ທ່ານສີຈີ້ນພິງພົບປະທ່ານນາງປັກກິນເຮ ປະທານາທິບໍດີສ.ເກົາຫຼີ
ຕາມຂ່າວສານຊິນຮວາ: ວັນທີ7 ຕຸລານີ້, ທ່ານສີຈີ້ນພິງ ປະທານປະເທດຈີນໄດ້ພົບປະທ່ານນາງປັກກິນເຮ ປະທານາທິບໍດີສ.ເກົາຫຼີຢູ່ເກາະບາຫຼີຂອງອິນໂດເນເຊຍ.
ທ່ານສີຈີ້ນພິງກ່າວວ່າ, ປັດຈຸບັນ, ການພົວພັນລະຫວ່າງຈີນສ.ເກົາຫຼີຂະຫຍາຍຕົວເປັນຢ່າງດີ, ສອງຝ່າຍໄດ້ເປັນຄູ່ຮ່ວມມືສຳຄັນໃນຂົງເຂດຕ່າງໆ, ລ້ວນແຕ່ໄດ້ສ້າງຕັ້ງກົນໄກສົນທະນາເປັນປະຈຳ. ຝ່າຍຈີນຍິນດີພ້ອມກັບຝ່າຍສ.ເກົາຫຼີ, ສືບຕໍ່ເພີ່ມຄວາມເຂົ້າໃຈກັນ, ລົງເລິກຄວາມໄວ້ເນື້ອເຊື່ອໃຈກັນ, ເປີດກວ້າງຄວາມຮັບຮູ້ຄືກັນ, ພັດທະນາການຮ່ວມມືບົນຈິດໃຈທີ່ເຄົາລົບເຊິ່ງກັນແລະກັນ, ມີຄວາມສະເໝີພາບຕໍ່ກັນແລະຕ່າງຝ່າຍຕ່າງມີຜົນປະໂຫຍດ, ໂດຍຜ່ານສາຍຕາອັນຍາວໄກກວ່າເກົ່າແລະທ່ວງທ່າອັນບຸກບືນກວ່າເກົ່າ, ສ້າງຄວາມສຸກແກ່ປະຊາຊົນສອງປະເທດໃຫ້ດີກວ່າເກົ່າ, ປະກອບສ່ວນເຂົ້າໃນການຊຸກຍູ້ສັນຕິພາບແລະການພັດທະນາຂອງພາກພື້ນ.
ປະມຸກລັດສອງປະເທດຍັງໄດ້ແລກປ່ຽນຄວາມເຫັນກ່ຽວກັບສະຖານະການຂອງແຫຼມເກົາຫຼີ. ທ່ານສີຈີ້ນພິງຊີ້ອອກວ່າ, ຝ່າຍຈີນຈະສືບຕໍ່ເດັດດ່ຽວສະໜັບສະໜູນສປປເກົາຫຼີແລະສ.ເກົາຫຼີປົວແປງການພົວພັນໃຫ້ດີຂຶ້ນ, ຍຶດໝັ້ນບັນລຸແຫຼມເກົາຫຼີປອດອາວຸດນິວເຄຼຍ, ຍຶດໝັ້ນຮັກສາສັນຕິພາບແລະສະຖຽນລະພາບຂອງແຫຼມເກົາຫຼີ, ຍຶດໝັ້ນແກ້ໄຂບັນຫາໂດຍຜ່ານການສົນທະນາແລະເປິກສາຫາລື. ຫວັງໃຫ້ຝ່າຍຕ່າງໆທີ່ກ່ຽວຂ້ອງກ້າວໄປສູ່ທິດດຽວກັນ, ເລີ່ມຈັດການເຈລະຈາ 6 ຝ່າຍຄືນໃໝ່ໂດຍໄວ. ຝ່າຍຈີນຍິນດີຮັກສາການແລກປ່ຽນຄຳເຫັນກັນ, ການປະສານງານແລະການຮ່ວມມືກັບຝ່າຍສ.ເກົາຫຼີ.
ທ່ານນາງປັກກິນເຮຂອບໃຈຕໍ່ນຳຝ່າຍຈີນທີ່ເສີມຂະຫຍາຍບົດບາດທີ່ມີລັກສະນະສ້າງສັນໃນການຊຸກຍູ້ເກົາຫຼີເໜືອເກົາຫຼີໃຕ້ ປົວແປງການພົວພັນໃຫ້ດີຂຶ້ນແລະແຫຼມເກົາຫຼີປອດນິວເຄຼຍ, ກ່າວວ່າຝ່າຍສ.ເກົາຫຼີຍິນດີເພີ່ມທະວີການແລກປ່ຽນຄວາມເຫັນແລະການປະສານງານກັບຝ່າຍຈີນ.
