ກະຊວງການຕ່າງປະເທດຈີນກ່າວວ່າ, ຖ້າຫາກຍີ່ປຸ່ນກໍ່ເລື່ອງລາວໃນບັນຫາຫໍໄຫວ້ຢ່າຊູຄູນິ,ຈະເກີດມີຜົນສະທ້ອນອັນໜັກໜ່ວງ
(GMT+08:00) 2013-10-10 16:43:31 cri
ວັນທີ 7 ຕຸລານີ້, ທ່ານອິຊາໂອ ລິຈິມາ ທີ່ປຶກສາຄະນະລັດຖະບານຍີ່ປຸ່ນກ່າວວ່າ, ທ່ານຈະຊຸກຍູ້ໃຫ້ທ່ານຊິນໂຈ ອາເບະ ນາຍົກລັດຖະມົນຕີຍີ່ປຸ່ນໄປເຄົາລົບຫໍໄຫວ້ຢາຊູຄູນິໃນໄລຍະຈັດພິທີໄຫວ້ໃນລະດູໃບໄມ້ຫຼົ່ນຂອງຫໍໄຫວ້ຢາຊູຄູນິໃນເດືອນຕຸລານີ້. ທ່ານອິຊາໂອ ລິຈິມາຍັງກ່າວຕື່ມອີກວ່າ, ຈີນບໍ່ໄດ້ເວົ້າມາຈັກເທື່ອວ່າບໍ່ອະນຸຍາດໃຫ້ນາຍົກລັດຖະມົນຕີຍີ່ປຸ່ນໄປເຄົາລົບຫໍໄຫວ້ຢາຊູຄູນິ, ເຖິງວ່າທ່ານຊິນໂຈອາເບະຈະໄປເຄົາລົບຫໍໄຫວ້ໃນເດືອນຕຸລານີ້ກໍ່ຕາມ, ຜູ້ນຳຈີນຍີ່ປຸ່ນກໍ່ຈະສາມາດບັນລຸການພົບປະກັນໄດ້ໃນອະນາຄົດໃກ້ໆນີ້.
ກ່ຽວກັບເລື່ອງນີ້, ທ່ານນາງຮວາຊຸນຢິງ ໂຄສົກກະຊວງການຕ່າງປະເທດຈີນກ່າວໃນວັນທີ 9 ຕຸລານີ້ວ່າ, ຖ້າຫາກຍີ່ປຸ່ນກໍ່ເລື່ອງລາວເທື່ອໃໝ່ໃນບັນຫາຫໍໄຫວ້ຢາຊູຄູນິ, ມັນຍ່ອມຈະພາໃຫ້ເກີດມີຜົນສະທ້ອນອັນໜັກໜ່ວງກວ່າເກົ່າຢ່າງແນ່ນອນ.ທ່ານນາງຮວາຊຸນຢິງກ່າວວ່າ, ຈີນໄດ້ກ່າວຢ່າງຈະແຈ້ງມາຫຼາຍເທື່ອແລ້ວ, ບໍ່ວ່າຜູ້ນຳຍີ່ປຸ່ນໄປເຄົາລົບຫໍໄຫວ້ຢາຊູຄູນິໃນເວລາໃດ,ດ້ວຍຮູບການໃດແລະໃນຖານະແນວໃດກໍ່ຕາມ, ຝ່າຍຈີນລ້ວນແຕ່ຄັດຄ້ານຢ່າງເດັດດ່ຽວ. ນາງກ່າວວ່າ, ການພົວພັນລະຫວ່າງຈີນກັບຍີ່ປຸ່ນໃນປະຈຸບັນກຳລັງປະເຊີນໜ້າກັບຄວາມຫຍຸ້ງຍາກອັນໜັກໜ່ວງ, ຖ້າວ່າຍີ່ປຸ່ນກໍ່ເລື່ອງລາວເທື່ອໃໝ່ໃນບັນຫາຫໍໄຫວ້ຢາຊູຄູນິ, ມັນຍ່ອມຈະເຮັດໃຫ້ມີຜົນສະທ້ອນອັນໜັກໜ່ວງກວ່າເກົ່າເກີດຂຶ້ນຢ່າງແນ່ນອນ.ກ່ຽວກັບເລື່ອງນີ້,ຝ່າຍຍີ່ປຸ່ນຄວນມີຄວາມຮັບຮູ້ຢ່າງຈະແຈ້ງ. ຫວັງວ່າຍີ່ປຸ່ນຢ່າວິນິໄສສະຖານະການຢ່າງຜິດພາດ, ດຶງດູດຫາງສຽງໄປໃນທາງທີ່ບໍ່ຖືກຕ້ອງ, ແລະກະທຳຜິດຊ້ຳແລ້ວຊ້ຳອີກ.