝີພາບ.
