ຈີນສະແດງຄວາມບໍ່ພໍໃຈທີ່ສຸດຕໍ່ການສວຍໃຊ້ເຫດການລົດຍົນຕຳຂົວຈິ່ນສຸຍສຽວທຽນອ່ານເມິນປັກກິ່ງເພື່ອກ່າວໂຈມຕີນະໂຍບາຍຊົນເຜົ່າແລະສາສະໜາຂອງຈີນ
ວັນທີ 4 ພະຈິກນີ້, ທ່ານຫົງເຫຼີຍ ໂຄສົກກະຊວງການຕ່າງປະເທດຈີນກ່າວວ່າ, ຈີນສະແດງຄວາມບໍ່ພໍໃຈທີ່ສຸດຕໍ່ການກະທຳທີ່ສວຍໃຊ້ເຫດການລົດຍົນຕຳຂົວຈິ່ນສຸຍສຽວທຽນອ່ານເມິນປັກກິ່ງເພື່ອກ່າວໂຈມຕີນະໂຍບາຍຊົນເຜົ່າແລະສາສະໜາຂອງຈີນ.
ໃນກອງປະຊຸມຂ່າວຂອງກະຊວງການຕ່າງປະເທດຈີນທີ່ຈັດຂຶ້ນໃນວັນທີ 4 ພະຈິກນີ້, ມີນັກຂ່າວຖາມວ່າ, ເຈົ້າໜ້າທີ່ນະຄອນຫຼວງປັກກິ່ງໄດ້ເປີດເຜີຍຜົນການສືບສວນໃນເບື້ອງຕົ້ນກ່ຽວກັບເຫດການທີ່ລົດຍົນຕຳຜູ້ທີ່ບໍ່ມີຄວາມຜິດແລະນັກທ່ອງທ່ຽວຢູ່ຂົວຈິ່ນສຸຍສຽວທຽນອ່ານເມິນຂອງນະຄອນຫຼວງປັກກິ່ງໃນວັນທີ 28 ຕຸລາແລ້ວນີ້, ແຕ່ບາງສື່ມວນຊົນເຊັ່ນCNNພັດມີຄວາມລະແວງສົງໃສຕໍ່ຈີນໃນການກຳນົດທາດແທ້ຂອງເຫດການ, ແລະຕຳໜິນະໂຍບາຍດ້ານຊົນເຜົ່າແລະສາສະໜາຂອງຈີນ, ຈົນກະທັ້ງສະແດງຄວາມເຫັນໃຈຕໍ່ຜູ້ກໍ່ການຮ້າຍໃນເຫດການ. ຈີນມີຄວາມເຫັນແນວໃດຕໍ່ເລື່ອງນີ້.
ທ່ານຫົງເຫຼີຍກ່າວວ່າ, ກ່ຽວກັບເຫດການລົດຍົນຕຳຜູ້ບໍ່ມີຄວາມຜິດແລະນັກທ່ອງທ່ຽວຢູ່ຂົວຈິ່ນສຸຍສຽວທຽນອ່ານເມິນນະຄອນຫຼວງປັກກິ່ງທີ່ເກີດຂຶ້ນໃນວັນທີ 28 ຕຸລາແລ້ວນີ້, ເຈົ້າໜ້າທີ່ຕຳຫຼວດຂອງຈີນໄດ້ຢືນຢັນໃນເບື້ອງຕົ້ນແລ້ວວ່າ,ນີ້ແມ່ນເຫດການຫຼອນໂຈມຕີດ້ວຍຄວາມຮຸນແຮງເພື່ອກໍ່ການຮ້າຍທີ່ຜ່ານການວາງແຜນລ່ວງໜ້າຢ່າງລະອຽດແລະມີການຈັດຕັ້ງ.
ທ່ານຫົງເຫຼີຍກ່າວວ່າ, ລັດຖະບານຈີນປົກປັກຮັກສາສິດທຸກດ້ານຂອງປະຊາຊົນບັນດາເຜົ່າໃນທົ່ວປະເທດຊຶ່ງລວມທັງສິດເສລີພາບໃນການເຊື່ອຖືສາສະໜາຕາມກົດໝາຍ. ຈີນເດັດດ່ຽວຄັດຄ້ານແລະຕໍ່ຕ້ານລັດທິກໍ່ການຮ້າຍທຸກຮູບແບບຢ່າງເຂັ້ມງວດຕາມກົດໝາຍມາໂດຍຕະຫຼອດ, ຄັດຄ້ານບຸກຄົນໃດໆທີ່ປະຕິບັດຫຼືສະໜັບສະໜູນການເຄື່ອນໄຫວກໍ່ການຮ້າຍບໍ່ວ່າໃນນາມໃດໆກໍ່ຕາມ, ຄັດຄ້ານການປະຕິບັດ2 ມາດຕະຖານໃນບັນຫາຕ້ານການກໍ່ການຮ້າຍ. ບາງຄົນແລະອິດທິກຳລັງໄດ້ນຳເອົາການກະທຳກໍ່ການຮ້າຍດ້ວຍຄວາມຮຸນແຮງຂອງພວກຫົວຮຸນແຮງກໍ່ການຮ້າຍກຸ່ມນ້ອຍທີ່ແນໃສ່ສາມັນຊົນແລະນັກທ່ອງທ່ຽວທີ່ບໍ່ມີຄວາມຜິດນັ້ນໄປພົວພັນກັບບັນຫາຊົນເຜົ່າແລະສາສະໜາ, ຈົນກະທັ້ງຖືເປັນຂໍ້ອ້າງເພື່ອກ່າວໂຈມຕີນະໂຍບາຍຊົນເຜົ່າແລະສາສະໜາຂອງຈີນ, ນີ້ເປັນການຍຸຍົງສົ່ງເສີມພວກກໍ່ການຮ້າຍ, ຈີນສະແດງຄວາມບໍ່ພໍໃຈທີ່ສຸດ.
