ອາເມລິກາຄວນຫຼີກເວັ້ນໃນການສົ່ງຂໍ້ມູນຂ່າວສານອັນຜິດພາດໃຫ້ປະເທດທີ່ກ່ຽວຂ້ອງ
(GMT+08:00) 2012-05-02 14:38:06 cri
ການສົນທະນາຍຸດທະສາດແລະເສດຖະກິດຈີນອາເມລິກາຄັ້ງທີ4ຈະຈັດຂຶ້ນແຕ່ວັນທີ3ຫາວັນທີ4ພຶດສະພານີ້ຕາມແຜນການທີ່ກຳນົດໄວ້.ສອງຝ່າຍຈະລົງເລິກແລກປ່ຽນຄຳຄິດຄຳເຫັນແລະຊຸກຍູ້ການຮ່ວມມືທີ່ມີການປະຕິບັດຕົວຈິງໃນຂົງເຂດອັນກວ້າງຂວາງເຊັ່ນຜັນຂະຫຍາຍຄວາມຮັບຮູ້ທີ່ຄືກັນລະຫວ່າງປະມຸກລັດສອງປະເທດຕື່ມອີກ,ຊຸກຍູ້ການສ້າງສາຍພົວພັນຄູ່ຮ່ວມມືລະຫວ່າງຈີນອາເມລິກາ,ລົງເລິກການແລກປ່ຽນຄວາມເຫັນແລະປະສານງານກ່ຽວກັບນະໂຍບາຍເສດຖະກິດມະຫາພາກ,ບັນຫາສຳຄັນໃນສາກົນແລະພາກພື້ນ,ຊຸກຍູ້ເສດຖະກິດການຄ້າແລະອື່ນໆ.
ກົນໄກການສົນທະນາຍຸດທະສາດແລະເສດຖະກິດຈີນອາເມລິກາແມ່ນປະມຸກລັດຈີນແລະອາເມລິກາຮ່ວມກັນສ້າງຕັ້ງຂຶ້ນໃນປີ2009,ຊຶ່ງມີຈຸດປະສົງອັນພົ້ນເດັ່ນຄືເປັນກົນໄກສົນທະນາລະດັບສູງລະຫວ່າງພາກສ່ວນຕ່າງໆແລະມີລັກສະນະສ້າງນະໂຍບາຍໄດ້ຫຼາຍ,ຊຶ່ງການສ້າງຕັ້ງກົນໄກນີ້ເພື່ອເປັນມາດຕະການໃນການປະດິດສ້າງທີ່ເພີ່ມທະວີການຄວາມເຂົ້າໃຈກັນແລະໄວ້ເນື້ອເຊື່ອໃຈກັນ,ຫຼີກລ້ຽງການວິນິໄສທາງດ້ານຍຸດທະສາດຢ່າງຜິດພາດ,ເພີ່ມຜົນປະໂຫຍດຮ່ວມ.ປີນີ້ພໍດີຖືກກັບໂອກາດທີ່ອາເມລິກາຈະຈັດການເລືອກຕັ້ງປະທານາທິບໍດີ,ພັກກອມມູນິດຈີນຈະຈັດກອງປະຊຸມໃຫຍ່ຄັ້ງທີ18,ສະນັ້ນ,ການຮັບປະກັນໃຫ້ການພົວພັນຈີນອາເມລິກາພັດທະນາໄປຢ່າງໝັ້ນທ່ຽງນັ້ນຈິ່ງມີຄວາມສຳຄັນຫຼາຍທີ່ສຸດ,ຊຶ່ງນີ້ກໍ່ເປັນເນື້ອໃນອັນໃໝ່ຂອງການສົນທະນາລະຫວ່າງຈີນອາເມລິກາໃນຄັ້ງນີ້.
ນັບຕັ້ງແຕ່ອາເມລິກາຖະແຫຼງຢ່າງເປີດເຜີຍວ່າຈະກັບຄືນສູ່ອາຊີມານີ້,ການກະທຳບາງຢ່າງຂອງອາເມລິກາຢູ່ພາກພື້ນອາຊີປາຊີຟິກກາຍເປັນສິ່ງທີ່ໜ້າສົງໃສຫຼາຍ.ເມື່ອບໍ່ດົນມານີ້,ອາເມລິກາໄດ້ເພີ່ມກຳລັງທະຫານຢູ່ອາຊີປາຊີຟິກໂດຍສະເພາະແມ່ນພາກພື້ນປາຊີຟິກຕາເວັນຕົກ,ເພີ່ມທະວີການຮ່ວມມືທາງການທະຫານກັບຫຼາຍປະເທດເຊັ່ນຟີລິບປິນ,ຫວຽດນາມແລະອົສຕຼາລີ,ສ້າງຖານທັບແຫ່ງໃໝ່,ແຜ່ຂະຫຍາຍຂອບເຂດຈັດວາງກຳລັງຮົບໃຫ້ກວ້າງອອກ,ຈັດການຊ້ອມຮົບທີ່ມີຂະໜາດນັບມື້ນັບໃຫຍ່ຂຶ້ນ,ຂາຍອາວຸດຫຼາຍຂຶ້ນກວ່າເກົ່າ,ແລະຍັງໄດ້ວາງແຜນຈະສ້າງຕັ້ງລະບົບຕ້ານລູກສອນໄຟນຳວິຖີຕື່ມອີກ,ຊຶ່ງມາດຕະການແລະການກະທຳເຫຼົ່ານີ້ເປັນປັດໄຈທີ່ສ້າງຄວາມບໍ່ສະຫງົບຢູ່ພາກພື້ນແຫ່ງນີ້.
ຈີນຍິນດີຕ້ອນຮັບອາເມລິກາໃນການເສີມຂະຫຍາຍບົດບາດທີ່ມີລັກສະນະສ້າງສັນຢູ່ພາກພື້ນອາຊີປາຊີຟິກ,ຊຶ່ງຫຼັກໝັ້ນນີ້ຈະບໍ່ມີການປ່ຽນແປງ.ອາເມລິກາຄວນເຮັດໃຫ້ຄຳເວົ້າແລະການກະທຳຕົວຈິງມີຄວາມເປັນເອກະພາບກັນ,ຫຼີກເວັ້ນບໍ່ສົ່ງຂໍ້ມູນຂ່າວສານອັນຜິດພາດໃຫ້ແກ່ປະເທດທີ່ກ່ຽວຂ້ອງ,ບໍ່ຄວນຊ່ວຍຊູຍູ້ໜູນໃຫ້ປະເທດເຫຼົ່ານີ້ສ່ຽງໄພໃນການທ້າທາຍເກາະຜິດຕໍ່ຈີນໃນເວລາປະຕິບັດຕໍ່ບັນຫາທີ່ກ່ຽວພັນເຖິງຄວາມຂັດແຍ່ງທາງດ້ານຜືນແຜ່ນດິນໃນທະເລຈີນໃຕ້.
ເມື່ອກ້າວເຂົ້າສູ່ທົດສະວັດທີສອງຂອງສະຕະວັດທີ21,ລະຫວ່າງສອງປະເທດໃຫຍ່ທີ່ຕ່າງຢູ່ຝັ່ງຕາເວັນຕົກແລະຝັ່ງຕາເວັນອອກຂອງມະຫາສະໝຸດປາຊີຟິກມີຄວາມເພິ່ງພາອາໄສກັນທາງດ້ານເສດຖະກິດແລະຍຸດທະສາດທີ່ຂຶ້ນສູ່ລະດັບສູງອີກເທື່ອໃໝ່,ມີຜົນປະໂຫຍດຮ່ວມເພີ່ມຫຼາຍຂຶ້ນແບບບໍ່ເຄີຍມີມາກ່ອນ.ການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດແມ່ນທ່າອ່ຽງລວມທີ່ຈະຕ້ອງເປັນໄປ,ຍິ່ງແມ່ນເສັ້ນທາງທີ່ຕ້ອງເດີນຜ່ານຜ່າເພື່ອການພັດທະນາຂອງປະເທດ.