ປະທານປະເທດຈີນພົບປະເຈລະຈາກັບປະທານາທິບໍດີອິນໂດເນເຊຍ
ວັນທີ 2 ຕຸລານີ້, ຢູ່ນະຄອນຫຼວງຈາກາກຕາຂອງອິນໂດເນເຊຍ, ທ່ານສີຈິ້ນຜິງ ປະທານປະເທດຈີນໄດ້ພົບປະເຈລະຈາກັບທ່ານຊູຊີໂລ ບຳບັງ ໂຢໂດໂຢໂນ ປະທານາທິບໍດີອິນໂດເນເຊຍ. ສອງຝ່າຍໄດ້ຕົກລົງຮ່ວມກັນຍົກລະດັບການພົວພັນລະຫວ່າງຈີນ-ອິນໂດເນເຊຍໃຫ້ຂຶ້ນເປັນການພົວພັນຄູ່ຮ່ວມມືຍຸດທະສາດຮອບດ້ານ.ທ່ານສີຈິ້ນຜິງກ່າວວ່າ,"ຈີນແລະອິນໂດເນເຊຍລ້ວນແຕ່ເປັນປະເທດໃຫຍ່ທີ່ພວມພັດທະນາທີ່ມີບົດບາດໃນພາກພື້ນຕົນກໍ່ຄືໃນໂລກ. ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນກັບອິນໂດເນເຊຍບໍ່ພຽງແຕ່ສ່ອງແສງໃຫ້ເຫັນຢູ່ໃນລະດັບສອງຝ່າຍເທົ່ານັ້ນ, ແລະຍັງໄດ້ສ່ອງແສງໃຫ້ເຫັນຢູ່ໃນລະດັບພາກພື້ນແລະສາກົນອີກດ້ວຍ. ຂ້າພະເຈົ້າສະເໜີຂໍ້ລິເລີ່ມຕ່າງໆຕໍ່ທ່ານຊູຊີໂລເຊັ່ນ,ຈີນແລະອາຊຽນຄົ້ນຄວ້າແລະປຶກສາຫາລືການເຊັນສົນທິສັນຍາການຮ່ວມມືຢ່າງມີໄມຕີຈິດມິດຕະພາບຖານບ້ານໃກ້ເຮືອນຄຽງ,ຍົກສູງລະດັບເຂດການຄ້າເສລີຈີນ-ອາຊຽນແລະອື່ນໆ,ຊຶ່ງຂໍ້ລິເລີ່ມເຫຼົ່ານີ້ໄດ້ຮັບຄວາມເຫັນດີເຫັນພ້ອມຈາກທ່ານປະທານາທິບໍດີຊູຊີໂລ. "
ໃນການພົບປະເຈລະຈາ, ທ່ານປະທານສີຈິ້ນຜິງຍັງໄດ້ປະກາດວ່າ, ເພື່ອຊຸກຍູ້ການກໍ່ສ້າງແບບເຊື່ອມຈອດກັນແລະຂະບວນການເຊື່ອມໂຍງເຂົ້າກັນໃນດ້ານເສດຖະກິດຂອງພາກພື້ນແຫ່ງນີ້, ຈີນລິເລີ່ມສ້າງຕັ້ງທະນາຄານການລົງທຶນພື້ນຖານໂຄງລ່າງອາຊີ.ທ່ານສີຈິ້ນຜິງກ່າວວ່າ,"ຈີນຍິນດີໃຫ້ການສະໜັບສະໜູນດ້ານເງິນທຶນແກ່ການກໍ່ສ້າງພື້ນຖານໂຄງລ່າງຂອງປະເທດພວມພັດທະນາໃນພາກພື້ນແຫ່ງນີ້ຊຶ່ງໃນນັ້ນລວມທັງປະເທດອາຊຽນ. ທະນາຄານການລົງທຶນພື້ນຖານໂຄງລ່າງອາຊີທີ່ສ້າງຕັ້ງໃໝ່ຈະຮ່າວມມືແບບຈຸດເຈືອນກັນກັບທະນາຄານພັດທະນາຫຼາຍຝ່າຍທີ່ມີຢູ່ໃນປະຈຸບັນຂອງທັງພາຍໃນອາຊີແລະນອກພາກພື້ນອາຊີ,ແລະຮ່ວມກັນຊຸກຍູ້ເສດຖະກິດອາຊີໃຫ້ພັດທະນາຢ່າງຕໍ່ເນື່ອງແລະໝັ້ນຄົງ."
