ໃນເວລາກ່າວຄຳປາໄສໃນງານລ້ຽງອາຫານທ່ຽງຂອງວົງການອຸດສາຫະກຳການຄ້າຈີນ-ຫວຽດນາມ ທ່ານຫຼີເຄີ້ສຽງໄດ້ເນັ້ນໜັກຫັນໂອກາດການຮ່ວມມືໃຫ້ເປັນຜົນຕົວຈິງ ສ້າງສະຖານະການໃໝ່ແຫ່ງການຮ່ວມມືທີ່ຕິດແທດຕົວຈິງລະຫວ່າງຈີນ-ຫວຽດນາມ
(GMT+08:00) 2013-10-16 16:13:41 cri
ວັນທີ 15 ຕຸລານີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນແລະ ທ່ານຫງວຽນເຕິນຢຸງ ນາຍົກລັດຖະມົນຕີຫວຽດນາມໄດ້ຮ່ວມກັນເຂົ້າຮ່ວມງານລ້ຽງອາຫານທ່ຽງຂອງວົງການອຸດສາຫະກຳການຄ້າຈີນ-ຫວຽດນາມຢູ່ນະຄອນຫຼວງຮ່າໂນ້ຍຂອງຫວຽດນາມ ແລະກ່າວຄຳປາໄສໃນງານ.
ທ່ານຫຼີເຄີ້ສຽງກ່າວວ່າ, ການຮ່ວມມືດ້ານເສດຖະກິດການຄ້າລະຫວ່າງຈີນ-ຫວຽດນາມໄດ້ພັດທະນາຢ່າງວ່ອງໄວ, ມີຄວາມບົ່ມຊ້ອນອັນໃຫຍ່ຫຼວງ. ຜົນປະໂຫຍດຮ່ວມລະຫວ່າງສອງປະເທດຫຼາຍກວ່າຄວາມຂັດແຍ່ງຢ່າງຫຼວງຫຼາຍ, ຄວນປະສົມປະສານຍຸດທະສາດດ້ານການພັດທະນາຂອງຕົນຢ່າງກົມກຽວກັນ, ຖືຕະຫຼາດເປັນທິດຊີ້ນຳ, ຖືວິສາຫະກິດເປັນຫຼັກ, ເສີມຂະຫຍາຍບົດບາດນຳພາຂອງລັດຖະບານ, ເລັ່ງລັດຊຸກຍູ້ການຮ່ວມມືດ້ານເສດຖະກິດການຄ້າ, ລວມທັງຮ່ວມກັນຊຸກຍູ້ການຮ່ວມມືຮອບດ້ານ, ຊຸກຍູ້ການຄ້າຢ່າງເສລີ, ຕັ້ງໜ້າເປີດກວ້າງການລົງທຶນເຊິ່ງກັນແລະກັນແລະລົງເລິກການຮ່ວມມືພາຍໃຕ້ຂອບອາຊຽນ.
ທ່ານຫຼີເຄີ້ສຽງຊີ້ອອກວ່າ, ຈີນ-ຫວຽດນາມຄວນທຳຄວາມພະຍາຍາມຮ່ວມກັນ, ຫັນໂອກາດການຮ່ວມມືໃຫ້ເປັນຜົນຕົວຈິງ. ຫວັງໃຫ້ນັກທຸລະກິດພະຍາຍາມຈົນສຸດຄວາມສາມາດຂອງຕົນເພື່ອສ້າງສະພາບການໃໝ່ແຫ່ງການຮ່ວມມືທີ່ຕິດແທດຕົວຈິງລະຫວ່າງຈີນ-ຫວຽດນາມ, ປະກອບສ່ວນອັນໃຫຍ່ຫຼວງກວ່າເກົ່າເຂົ້າໃນການພັດທະນາໃໝ່ແລະຄວາມກ້າວໜ້າໃໝ່ຂອງການຮ່ວມມືລະຫວ່າງສອງປະເທດ.
ທ່ານຫງວຽນເຕິນຢຸງກ່າວວ່າ, ການຮ່ວມມືດ້ານເສດຖະກິດການຄ້າແມ່ນເສົາຄ້ຳຫຼັກຂອງການພົວພັນໄມຕີຈິດມິດຕະພາບສອງປະເທດ, ສອງຝ່າຍລ້ວນແຕ່ເປັນໂອກາດຂອງການພັດທະນາຊຶ່ງກັນແລະກັນ. ຄວາມຮັບຮູ້ທີ່ເປັນເອກະສັນກັນທີ່ສອງປະເທດໄດ້ບັນລຸໃນການຢ້ຽມຢາມຄັ້ງນີ້, ໄດ້ສ້າງພື້ນຖານທີ່ສຳຄັນໃຫ້ແກ່ການຮ່ວມມືລະຫວ່າງສອງຝ່າຍໃນຂົງເຂດຕ່າງໆ. ຫວຽດນາມຍິນດີສະໜອງເງື່ອນໄຂທີ່ສະດວກສະບາຍໝົດທຸກຢ່າງໃຫ້ແກ່ວິສາກະກິດຈີນທີ່ໄປລົງທຶນຢູ່ຫວຽດນາມ, ເຮັດໃຫ້ມິດຕະພາບລະຫວ່າງຫວຽດນາມ-ຈີນນັບມື້ນັບແໜ້ນແຟ້ນຂຶ້ນຕື່ມໂດຍຜ່ານການຮ່ວມມື.
