ຍົນໂດຍສານຂອງບໍລິສັດການບິນລາວຕົກໃສ່ແມ່ນ້ຳຂອງ
(GMT+08:00) 2013-10-16 20:08:45 cri
ວິທະຍຸສາກົນແຫ່ງປະເທດຈີນລາຍງານວ່າ: ຕອນບ່າຍວັນທີ 16 ຕຸລານີ້, ຍົນໂດຍສານຂອງບໍລິສັດການບິນລາວລຳໜຶ່ງເມື່ອບິນຈາກນະຄອນຫຼວງວຽງຈັນໄປສູ່ເມືອງປາກເຊທີ່ພາກໃຕ້ຂອງລາວໄດ້ຕົກລົງໃນແມ່ນ້ຳຂອງ. ປັດຈຸບັນ, ທາງການລາວຍັງບໍ່ທັນປະກາດລາຍຊື່ຂອງຜູ້ໂດຍສານໃນຍົນ.
ມື້ດຽວກັນ, ບໍລິສັດການບິນລາວໄດ້ປະກາດແຈ້ງການກ່ຽວກັບຍົນໂດຍສານຕົກຢູ່ໃນແມ່ນ້ຳຂອງຄືດັ່ງນີ້:
ຍ້ອນຝົນຕົກໜັກແລະລົມແຮງ, ຍົນໂດຍສານ ATR72 ຖ້ຽວທີ່ Qv301 ຂອງບໍລິສັດການບິນລາວທີ່ບິນຈາກນະຄອນຫຼວງວຽງຈັນໃນເວລາ 14 ໂມງ 45 ນາທີຂອງວັນທີ 16 ຕຸລານີ້ຕາມເວລາທ້ອງຖີ່ນນັ້ນແລະຈະລົງຈອດຢູ່ສະໜາມບິນປາກເຊໃນເວລາ 15:55 ນາທີນັ້ນໄດ້ເກີດອຸບັດເຫດໃນເວລາລົງຈອດ, ແລ້ວຕົກລົງໃສ່ແມ່ນ້ຳຂອງ. ນັບມາຮອດປັດຈຸບັນ, ຍັງບໍ່ທັນມີການແຈ້ງກ່ຽວກັບຄົນທີ່ຍັງມີຊີວິດ.
ບໍລິສັດການບິນລາວໄດ້ຮ່ວມກັບພາກສ່ວນທີ່ກ່ຽວຂ້ອງສ້າງຕັ້ງໜ່ວຍງານສຳເພາະກິດເພືອດຳເນີນການສຳຫຼວດ, ຕັ້ງໜ້າຊອກຫາຜູ້ທີ່ເສຍຊີວິດ, ແລະຕິດຕໍ່ຫາຄອບຄົວຂອງຜູ້ກ່ຽວ. ສາເຫດທີ່ພາໃຫ້ເກີດເຫດຍັງພວມສຳຫຼວດຕໍ່ໄປ, ຄາດວ່າ ຜົນການສຳຫຼວດເບື້ອງຕົ້ນຈະປະກາດໃນຕອນແລງວັນທີ 17 ຕຸລານີ້.
ຂໍສະແດງຄວາມເສົ້າສະຫຼົດໃຈແລະໄວ້ອາໄລຢ່າງເລິກເຊິ່ງຕໍ່ຜູ້ທີ່ເສຍຊີວິດ, ແລະຫວັງວ່າພວກເຮົາຈະໄດ້ຊອກເຫັນຜູ້ຍັງມີຊີວິດຢູ່.
