ນາຍົກລັດຖະມົນຕີຈີນຢ້ຽມຢາມໂຄງການOTOPຂອງໄທ
ຕອນເຊົ້າວັນທີ 13 ຕຸລານີ້, ທ່ານລີເຄີສຽງ ນາຍົກລັດຖະມົນຕີຈີນໄດ້ຢ້ຽມຢາມໂຄງການ "ໜຶ່ງຕາແສງໜຶ່ງຜະລິດຕະພັນ"ຫຼືOTOPຢູ່ຈັງຫວັດຊຽງໃໝ່ ພາຍໃຕ້ການເປັນເພື່ອນຮ່ວມທາງຂອງທ່ານນາງຍິ່ງລັກ ຊິນນະວັດ ນາຍົກລັດຖະມົນຕີໄທ.
ທ່ານນາຍົກລີເຄີສຽງໄດ້ສົນທະນາຢ່າງເປັນກັນເອງກັບຊາວຊຽງໃໝ່
ທ່ານລີເຄີສຽງໄດ້ຖາມສະພາບລະອຽດກ່ຽວກັບເອກະລັກສະເພາະຕົວຂອງປະເພດຜະລິດຕະພັນ, ຮູບການຜະລິດແລະການປຸງແຕ່ງ,ການບຸກເບີກຕະຫຼາດແລະອື່ນໆ, ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຫົວຄິດປະດິດສ້າງໃນການອອກແບບຜະລິດຕະພັນແລະຈຸດພິເສດດ້ານເຕັກນິກການຜະລິດ.
ທ່ານນາງຍິ່ງລັກ ຊິນນະວັດແຈ້ງໃຫ້ຊາບວ່າ, ໄທມີອົງການສະເພາະໃນການສຳຫຼວດຕະຫຼາດ, ຊອກຮູ້ຄວາມຕ້ອງການຂອງຕະຫຼາດ,ເພື່ອຊ່ວຍຊາວກະສິກອນເປີດກວ້າງຊ່ອງທາງການຈຳໜ່າຍ. ທ່ານລີເຄີສຽງກ່າວວ່າ, ຈີນກໍ່ກຳລັງເຜີຍແຜ່ໂຄງການທີ່ຄ້າຍຄືກັນນີ້ເຊັ່ນກັນ, ໂດຍຖືເອົາການທ່ອງທ່ຽວແລະການພັດທະນາຜະລິດຕະພັນເຄື່ອງຫັດຖະກຳທີ່ເຮັດດ້ວຍມືປະສົມປະສານເຂົ້າກັນ, ຈີນແລະໄທລ້ວນແຕ່ມີຜະລິດຕະພັນທີ່ມີເອກະລັກສະເພາະຕົວຂອງຕົນ, ຊຶ່ງມີຄວາມຈຸນເຈືອກັນຢ່າງຫຼວງຫຼາຍ, ສອງປະເທດຄວນເພີ່ມທະວີການຮ່ຳຮຽນແລະຖອດຖອນບົດຮຽນທີ່ດີເຊິ່ງກັນແລະກັນ,ສ້າງເວທີຫຼາຍກວ່າເກົ່າເພື່ອແລກປ່ຽນຜະລິດຕະພັນທີ່ມີເອກະລັກສະເພາະຕົວແລະຂະແໜງການທີ່ກ່ຽວຂ້ອງ, ບຸກເບີກຊ່ອງທາງທີ່ກວ້າງຂວາງກວ່າເກົ່າໃຫ້ແກ່ການຮ່ວມມືດ້ານເສດຖະກິດການຄ້າລະຫວ່າງສອງຝ່າຍ.
