ທ່ານຫຼີເຄີ້ຊຽງກ່າວຄຳປາໄສໃນພິທີໄຂກອງປະຊຸມປັກກິ່ງຂອງສະພາມົນຕີສັດຕະວັດທີ21
ຕອນຄ່ຳວັນທີ 1 ພະຈິກນີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເຂົ້າຮ່ວມພິທີໄຂກອງປະຊຸມປັກກິ່ງສະພາມົນຕີສັດຕະວັດທີ 21 ຢູ່ຫໍສະພາປະຊາຊົນ, ແລະກ່າວຄຳປາໄສທີ່ພາດຫົວເລື່ອງວ່າ "ປະເທດຈີນທີ່ຢູ່ໃນໂລກກຳລັງປ່ຽນແປງ".
ທ່ານຫຼີເຄີ້ຊຽງກ່າວວ່າ, ຈີນກຳລັງທຳຄວາມພະຍາຍາມເພື່ອແກ້ໄຂບັນຫາລັກສະນະອົງປະກອບອັນສຳຄັນທີ່ການພັດທະນາເສດຖະກິດສັງຄົມປະເຊີນໜ້ານັ້ນ, ສຸມກຳລັງໃຫ້ການເພິ່ມລາຍຮັບຂອງມວນຊົນໄປພ້ອມກັບບາດກ້າວການພັດທະນາຂອງເສດຖະກິດ, ປັບປຸງຄວາມປອດໄພການປະກັນສັງຄົມໃຫ້ຍຸດຕິທຳ, ຊຸກຍູ້ສັງຄົມໃຫ້ມີຄວາມໝັ້ນທ່ຽງ, ໂດຍສະເພາະແມ່ນຂະຫຍາຍຍຸດຕິທຳດ້ານການສຶກສາ, ຍຸດຕິທຳດ້ານການປະກອບອາຊີບ ແລະ ຍຸດຕິທຳດ້ານປະກອບທຸລະກິດ, ຊຸກຍູ້ໃຫ້ສັງຄົມກ້າວໜ້າຢ່າງບໍ່ຢຸດຢັ້ງ.
ທ່ານຫຼີເຄີ້ຊຽງກ່າວວ່າ, ຈີນຍຶດໝັ້ນດຳເນີນການປະຕິຮູບ ແລະ ເປີດປະຕູສູ່ພາຍນອກໂດຍຕະຫຼອດ, ເພິ່ມທະວີພະລັງຊີວິດຂອງຕະຫຼາດ ແລະ ສັງຄົມຢ່າງບໍ່ຢຸດຢັ້ງ, ແລະຈະສືບຕໍ່ຍຶດໝັ້ນເປີດປະຕູສູ່ພາຍນອກໃຫ້ກວ້າງຂວາງກວ່າເກົ່າ, ນີ້ຈະສ້າງໂອກາດຫຼາຍກວ່າເກົ່າເພື່ອໃຫ້ຈີນຮ່ວມມືກັບໂລກ.
ທ່ານຫຼີເຄີ້ຊຽງກ່າວວ່າ, ຈີນສຸມກຳລັງສ້າງສະພາບແວດລ້ອມສາກົນທີ່ມີສັນຕິພາບ ແລະ ສະພາບແວດລ້ອມອ້ອມຂ້າງທີ່ມີສະຖຽນລະພາບໂດຍຕະຫຼອດ, ບັນລຸໃຫ້ຕ່າງຝ່າຍຕ່າງໄດ້ຮັບຜົນປະໂຫຍດ. ນີ້ແມ່ນປະຖົມປັດໄຈອັນຈຳເປັນທີ່ຈີນໄດ້ມີການພັດທະນາທີ່ຜ່ານມາ.
ທ່ານຫຼີເຄີ້ຊຽງຊີ້ອອກວ່າ, ກ່ຽວກັບບັນຫາທີ່ຕົກຄ້າງມາແຕ່ປະຫວັດສາດຈຳນວນໜຶ່ງ, ຈີນມີເຈດຈຳນົງໃຫ້ແກ້ໄຂໃຫ້ຕົກໂດຍຜ່ານການສົນທະນາ, ປະຕິບັດມາດຕະການອັນຕັ້ງໜ້າເພື່ອປົກປັກຮັກສາສະພາບການພັດທະນາໂດຍສັນຕິ ແລະ ການຮ່ວມມື.
