ໄທຈະປະຕິບັດພະລາຊະບັນຍັດຄວາມໝັ້ນຄົງພາຍໃນປະເທດຢູ່ບາງເຂດຂອງນະຄອນຫຼວງບາງກອກ
(GMT+08:00) 2013-10-10 16:57:40 cri
ວັນທີ 9 ຕຸລານີ້, ທ່ານປະຊາ ພົມນອກ ຮອງນາຍົກລັດຖະມົນຕີໄທໄດ້ປະກາດຈະປະຕິບັດພະລາຊະບັນຍັດຄວາມໝັ້ນຄົງພາຍໃນປະເທດຢູ່ 3 ເຂດຂອງນະຄອນຫຼວງບາງກອກຄືເຂດດູສິດ, ເຂດພະນະຄອນແລະເຂດປ້ອມປາບສັດຕູຜ່າຍແຕ່ວັນທີ 9 ຫາວັນທີ 18 ຕຸລານີ້, ເພື່ອຮັບມືກັບການໂຮມຊຸມນຸມປະທ້ວງຕໍ່ຕ້ານລັດຖະບານທີ່ອາດຈະຈັດຂຶ້ນໃນໄລຍະດັ່ງກ່າວນີ້. ທ່ານປະຊາ ພົມນອກໄດ້ຮຽກໄຂກອງປະຊຸມສຸກເສີນຂອງສະມາຊິກຄະນະລັດຖະບານທີ່ຮັບຜິດຊອບວຽກງານຄວາມໝັ້ນຄົງໃນວັນທີ 9 ຕຸລານີ້. ກອງປະຊຸມຕົກລົງປະຕິບັດພະລາຊະບັນຍັດຄວາມໝັ້ນຄົງພາຍໃນປະເທດຢູ່ 3 ເຂດຂອງນະຄອນຫຼວງບາງກອກເລີ່ມແຕ່ວັນທີ 9 ຕຸລານີ້ເປັນຕົ້ນໄປ, ປິດ ຖະໜົນຂອງເຂດໃກ້ຄຽງທຳນຽບລັດຖະບານແລະຫໍລັດຖະສະພາພ້ອມດ້ວຍ ຖະໜົນທີ່ຢູ່ບໍລິເວນໃກ້ຄຽງ.
ເນື່ອງຈາກວ່າ ບໍ່ພໍໃຈນຳຮ່າງຍັດຕິກົດໝາຍວ່າດ້ວຍການນີລະໂທດກຳສະບັບໜຶ່ງທີ່ໄດ້ຜ່ານການຮັບຮອງຢູ່ລັດຖະສະພາຂອງໄທໃນເດືອນສິງຫາຜ່ານມານີ້, ກອງທັບປະຊາຊົນເພື່ອໂຄ່ນລົ້ມອຳນາດການປົກຄອງທັກສິນ ຊຶ່ງເປັນກຸ່ມຕໍ່ຕ້ານລັດຖະບານ ໄດ້ຈັດງານໂຮມຊຸມນຸມປະທ້ວງຢ່າງຕໍ່ເນື່ອງ ຢູ່ສວນລຸມພີນີ ທີ່ຢູ່ໃຈກາງນະຄອນຫຼວງບາງກອກ, ເລີ່ມແຕ່ວັນທີ 8 ຕຸລານີ້ເປັນຕົ້ນມາ, ກຸ່ມຕໍ່ຕ້ານລັດຖະບານປ່ຽນສະຖານທີ່ໂຮມຊຸມນຸມໄປຈັດຢູ່ຕໍ່ໜ້າທຳນຽບລັດຖະບານ, ບຸກຄົນຕໍ່ຕ້ານລັດຖະບານຈຳນວນຫຼາຍຮ້ອຍຄົນໄດ້ເຂົ້າຮ່ວມງານໂຮມຊຸມນຸມດັ່ງກ່າວນີ້.