ທ່ານຫຼີເຄີ້ສຽງ ນາຍົກລັດຖະມົນຕີຈີນສະເໜີຂອບການຮ່ວມມື 2+7 ລະຫວ່າງຈີນ-ອາຊຽນ
(GMT+08:00) 2013-10-10 15:49:11 cri
ວັນທີ 9 ຕຸລານີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມສຸດຍອດຈີນ-ອາຊຽນຫຼື 10+1 ຄັ້ງທີ 16 ຢູ່ນະຄອນຫຼວງບັນດາເສຣີເບກາວັນຂອງບຼູໄນແລະກ່າວຄຳປາໄສໂດຍໄດ້ບັນລະຍາຍຄວາມຮັບຮູ້ທີ່ເປັນເອກະສັນກັນທາງການເມືອງ 2 ຂໍ້ແລະຄວາມຄິດກ່ຽວກັບການຮ່ວມມືໃນ 7 ຂົງເຂດທີ່ຝ່າຍຈີນສະເໜີ, ເວົ້າໂດຍສັງເຂບແລ້ວແມ່ນ"ຂອບການຮ່ວມມື 2+7", ນີ້ແມ່ນການສະແດງໃຫ້ເຫັນເຖິງນະໂຍບາຍຂອງລັດຖະບານຈີນຊຸດໃໝ່ໃນການຂະຫຍາຍການພົວພັນລະຫວ່າງຈີນ-ອາຊຽນໃນອະນາຄົດ.
ຄວາມຮັບຮູ້ທີ່ເປັນເອກະສັນກັນທາງການເມືອງ 2 ຂໍ້ແມ່ນ: ໜຶ່ງ, ຈຸດພື້ນຖານໃນການຊຸກຍູ້ການຮ່ວມມືແມ່ນລົງເລິກຄວາມໄວ້ເນື້ອເຊື່ອໃຈກັນທາງການເມືອງ, ຂະຫຍາຍການພົວພັນແບບໄມຕີຈິດມິດຕະພາບຖານເພື່ອນບ້ານໃກ້ຄຽງທີ່ດີຕໍ່ກັນ. ສອງ, ຈຸດສຳຄັນຂອງການລົງເລິກການຮ່ວມມືແມ່ນສຸມໃສ່ການພັດທະນາເສດຖະກິດ, ເປີດກວ້າງຜົນປະໂຫຍດຮ່ວມໃຫ້ຕ່າງຝ່າຍຕ່າງໄດ້ຮັບຜົນປະໂຫຍດ.
ຄວາມຄິດກ່ຽວກັບການຮ່ວມມືໃນ 7 ຂົງເຂດແມ່ນ, ໜຶ່ງ, ຕັ້ງໜ້າຄົ້ນຄວ້າປຶກສາຫາລືການເຊັນສົນທິສັນຍາວ່າດ້ວຍໄມຕີຈິດມິດຕະພາບຖານເພື່ອນບ້ານໃກ້ຄຽງທີ່ດີຕໍ່ກັນແລະການຮ່ວມມືລະຫວ່າງຈີນ-ອາຊຽນ. ສອງ, ເລີ່ມຕົ້ນດຳເນີນການເຈລະຈາກ່ຽວກັບການຍົກລະດັບຂອງເຂດການຄ້າເສລີຈີນ-ອາຊຽນ. ສາມ, ເລັ່ງລັດການສ້າງພື້ນຖານໂຄງລ່າງທີ່ເຊື່ອມຈອດກັນ. ສີ່, ເພີ່ມທະວີການຮ່ວມມືດ້ານການເງິນແລະການປ້ອງກັນຄວາມສ່ຽງໃນພາກພື້ນ. ຫ້າ, ຊຸກຍູ້ການຮ່ວມມືທາງທະເລຢ່າງໝັ້ນທ່ຽງ. ຫົກ, ເພີ່ມທະວີການແລກປ່ຽນແລະການຮ່ວມມືໃນຂົງເຂດຄວາມໝັ້ນຄົງ. ເຈັດ, ຮັດແໜ້ນການແລກປ່ຽນໃນດ້ານວັດທະນຳສັງຄົມ, ວິດທະຍາສາດເຕັກໂນໂລຊີ,ການອະນຸລັກສິ່ງແວດລ້ອມແລະອື່ນໆ.
ທ່ານຫຼີເຄີ້ສຽງກ່າວວ່າ, ຈຸດປະສົງຂອງຂອບການຮ່ວມມື 7+2 ແມ່ນເພື່ອເພີ່ມທະວີຄວາມໄວ້ເນື້ອເຊື່ອໃຈກັນທາງການເມືອງລະຫວ່າງຈີນ-ອາຊຽນ, ລົງເລິກການຮ່ວມມືຮອບດ້ານ, ບັນລຸການພັດທະນາແລະຄວາມຈະເລີນຮຸ່ງເຮືອງຮ່ວມກັນ, ຂຽນໜ້າໃໝ່ແຫ່ງການຮ່ວມມືຍຸດທະສາດລະຫວ່າງຈີນ-ອາຊຽນ, ຂະຫຍາຍການພົວພັນລະຫວ່າງຈີນ-ອາຊຽນບໍ່ພຽງແຕ່ສ້າງຄວາມສົມບູນພຸນສຸກໃຫ້ແກ່ປະຊາຊົນສອງຝ່າຍເທົ່ານັ້ນ, ຍັງຈະປະກອບສ່ວນອັນໃຫຍ່ຫຼວງກວ່າເກົ່າເຂົ້າໃນສັນຕິພາບ ສະຖຽນລະພາບແລະຄວາມຈະເລີນຮຸ່ງເຮືອງຂອງພາກພື້ນແຫ່ງນີ້ກໍ່ຄືຂອງໂລກ.