ນາຍົກລັດຖະມົນຕີຈີນເຂົ້າຢ້ຽມຄຳນັບປະທານປະເທດຫວຽດນາມ
ຕອນເຊົ້າວັນທີ 14 ຕຸລານີ້,ຢູ່ນະຄອນຫຼວງຮ່າໂນ້ຍຂອງຫວຽດນາມ, ທ່ານຫຼີເຄີ້ສ໋ຽງ ນາຍົກລັດຖະມົນຕີຈີນໄດ້ເຂົ້າຢ້ຽມຄຳນັບທ່ານເຈືອງເຕິນຊາງ ປະທານປະເທດຫວຽດນາມ,ແລະເຂົ້າຮ່ວມງານລ້ຽງອາຫານທ່ຽງທີ່ທ່ານເຈືອງເຕິນຊາງຈັດຂຶ້ນຢ່າງສົມກຽດເພື່ອຕ້ອນຮັບທ່ານຫຼີເຄີ້ສ໋ຽງ. ທ່ານນາງຫງວຽນທິກິມງານ ກຳມະການກົມການເມືອງສູນກາງພັກຄອມມູນິດຫວຽດນາມ ຮອງປະທານສະພາແຫ່ງຊາດຫວຽດນາມກໍ່ໄດ້ເຂົ້າຮ່ວມງານລ້ຽງໃນຄັ້ງນີ້ເຊັ່ນກັນ.
ຕອນເຊົ້າວັນທີ 14 ຕຸລານີ້,ຢູ່ນະຄອນຫຼວງຮ່າໂນ້ຍຂອງຫວຽດນາມ, ທ່ານຫຼີເຄີ້ສ໋ຽງ ນາຍົກລັດຖະມົນຕີຈີນໄດ້ເຂົ້າຢ້ຽມຄຳນັບທ່ານເຈືອງເຕິນຊາງ ປະທານປະເທດຫວຽດນາມ
ທ່ານຫຼີເຄີ້ສ໋ຽງກ່າວວ່າ, ຈີນຫວຽດນາມມີມິດຕະພາບທີ່ມີມູນເຊື້ອຢ່າງເລິກເຊິ່ງ, ການພັດທະນາຂອງສອງປະເທດເປັນໂອກາດໃຫ້ແກ່ກັນ. ໃນໄລຍະຢ້ຽມຢາມໃນຄັ້ງນີ້, ຂ້າພະເຈົ້າກັບຜູ້ນຳຫວຽດນາມໄດ້ບັນລຸຄວາມຮັບຮູ້ທີ່ເປັນເອກະສັນກັນເທື່ອໃໝ່ກ່ຽວກັບການລົງເລິກການພົວພັນລະຫວ່າງຈີນກັບຫວຽດນາມ, ສອງປະເທດຍັງໄດ້ເຊັນເອກະສານແລະສັນຍາການຮ່ວມມືຫຼາຍສະບັບ. ຫວັງວ່າ,ສອງຝ່າຍຈະຖືສະພາບລວມເປັນບັນຫາຕັດສິນ,ພະຍາຍາມຮ່ວມກັນເພື່ອຈັດຕັ້ງປະຕິບັດຄວາມຮັບຮູ້ທີ່ເປັນເອກະສັນກັນເຫຼົ່ານີ້ໃຫ້ໄດ້ຮັບຜົນສຳເລັດ. ໂດຍສະເພາະແມ່ນຊຸກຍູ້ການຮ່ວມມືລະຫວ່າງສອງປະເທດໃນທາງທະເລ,ທາງບົກແລະທາງດ້ານການເງິນໄປພ້ອມໆກັນ,ຜ່ານຜ່າຄວາມຫຍຸ້ງຍາກ,ແກ້ໄຂຄວາມຂັດແຍ້ງຢ່າງເໝາະສົມ,ຊຸກຍູ້ໃຫ້ການຮ່ວມມືລະຫວ່າງສອງຝ່າຍໄດ້ຮັບຄວາມຄືບໜ້າຕົວຈິງ.
ທ່ານເຈືອງເຕິນຊາງໄດ້ສະແດງຄວາມຍິນດີຕ້ອນຮັບທ່ານຫຼີເຄີ້ສ໋ຽງທີ່ໄດ້ເດີນທາງຢ້ຽມຢາມຫວຽດນາມ. ທ່ານກ່າວວ່າ, ຫວຽດນາມແລະຈີນລ້ວນແຕ່ແມ່ນປະເທດສັງຄົມນິຍົມ. ຫວຽດນາມໃຫ້ຄວາມສຳຄັນເປັນຢ່າງຍິ່ງຕໍ່ການພົວພັນກັບຈີນ, ແລະຍິນດີຍົກລະດັບການຮ່ວມມືຍຸດທະສາດຮອບດ້ານລະຫວ່າງສອງປະເທດໃຫ້ສູງຂຶ້ນຕື່ມອີກ. ສອງຝ່າຍໄດ້ບັນລຸຄວາມຮັບຮູ້ທີ່ເປັນເອກະສັນກັນທີ່ສຳຄັນກ່ຽວກັບການຊຸກຍູ້ການຮ່ວມມືທາງທະເລ,ທາງບົກແລະທາງດ້ານການເງິນໄປພ້ອມໆກັນ, ຊຶ່ງເປັນແນວຄວາມຄິດທີ່ສຳຄັນແຫ່ງການຊຸກຍູ້ການຮ່ວມມືລະຫວ່າງສອງຝ່າຍໃນໄລຍະໃໝ່, ເຊື່ອວ່າ,ມັນຈະພາໃຫ້ການພົວພັນລະຫວ່າງຫວຽດນາມຈີນໄດ້ມີການພັດທະນາຂຶ້ນຫຼາຍກວ່າເກົ່າ.
