ຕາມຂ່າວ CRI: ຕອນບ່າຍວັນທີ 9 ຕຸລານີ້ ທ່ານຫຼີເຄີ້ຊຽງ ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມສຸດຍອດຈີນ-ອາຊຽນ(ຄື 10+1) ຄັ້ງທີ 16 ທີ່ໄຂຂຶ້ນຢູ່ນະຄອນຫຼວງບານດາເຊຣີເບກາວັນຂອງບຣູໄນ. ທ່ານຫຼີເຄີ້ຊຽງຮ່ວມກັບສົມເດັດຮາຈີ ຮາຊານານ ໂບນເກຍ, ຊູນດານຂອງບຣູໄນເປັນປະທານກອງປະຊຸມ, ຜູ້ນຳຂອງ 10 ປະເທດອາຊຽນລ້ວນແຕ່ໄດ້ເຂົ້າຮ່ວມກອງປະຊຸມ. ກອງປະຊຸມດັ່ງກ່າວໄດ້ປຶກສາຫາລືຢ່າງເລິກເຊິ່ງກ່ຽວກັບການລົງເລິກການພົວພັນລະຫວ່າງຈີນກັບອາຊຽນ, ສະເໜີຄວາມຄຶດກ່ຽວກັບຂອບຮ່ວມມື ແລະໄດ້ມີຄວາມຮັບຮູ້ຄືກັນຢ່າງກວ້າງຂວາງ.
ທ່ານຫຼີເຄີ້ຊຽງຊີ້ອອກວ່າ, ປັດຈຸບັນ ການພົວພັນລະຫວ່າງຈີນກັບອາຊຽນໄດ້ກ້າວເຂົ້າສູ່ໄລຍະພັດທະນາແລ້ວ, ການຮ່ວມມືໄດ້ເຂົ້າສູ່"ທາງດ່ວນ". ຈີນກັບອາຊຽນຄວນລົງເລິກຄວາມຮັບຮູ້ທີ່ຄືກັນໃນດ້ານການເມືອງ 2 ຂໍ້ຕື່ມອີກ,ຄື: ໜຶ່ງ, ພື້ນຖານຂອງການຊຸກຍູ້ການຮ່ວມມືແມ່ນລົງເລິກຄວາມໄວ້ເນື້ອເຊື່ອໃຈກັນດ້ານຍຸດທະສາດ, ແລະເປີດກວ້າງໄມຕີຈິດມິດຕະພາບຖານບ້ານໃກ້ເຮືອນຄຽງທີ່ດີຕໍ່ກັນ; ສອງ, ຂໍກະແຈຂອງການລົງເລິກການຮ່ວມມືແມ່ນສຸມໃສ່ການພັດທະນາເສດຖະກິດແລະເປີດກວ້າງຜົນປະໂຫຍດທີ່ທັງສອງຝ່າຍລ້ວນແຕ່ໄດ້ຮັບ. ສອງຝ່າຍຄວນກຳໂອກາດ, ຊຸກຍູ້ການຮ່ວມມືລະຫວ່າງຈີນກັບອາຊຽນໃນຫຼາຍຂົງເຂດນັບທັງລວງເລິກລວງກວ້າງແລະຮອບດ້ານ. ທ່ານຫຼີເຄີ້ຊຽງຍັງໄດ້ມີຂໍ້ສະເໜີຫຼາຍຂໍ້ກ່ຽວກັບໂຄງຮ່າງການຮ່ວມມືລະຫວ່າງຈີນກັບອາຊຽນໃນ 10 ປີຕໍ່ໜ້າ. ທ່ານກ່າວເນັ້ນວ່າ, ຈີນຍິນດີເພີ່ມທະວີຄວາມໄວ້ເນື້ອເຊື່ອໃຈກັນດ້ານຍຸດທະສາດ, ລົງເລິກການຮ່ວມມືຮອບດ້ານ, ບັນລຸການພັດທະນາພ້ອມກັນ, ແລະສືບຕໍ່ຂຽນໜ້າໃໝ່ແຫ່ງການພົວພັນລະຫວ່າງຈີນກັບອາຊຽນ.
ຜູ້ນຳຂອງປະເທດອາຊຽນໄດ້ຕີລາຄາໃນລະດັບສູງຕໍ່ປະເທດຈີນທີ່ຍຶດໝັ້ນ ນະໂຍບາຍໄມຕີຈິດມິດຕະພາບຕໍ່ປະເທດອ້ອມຂ້າງ, ຖືການພັດທະນາຂອງຕົນມາສ້າງຄວາມສຸກໃຫ້ແກ່ປະເທດອ້ອມຂ້າງ ແລະ ໄດ້ປະກອບສ່ວນອັນສຳຄັນເພື່ອຊຸກຍູ້ຄວາມຈະເລີນຮຸ່ງເຮືອງແລະສະຖຽນລະພາບຂອງພາກພື້ນແຫ່ງນີ້. ພວກເພິ່ນຍັງໄດ້ສະແດງຄວາມຍ້ອງຍໍຊົມເຊີຍໃນລະດັບສູງຕໍ່ຂໍ້ສະເໜີຂອງທ່ານຫຼີເຄີ້ຊຽງ, ແລະກ່າວວ່າ, ອາຊຽນໃຫ້ຄວາມສຳຄັນໃນລະດັບຍຸດທະສາດຕໍ່ການພັດທະນາການພົວພັນກັບຈີນ, ທະນຸຖະໜອມໝາກຜົນແຫ່ງການຮ່ວມມືກັບຈີນທີ່ໄດ້ຮັບໃນໄລຍະດົນນານມານີ້, ຍິນດີຮ່ວມກັບຈີນວາງແຜນການພັດທະນາການພົວພັນໃນອະນາຄົດ, ລົງເລິກການຮ່ວມມືທີ່ຕິດແທດຕົວຈິງໃນທຸກຂົງເຂດ ບົນພື້ນຖານນ້ຳໃຈທີ່ໄວ້ເນື້ອເຊື່ອໃຈກັນແລະຕ່າງຝ່າຍຕ່າງໄດ້ຮັບຜົນປະໂຫຍດ, ສ້າງເງື່ອນໄຂທີ່ມີຜົນດີເພື່ອການພັດທະນາການພົວພັນລະຫວ່າງອາຊຽນກັບຈີນໃນ 10 ປີຕໍ່ໜ້າ, ແລະເກາະແຂນກັນຕ້ອນຮັບອາຊີທີ່ສວຍງາມກວ່າເກົ່າ.