ລັດຖະບານຊີຣີຍຶດຄອງຕາແສງສຳຄັນທີ່ຢູ່ຊານເມືອງນະຄອນຫຼວງດາມັສ
ຕາມຂ່າວCRI: ຫວ່າງມໍ່ໆນີ້, ລັດຖະບານຊີຣີໄດ້ຍຶດເອົາທີ່ໝັ້ນທະຫານຂອງຝ່າຍຕໍ່ຕ້ານລັດຖະບານທີ່ຢູ່ມໍ່ແຂວງອະເລໂປພາກເໜືອຊີຣີ ແລະ ຕາແສງສຳຄັນທີ່ຢູ່ຊານເມືອງນະຄອນຫຼວງດາມັສ, ໂຈມຕີກຳລັງປະກອບອາວຸດຝ່າຍຕໍ່ຕ້ານລັດຖະບານຢ່າງໜັກ. ອີກດ້ານໜຶ່ງ, ສະຫະປະຊາຊາດກໍ່ຢືນຢັນ ການຮ່ວມມືຂອງລັດຖະບານຊີຣີໃນບັນຫາອາວຸດເຄມີ.
ຜູ້ສັນທັດກໍລະນີຊີຣີເຜີຍໃຫ້ຮູ້ວ່າ, ໃນຕອນຮຸ່ງເຊົ້າວັນທີ 8 ພະຈິກ ຕາມເວລາທ້ອງຖິ່ນ, ກອງທັບຂອງທ່ານປາຊາວ ປະທານາທິບໍດີຊີຣີໄດ້ຍຶດເອົາທີ່ໝັ້ນຍຸດທະສາດຂອງກຳລັງປະກອບອາວຸດຝ່າຍຕໍ່ຕ້ານລັດຖະບານແຫ່ງໜຶ່ງທີ່ຢູ່ເຂດມໍ່ແຂວງອະເລໂປ. ຝ່າຍຕໍ່ຕ້ານລັດຖະບານກ່າວວ່າ, ຜູ້ປະກອບອາວຸດຝ່າຍຕໍ່ຕ້ານລັດຖະບານ 25 ຄົນຖືກຍິງຕາຍ. ອົງການສັງເກດສິດທິມະນຸດຊີຣີກ່າວວ່າ, ໃນການຮູ້ຮົບທີ່ເກີດຂຶ້ນໃນວັນທີ 8 ພະຈິກນີ້, ໃນກຸ່ມກຳລັງປະກອບອາວຸດຂອງຝ່າຍຕໍ່ຕ້ານລັດຖະບານໄດ້ປະກົດມີຜູ້ປະກອບອາວຸດຂອງອົງການອານໄກດາ.
ວັນທີ 7 ພະຈິກນີ້, ກອງທັບລັດຖະບານຊີຣີໄດ້ດຳເນີນການໂຈມຕີແບບດັບສູນຕໍ່ກຸ່ມປະກອບອາວຸດລັດທິກໍ່ການຮ້າຍທີ່ຢູ່ເຂດຊູປາຍນາ ແລະ ຕາແສງເກີຊາເລີທີ່ຢູ່ຊານເມືອງນະຄອນຫຼວງດາມັສ, ແລະຍຶດເອົາເຂດດັ່ງກ່າວໃນມື້ດຽວກັນ,ນີ້ກໍ່ໝາຍຄວາມວ່າ, ສາຍລຳລຽງຂອງກຳລັງປະກອບອາວຸດຝ່າຍຕໍ່ຕ້ານລັດຖະບານທີ່ປະຈຳຢູ່ທິດໃຕ້ນະຄອນຫຼວງດາມັນຖືກຕັດຂາດທັງໝົດ.
ຂ່າວແຈ້ງວ່າ, ພາຍໃຕ້ການປະສານສົມທົບອັນຕັ້ງໜ້າຂອງລັດຖະບານຊີຣີ,ປັດຈຸບັນ, ອົງການເກືອດຫ້າມອາວຸດເຄມີ ແລະ ຄະນະສຳຫຼວດປະສົມຂອງສະຫະປະຊາຊາດໄດ້ສຳຫຼວດກວດກາສະຖານີ ແລະ ສະພາບການຂອງອາວຸດເຄມີ 22 ແຫ່ງໃນຈຳນວນ 23 ແຫ່ງທີ່ຊີຣີໄດ້ເປີດເຜີຍ. ກ່ອນໜ້ານີ້, ລັດຖະບານຊີຣີກ່າວວ່າ, ສະຖານທີ່ອີກແຫ່ງໜຶ່ງນັ້ນໄດ້ຖືກປະຖິ້ມແລ້ວ.
