ສະຖານທູດຈີນປະຈຳອິນໂດເນເຊຍແລະສະຖານທູດຈີນປະຈຳອາຊຽນຈັດງານລ້ຽງສະຫຼອງວັນຊາດຈີນຄົບຮອບ 64 ປີ
ຕອນຄ່ຳວັນທີ 25 ກັນຍາຜ່ານມານີ້, ສະຖານທູດຈີນປະຈຳອິນໂດເນເຊຍແລະສະຖານທູດຈີນປະຈຳອາຊຽນໄດ້ຮ່ວມກັນຈັດງານລ້ຽງສະຫຼອງວັນຊາດສປ ຈີນຄົບຮອບ 64 ປີ ແລະພິທີເປີດງານວາງສະແດງສິລະປະຮູບແຕ້ມແລະການຂຽນງາມຍຸກປະຈຸບັນຂອງຈີນຢູ່ນະຄອນຫຼວງຈາກາກຕາຂອງອິນໂດເນເຊຍ. ທ່ານບາຮາຣຸດດິນ ຈູຊຸຟ ຮາບີບີ ອະດີປະທານາທິບໍດີອິນໂດເນເຊຍ, ທ່ານນາງ ມາຣີ ອັນຄາ ປານເກັສທູ ລັດຖະມົນຕີວ່າການກະຊວງການທ່ອງທ່ຽວແລະເສດຖະກິດປະດິດສ້າງອິນໂດເນເຊຍ, ທ່ານອາເມຍ ລັດຖະມົນຕີວ່າການກະຊວງຕຸລາການແລະສິດທິມະນຸດອິນໂດເນເຊຍ,ພ້ອມດ້ວຍຜູ້ທີ່ໄດ້ປະກອບສ່ວນສ້າງໄມຕີຈິດຂອງວົງການຕ່າງໆ, ບັນດາທູດຕານຸທູດປະເທດຕ່າງໆ, ຜູ້ຕາງໜ້າບໍລິສັດຈີນ, ນັກສຶກສາຈີນແລະຄູອາຈານອາສາສະໝັກຈີນທີ່ຢູ່ອິນໂດເນເຊຍລວມທັງໝົດ 1000ກວ່າຄົນໄດ້ເຂົ້າຮ່ວມງານ.
ກ່ອນອື່ນ, ທ່ານຫຼິວຈ້ຽນຊາວ ເອກອັກຄະລັດຖະທູດຈີນປະຈຳອິນໂດເນເຊຍໄດ້ກ່າວຄຳປາໄສໃນງານລ້ຽງ. ທ່ານກ່າວວ່າ, ປີນີ້ແມ່ນປີທີ່ຈີນແລະອາຊຽນສ້າງສາຍພົວພັນຄູ່ຮ່ວມມືຍຸດທະສາດຄົບຮອບ 10ປີ, ການລົງເລິກການພົວພັນລະຫວ່າງຈີນກັບອາຊຽນແມ່ນທາງເລືອກດ້ານຍຸດທະສາດຂອງຈີນໃນໄລຍະຍາວແລະເປັນທິດບູລິມະສິດໃນວຽກງານການຕ່າງປະເທດຕໍ່ປະເທດອ້ອມຂ້າງຂອງຈີນ. ຈີນຍ້ອງຍໍອິນໂດເນເຊຍທີ່ໄດ້ເສີມຂະຫຍາຍບົດບາດທີ່ສຳຄັນໃນການຊຸກຍູ້ອາຊຽນຮ່ວມມືກັບຈີນ, ແລະຈີນຈະສືບຕໍ່ຍຶດໝັ້ນປະຕິບັດນະໂຍບາຍໄມຕີຈິດມິດຕະພາບຖານບ້ານໃກ້ເຮືອນຄຽງທີ່ມີໄມຕີຈິດມິດຕະພາບກັບປະເທດໃກ້ຄຽງແລະຖືປະເທດໃກ້ຄຽງເປັນໝູ່ຄູ່, ຮ່ວມກັບປະເທດຕ່າງໆໃນອາຊຽນລົງເລິກການຮ່ວມມືໃນຂົງເຂດຕ່າງໆ, ເປີດທົດສະວັດເພັດພອຍແຫ່ງການພົວພັນລະຫວ່າງຈີນກັບອາຊຽນ.
ທ່ານນາງ ມາຣີ ອັນຄາ ປານເກັສທູ ລັດຖະມົນຕີວ່າການກະຊວງການທ່ອງທ່ຽວແລະເສດຖະກິດປະດິດສ້າງອິນໂດເນເຊຍໄດ້ຕາງໜ້າລັດຖະບານອິນໂດເນເຊຍອວຍພອນວັນຊາດສປ ຈີນຄົບຮອບ 64ປີ, ຕີລາຄາສູງຕໍ່ຜົນສຳເລດອັນຍິ່ງໃຫຍ່ຂອງຈີນໃນການກໍ່ສ້າງປະເທດຊາດ, ນາງເຊື່ອໝັ້ນແລະອວຍພອນຄວາມໄຝ່ຝັນຈີນຈະປະກົດຜົນເປັນຈິງໂດຍໄວ. ນາງກ່າວວ່າ, ນັບແຕ່ອິນໂດເນເຊຍແລະຈີນສ້າງສາຍພົວພັນຄູ່ຮ່ວມມືຍຸດທະສາດໃນປີ2005ເປັນຕົ້ນມາ, ການຮ່ວມມືລະຫວ່າງສອງປະເທດໃນຂົງເຂດຕ່າງໆເປັນຕົ້ນແມ່ນເສດຖະກິດການຄ້າໄດ້ກ້າວສູ່ລວງເລິກຢ່າງບໍ່ຢຸດຢັ້ງ. ອິນໂດເນເຊຍຍິນດີຕ້ອນຮັບທ່ານປະທານສີຈິ້ນຜິງທີ່ຈະເດີນທາງມາຢ້ຽມຢາມອິນໂດເນເຊຍທາງລັດຖະກິດ, ແລະຫວັງຢາກຖືກການຢ້ຽມຢາມໃນຄັ້ງນີ້ເປັນໂອກາດທີ່ດີເພື່ອຊຸກຍູ້ສາຍພົວພັນຄູ່ຮ່ວມມືຍຸດທະສາດລະຫວ່າງສອງປະເທດກ້າວໄປສູ່ລວງເລິກຫຼາຍກວ່າເກົ່າ,ກວ້າງຂວາງກວ່າເກົ່າແລະມີລະດັບສູງກວ່າເກົ່າຢ່າງບໍ່ຢຸດຢັ້ງ.
