ສູນ​ກາງ​ຊາວໜຸ່ມລາວ​-ຈີນຈະ​ເພີ່ມ​ທະວີ​ການ​ຮ່ວມ​ມື​ຕື່ມ​ອີກ

(GMT+08:00) 2012-03-03 13:25:30     cri

ຕາມ​ຂ່າວ CRI: ຕອນ​ເຊົ້າ​ວັນ​ທີ 2 ມີນານີ້, ທີ່​ນະຄອນຫຼວງວຽງຈັນ​ໄດ້​ມີ​ກອງ​ປະຊຸມ​ພົບ​ປະ​ຂອງ​ຄະນະ​ຜູ້​ແທນ​ຊາວໜຸ່ມຂັ້ນ​ສູງ​ລະ​ຫວ່າງ​ສູນ​ກາງ​ຊາ​ວໜຸ່ມປະຊາຊົນ​ປະຕິວັດ​ລາວ​ກັບ​ສູນ​ກາງຊາວ​ໜຸ່ມກອມ​ມູນິດ​ຈີນ, ​ຝ່າຍ​ລາວ​ນຳ​ໂດຍ​ທ່ານ ດຣ ຄຳ​ຜາ ພີມິ​ມະ​ສອນ ຮອງ​ເລຂາ​ຄະນະ​ບໍລິຫານ​ງານ​, ປະທານ​ກວດກາສູນ​ກາງ​ຊາວ​ໜຸ່ມ​ປະຊາຊົນ​ປະຕິວັດ​ລາວ, ຝ່າຍຈີນ​ນຳ​ໂດຍ​ທ່ານ​ນາງ ຫຼົວ ​ເມ ຮອງ​ເລຂາທິກາ​ນສູນ​ກາງ​ຊາວ​ໜຸ່ມກອມ​ມູນິດ​ຈີນ, ພ້ອມ​ດ້ວຍ​ຄະນະ​ຜູ້​ແທນທັງ​ສອງ​ຝ່າ​ຍ.

ໃນກອງ​ປະຊຸມ​ຄັ້ງ​ນີ້​, ​ສອງ​ຝ່າຍ​ເຫັນ​ດີ​ເປັນ​ເອກະສັນ​ກັນ​ຈະ​ເພີ່ມ​ທະວີ​ການ​ພົວພັນ​ຮ່ວມ​ມື​ກັນ​ຕື່ມ​ອີກ, ​ແລະຈະ​ປະກອບສ່ວນ​ຢ່າງ​ເປັນ​ເຈົ້າ​ການ​ໃນ​ການ​ຜັນ​ຂະຫຍາຍ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ​ຍາວ​ນານລະຫວ່າງ​ຈີນ-​ລາວ-​ຈີນ. ​ຊຶ່ງ​ຜ່ານ​ການ​ປຶກສາ​ຫາລື​ຢ່າງ​ພາວະ​ວິ​ໄສ, ທັງ​ສອງ​ຝ່າຍ​ເປັນ​ເອກະ​ພາບ​ໃນ​ດ້ານຫຼັກການ​ຂອງ​ການ​ພົວພັນ​ຮ່ວມ​ມື​ທັງ​ສອງ​ຝ່າຍ ​ໂດຍ​ການ​ເຊັນ​ບົດ​ບັນທຶກ​ການ​ພົບ​ປະ​ເຮັດ​ວຽກລະຫວ່າງ​ຄະນະ​ຜູ້​ແທນ​ຂັ້ນ​ສູງ​ຂອງ​ສອງ​ປະ​ເທດ, ສອງ​ຝ່າຍເຫັນ​ດີ​ເອກະ​ພາບ​ໃນ​ການ​ສືບຕໍ່​ສຶກສາ​ອົບ​ຮົມ​ຊາວໜຸ່ມ-​ເຍົາວະ​ຊົນ​ສອງ​ຊາດ​ລາວ-​ຈີນ ​ໄດ້​ຮັບ​ຮູ້, ​ເຂົ້າ​ໃຈ​ຢ່າງ​ຖືກຕ້ອງ​ກ່ຽວກັບ​ມິດ​ຕະພາບ​ແລະ​ການ​ຮ່ວມ​ມື​ລາວ-​ຈີນ​​ໂດຍ​ສະ​ເພາະ​ທິດ​ຄູ່​ຮ່ວມ​ມື​ຍຸ​ທະ​ສາດ​ຮອບ​ດ້ານ, ​ເຫັນ​ດີ​ໃຫ້​ມີ​ການ​ເພີ່ມ​ທະວີ​ແລກປ່ຽນຂໍ້​ມູນ​ຂ່າວສານ​ຊຶ່ງ​ກັນ​ແລະ​ກັນ​, ເພື່ອ​ສົງ​ເສີມ​ການ​ພົວພັນ​ຂອງ​ອົງການ​ຊາວໜຸ່ມທັງ​ສອງ​ປະ​ເທດ, ​ເຫັນ​ດີ​​ໃຫ້​ມີ​ການ​ແລກ​ປ່ຽນທາງ​ດ້ານ​ວິທະ​ຍາສາດ​ແລະ​ວັດທະນາ​ທຳ​ອັນ​ດີງາມ​ຂອງ​ສອງ​ປະ​ເທດ​ລວມທັງ​ການ​ສົ່ງ​ເສີມ​ການ​ຮ່ວມ​ມື​ກັນ​ລະຫວ່າງ​ນັກທຸ​ລະກິດ​ໜຸ່ມ, ​ເຫັນ​ດີ​ສືບຕໍ່ຊຸກຍູ້​ການ​ສ້າງ​ສູນ​ມິດຕະ​ພາບ​ຊາວໜຸ່ມລາວ-​ຈີນ​ຢູ່​ລາວ, ຝ່າຍ​ຈີນ​ມີ​ຄວາມ​ຍິນ​ດີ​ເຊື້ອ​ເຊີນ​​ເລຂາ​ຄະນະ​ບໍລິຫານ​ງານ​ສູນ​ກາງ​ຊາວໜຸ່ມ​ປະ​ຊາຊົນ​ປະຕິວັດ​ລາວ​ພ້ອມ​ດ້ວຍ​ຄະນະ​ໄປ​ຢ້ຽມຢາມ​ຢ່າງ​ເປັນ​ທາງ​ການ​ໃນ​ປີ​ນີ້ ​ເພື່ອ​ລົງ​ນາມ​ບົດ​ບັນ​ທຶກ​ຊ່ວຍ​ຈຳ​ລະຫວ່າງ​ອົງການ​ຊາວໜຸ່ມຂອງ​ທັງ​ສອງປະ​ເທດ​ສົກ​ປີ 2012-2014, ພ້ອມ​ນີ້​ຝ່າຍ​ຈີນ​ຍິນ​ດີ​ໃຫ້ການ​ສືບ​ຕໍ່ຊຸກຍູ້​ອາ​ສາ​ສະໝັກ​ຊາວໜຸ່ມ​ນະຄອນ​ຊຽງ​ໄຮ້, ​ແຂວງ​ຍຸນ​ນານ​ແລະ​ແຂວງ​ອື່ນໆ​ເພື່ອ​ມາ​ປະຕິບັດ​ໜ້າທີ່ຢູ່​ລາວ, ພ້ອມ​ທັງ​ຍິນ​ດີ​ຄົ້ນຄວ້າ​ຄວາມ​ເປັນ​ໄປ​ໄດ້​ໃນ​ການ​ຊ່ວຍ​ເຫຼືອລ້າ​ຕໍ່ອົງການ​ຊາວໜຸ່ມລາວ​ແລະ​​ຊຸ​ກຍູ້​ພາກສ່ວນ​ຕ່າງໆຂອງ​ຕົນ​ເພື່ອ​ໃຫ້ການ​ຊ່ວຍ​ເຫຼືອຊາວ​ໜຸ່ມລາວ ​ບົນ​ພື້ນຖານ​ທີ່​ໄດ້​ໃຫ້​ທຶນ​ໄປ​ຝຶກ​ອົບ​ຮົມ​ທິດ​ສະ​ດີ​ຊາວໜຸ່ມ-​ເຍົາວະ​ຊົນ​ຢູ່​ຈີນ​ແລະ​ໃຫ້​ທຶນ​ໄປ​ທັດສະນະ​ສຶກສາ​ຢູ່​ຈີນ​ຕາມ​ຄວາມ​ເໝົາສົມ, ນອກ​ນີ້​ຝ່າຍ​ຈີນ​ຍັງ​ໃຫ້ການ​ຊ່ວຍ​ເຫຼືອພາ​ຫະນະ​ຕ່າງໆ​ແລະ​ເຄື່ອງ​ດົນຕີ​ຈຳນວນໜຶ່ງ​ໃຫ້​ສູນ​ກາງ​ຊາວໜຸ່ມ​ປະຊາຊົນ​ປະຕິວັດ​ລາມ​ຕື່ມ​ອີກ.