ປີນີ້,ຈີນຈະກາຍເປັນປະເທດອັນດັບທີໜຶ່ງຂອງໂລກໃນການຂາຍຍ່ອຍໂດຍຜ່ານອິນເຕີເນັດ
ວັນທີ 1 ພະຈິກນີ້, ໃນ "ກອງປະຊຸມສຳມະນາລະດັບສູງຂອງການຄ້າເອເລັກໂຕຼນິກຂ້າມຊາດຈີນ2013" ທີ່ຈັດຂຶ້ນຢູ່ນະຄອນຊຽງໄຮ, ທ່ານເນ້ລີນໄຫ ຮອງຫົວໜ້າກົມການຄ້າເອເລັກໂຕຼນິກກະຊວງການຄ້າຈີນກ່າວວ່າບໍ່ຕ້ອງສົງໄສເລີຍວ່າ, ປີນີ້, ຈີນຈະລື່ນກາຍອາເມລິກາ ແລ້ວກາຍເປັນປະເທດອັນດັບທີໜຶ່ງຂອງໂລກໃນການຂາຍຍ່ອຍໂດຍຜ່ານອິນເຕີເນັດ.
ຕົວເລກສະຖິຕິສະແດງໃຫ້ເຫັນວ່າ, ໃນບໍ່ເທົ່າໃດປີມານີ້, ຈັງຫວະການເຕີບໂຕສະເລ່ຍຕໍ່ປີຂອງການຄ້າເອເລັກໂຕຼນິດຂອງຈີນໄວກວ່າ 30%, ໃນປີ 2012, ຍອດມູນຄ່າການຄ້າເອເລັກໂຕຼນິກຂອງຈີນມີ 8000 ຕື້ຢວນ, ໃນນັ້ນ, ການຂາຍຍ່ອຍໂດຍຜ່ານອິນເຕີເນັດຫຼາຍກວ່າ 1300 ຕື້ຢວນ, ໃນ 5-6 ປີມານີ້, ຈັງຫວະການເຕີບໂຕຂອງການຂາຍຍ່ອຍໂດຍຜ່ານອິນເຕີເນັດເກືອບເປັນ 100%. ຂະນະດຽວກັນນີ້, ມູນຄ່າການຄ້າເອເລັກໂຕຼນິດຂ້າມຊາດຂອງຈີນກໍ່ເພິ່ມຂຶ້ນຢ່າງວ່ອງໄວ, ປີ 2012, ມູນຄ່າການຄ້າເອເລັກໂຕຼນິກຂ້າມຊາດຂອງຈີນຫຼາຍກວ່າ 200 ຕື້ໂດລາສະຫະລັດ, ເພິ່ມຂຶ້ນ 25% ເມື່ອທຽບກັບປີ 2011.
ທ່ານເນ້ລີນໄຫກ່າວວ່າ, ຈີນເອົາໃຈໃສ່ນຳການຄ້າເອເລັກໂຕຼນິກຂ້າມຊາດໃນລະດັບສູງ, ຖືການຄ້າເອເລັກໂຕຼນິກຂ້າມຊາດເປັນວິທີສຳຄັນອັນໜຶ່ງໃນການປັບປຸງອົງປະກອບ ແລະ ການຄ້າກັບຕ່າງປະເທດເຕີບໂຕຢ່າງໝັ້ນທ່ຽງໃນສະເພາະໜ້ານີ້.ຫວ່າງມໍ່ໆນີ້, ພາກສ່ວນລັດຖະບານທີ່ກ່ຽວຂ້ອງຂອງຈີນ,ເຊັ່ນ,ກະຊວງການຄ້າຈີນ, ຄະນະກຳມະການການພັດທະນາແລະການປະຕິຮູບແຫ່ງລັດຈີນ , ກະຊວງການເງິນຈີນ, ທະນາຄານປະຊາຊົນຈີນ,ແລະ ກົມໃຫຍ່ພາສີຈີນເປັນຕົ້ນໄດ້ຮ່ວມກັນວາງນະໂຍບາຍຫຼາຍລາຍເພື່ອສະໜັບສະໜູນການຂາຍຍ່ອຍສົ່ງອອກໂດຍຜ່ານອິນເຕີເນັດ, ເຊິ່ງລວມທັງສ້າງຮູບແບບຕິດຕາມຄຸ້ມຄອງດ່ານພາສີແບບໃໝ່ຂອງການສົ່ງອອກການຄ້າເອເລັກໂຕຼນິກ, ແລະຮູບແບບຕິດຕາມຄຸ້ມຄອງການກວດກາສິນຄ້າສົ່ງອອກຂອງການຄ້າເອເລັກໂຕຼນິກເປັນຕົ້ນ.
