ອາເມລິກາແລະຟິລິບປິນຈັດການປຶກສາຫາລື 2+2 ເປັນຄັ້ງທຳອິດ,ອາເມລິກາປະຕິເສດບໍ່ໃຫ້ຫລັກຫມັ້ນໃນບັນຫາທະເລຈີນໃຕ້ອີກເທື່ອຫນຶ່ງ
(GMT+08:00) 2012-05-01 14:15:06 cri
ຕອນບ່າຍວັນທີ 30 ເມສາແລ້ວນີ້,ທ່ານນາງຮິວລາຣີ ກຼິນຕັນ, ລັດຖະມົນຕີວ່າການກະຊວງການຕ່າງປະເທດແລະທ່ານກັບເລອົນ ປາເນຕາ,ລັດຖະມົນຕີວ່າການກະຊວງປ້ອກງັນປະເທດອາເມລິກາກັບທ່ານແອເບີດ ເດີ ໂຣຊາຣີໂອ,ລັດຖະມົນຕີວ່າການກະຊວງການຕ່າງປະເທດແລະທ່ານໂວຣຕາເຣ ກັສມິນ,ລັດຖະມົນຕີວ່າການກະຊວງປ້ອງກັນປະເທດຟິລິບປິນໄດ້ຈັດການປຶກສາຫລືລະດັບສູງລະຫວ່າງສອງປະເທດຄັ້ງທຳອິດ.
ເຖິງວ່າການເຈລະຈາເທື່ອນີ້ແມ່ນສອງຝ່າຍໄດ້ຕົກລົງກັນມາແຕ່ປີກາຍນີ້ກໍ່ຕາມ, ແຕ່ຍ້ອນສະຖານະການປັດຈຸບັນ,ຫາງສຽງລ້ວນແຕ່ສຸມໃສ່ເຫດການເກາະຮວງອຽນ.ກ່ອນການເຈລະຈາ,ສື່ມວນຊົນເຫັນໂດຍທົ່ວໄປວ່າຟິລິບປິນຈະສວຍໂອກາດນີ້ຂໍການສະຫນັບສະຫນູນນຳອາເມລິກາ. ແຕ່ການເຈລະຈາເທື່ອນີ້ພຽງແຕ່ດຳເນີນໄປເປັນເວລາເຄິ່ງຊົ່ວໂມງທໍ່ນັ້ນ. ໃນກອງປະຊຸມຂ່າວທີ່ຈັດຂຶ້ນຕາມຫລັງ, ທ່ານນາງຮິວລາຣີ ກຼິນຕັນກ່າວວ່າ,ອາເມລິກາຄັດຄ້ານການນຳໃຊ້ອາວຸດຫລືຂົ່ມຂູ່ດ້ວຍອາວຸດເພື່ອແກ້ໄຂຄວາມຂັດແຍ່ງກັນຢູ່ທະເລຈີນໃຕ້.ນາງເວົ້າວ່າ, ອາເມລິກາຈະບໍ່ເຂົ້າຂ້າງຝ່າຍໃດໆໃນການຂັດແຍ່ງກັນດັ່ງກ່າວ, ແລະຮຽກຮ້ອງຝ່າຍທີ່ກ່ຽວຂ້ອງຈົ່ງແກ້ໄຂຄວາມຂດແຍ່ງກັນໂດຍຜ່ານຊ່ອງທາງການຕ່າງປະເທດ.ນີ້ແມ່ນທ່າທີຂອງລັດຖະບານອາເມລິກາຕະຫລອດມາພາຍຫລັງໄດ້ເກີດເຫດການເກາະຮວງອຽນເປັນຕົ້ນມາ.
ກ່ອນການເຈລະຈາ, ທ່ານໂຣຊາຣີໂອ,ລັດຖະມົນຕີວ່າການກຊະວງ ການຕ່າງປະເທດຟິລິບປິນກ່າວວ່າ, ກຳລັງທາງການທະຫານຂອງຟິລິບປິນອ່ອນແອຫລາຍ, ມີແຕ່ກຳປັ່ນລາດຕະເວນມືສອງລຳຫນຶ່ງທີ່ຊື່ຈາກອາເມລິກາທໍ່ນັ້ນ, ສະນັ້ນຫວັງວ່າອາເມລິກາໃຫ້ການຊ່ວຍເຫລືອ.ແຕ່ທ່ານບໍ່ໄດ້ອະທິບາຍກ່ຽວກັບບັນຫານີ້ໃນກອງປະຊຸມຂ່າວ,ສອງຝ່າຍພຽງແຕ່ເນັ້ນ ວ່າຈະເພີ່ມທະວີການຮ່ວມມືທາງການທະຫານ.ອີງຕາມສົນຍາປ້ອງກັນປະເທດລະຫວ່າງອາເມລິກາກັບຟິລິບປິນ, ອາເມລິກາມີແຜນການຈະມອບກຳປັ່ນລາດຕະເວັນຮັນມິວຕັນທີ່ກອງປ້ອງກັນແຄມທະເລອາເມລິກາບໍ່ໃຊ້ແລ້ວນັ້ນໃຫ້ຟິລິບປິນພາຍໃນປີນີ້.