ໄຂກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ45ຢູ່ກຳປູເຈຍ
(GMT+08:00) 2012-07-09 18:09:42 cri
ຕາມCRIລາຍງານວ່າ:ກອງປະຊຸມລັດຖະມົນຕີການຕ່າງປະເທດອາຊຽນຄັ້ງທີ45ໄຂຂຶ້ນຢູ່ນະຄອນຫຼວງພະນົມເປັນຂອງກຳປູເຈຍແຕ່ວັນທີ9ຫາວັນທີ13ກໍລະກົດນີ້,ໂດຍມີລັດຖະມົນຕີວ່າການກະຊວງການຕ່າງປະເທດຂອງ27ປະເທດແລະຜູ່ຕາງໜ້າຈາກອົງການຈັດຕັ້ງສາກົນເຂົ້າຮ່ວມ.ກອງປະຊຸມລັດຖະມົນຕີການຕ່າງປະເທດອາຊຽນປີນີ້ມີຫົວຂໍ້ວ່າ"ພາກພື້ນດຽວກັນ,ຊາຕາກຳດຽວກັນ".
ໃນໄລຍະດຳເນີນກອງປະຊຸມຄັ້ງນີ້:ລັດຖະມົນຕີການຕ່າງປະເທດຂອງປະເທດສະມາຊິກອາຊຽນຈະລົງນາມໃນ ສົນທິສັນຍາວ່າດ້ວຍເຂດປອດອາວຸດນີວເຄຼຍຂອງອາຊີຕາເວັນອອກສຽງໃຕ້. ອາຊຽນກັບຈີນລົງນາມໃນບົດບັນທຶກຄວາມເຂົ້າໃຈກ່ຽວກັບສົນທິສັນຍາວ່າດ້ວຍເຂດປອດອາວຸດນີວເຄຼຍຂອງອາຊີຕາເວັນອອກສຽງໃຕ້,ອັງກິດແລະສະຫະພາບເອີຣົບຕ່າງຈະລົງນາມໃນເອກະສານທີ່ກ່ຽວຂ້ອງກັບສົນທິສັນຍາມິດຕະພາບແລະການຮ່ວມມືໃນອາຊີອາຄະເນ.ໃນນັ້ນ,ສົນທິສັນຍາວ່າດ້ວຍເຂດປອດອາວຸດນີວເຄຼຍອາຊີຕາເວັນອອກສຽງໃຕ້ແມ່ນໄດ້ຮັບຄວາມສົນໃຈຫຼາຍທີ່ສຸດ. ອີງຕາມສົນທິສັນຍາສະບັບນີ້,ຈະສ້າງເຂດອາຊີຕາເວັນອອກສຽງໃຕ້ໃຫ້ເປັນເຂດທີ່ບໍ່ມີອາວຸດນີວເຄຼຍ,ພ້ອມທັງຈະປະຕິບັດສົນທິສັນຍາວ່າດ້ວຍການບໍ່ແຜ່ຜາຍອາວຸດນີວເຄຼຍໃຫ້ດີກວ່າເກົ່າ.ສ່ວນວາລະປະຊຸມກ່ຽວກັບ5ປະເທດສະມາຊິກຖາວອນຂອງສະຫະປະຊາຊາດຈະລົງນາມໃນສົນທິສັນຍາວ່າດ້ວຍເຂດປອດອາວຸດນີວເຄຼຍອາຊີຕາເວັນອອກສຽງໃຕ້ໃນວັນທີ12ກໍລະກົດນີ້ຈະມີການປ່ຽນແປງ.ເຈົ້າໜ້າທີ່ອາວຸໂສຄົນໜຶ່ງຂອງກະຊວງການຕ່າງປະເທດກຳປູເຈຍກ່າວວ່າ,ເນື່ອງຈາກວ່າຝະຣັ່ງ,ຣັດເຊຍ,ອັງກິດແລະອາເມລິກາຍື່ນເອກະສານທີ່ກ່ຽວຂ້ອງຊ້າເກີນໄປ,ຈົນເຮັດໃຫ້ຄະນະກຳມະການເຂດປອດອາວຸດນີວເຄຼຍອາຊີຕາເວັນອອກສຽງໃຕ້ບໍ່ມີເວລາປະເມີນຜົນ,ສະນັ້ນຈິ່ງຕົກລົງໃຫ້4ປະເທດນີ້ເລື່ອນເວລາໃນການລົງນາມ,ແລະຫວັງວ່າຈະສາມາດລົງນາມໃນກອງປະຊຸມສຸດຍອດອາຊຽນທີ່ຈັດຂຶ້ນໃນເດືອນພະຈິກປີນີ້.
ໂດຍໄດ້ຮັບຄຳເຊີນຈາກທ່ານຮໍນາມຮົງ ຮອງນາຍົກລັດຖະມົນຕີທັງເປັນລັດຖະມົນຕີວ່າການກະຊວງການຕ່າງປະເທດແລະການຮ່ວມມືສາກົນກຳປູເຈຍ,ທ່ານຢາງເຈສື ລັດຖະມົນຕີວ່າການກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມຕ່າງໆທີ່ຈັດຂຶ້ນຢູ່ນະຄອນຫຼວງພະນົມເປັນ.
ທ່ານຫງວຽນຊຸນຟຸກ ຮອງນາຍົກລັດຖະມົນຕີຫວຽດນາມກ່າວໃນເວລາໃຫ້ສຳພາດຕໍ່ໂທລະພາບNHKຂອງຍີ່ປຸ່ນໃນຫວ່າງມໍ່ໆມານີ້ວ່າ:ໃນກອງປະຊຸມລັດຖະມົນຕີການຕ່າງປະເທດຂອງເວທີປຶກສາຫາລືດ້ານການເມືອງແລະຄວາມໝັ້ນຄົງໃນພາກພື້ນອາຊຽນເທື່ອນີ້,ບັນຫາທະເລຈີນໃຕ້ຈະເປັນບັນຫາຈຸດສຸມ.ຜູ່ຊ່ຽວຊານວິເຄາະວ່າ:ການທີ່ເຈລະຈາແລະປຶກສາຫາລືບັນຫາທະເລຈີນໃຕ້ໃນກອງປະຊຸມລັດຖະມົນຕີການຕ່າງປະເທດອາຊຽນແມ່ນບໍ່ເໝາະສົມທີ່ສຸດ.ລະຫວ່າງອາຊຽນກັບຈີນມີຫຼາຍບັນຫາກ່ຽວກັບການຮ່ວມມືແລະການພັດທະນາຕ້ອງການປຶກສາຫາລືແກ້ໄຂ,ໂຈະບັນຫາສຳຄັນເຫຼົ່ານີ້ໄວ້ເພື່ອປຶກສາຫາລືບັນຫາທະເລຈີນໃຕ້ແມ່ນບໍ່ມີຜົນດີຕໍ່ຜົນປະໂຫຍດລວມຂອງການຮ່ວມມືລະຫວ່າງສອງຝ່າຍ.ຕາມສື່ຕ່າງໆຂອງກຳປູເຈຍທີ່ເປັນປະເທດເຈົ້າພາບຈັດກອງປະຊຸມລັດຖະມົນຕີການຕ່າງປະເທດອາຊຽນລາຍງານວ່າ:ບັນຫາສຳຄັນອັນໜຶ່ງທີ່ຈະປຶກສາຫາລືໃນກອງປະຊຸມຄັ້ງນີ້ແມ່ນການເຮັດໃຫ້ອາຊີຕາເວັນອອກສຽງໃຕ້ກາຍເປັນເຂດປອດອາວຸດນີວເຄຼຍ.
ຊຸມປີມໍ່ໆມານີ້,ການຮ່ວມມືລະຫວ່າງຈີນກັບອາຊຽນໄດ້ຮັບຜົນສຳເລັດຢ່າງຫຼວງຫຼາຍ,ການຮ່ວມມືທາງດ້ານເສດຖະກິດລະຫວ່າງສອງຝ່າຍໄດ້ເຂົ້າສູ່ລວງເລິກ,ຫຼາຍປະເທດໃນອາຊຽນເຊິ່ງລວມທັງຟີລິບປິນແລະຫວຽດນາມລ້ວນແຕ່ໄດ້ຮັບຜົນປະໂຫຍດຈາກການພັດທະນາຢ່າງວ່ອງໄວຂອງຈີນ,ການຮ່ວມມືລະຫວ່າງຈີນແລະອາຊຽນແມ່ນບັນຫາສຳຄັນທີ່ສຸດໃນການພົວພັນລະຫວ່າງສອງຝ່າຍ.ສ່ວນບັນຫາທະເລຈີນໃຕ້ພຽງແຕ່ແມ່ນບັນຫາສອງຝ່າຍລະຫວ່າງບາງປະເທດສະມາຊິກອາຊຽນກັບຈີນເທົ່ານັ້ນ,ການກະທຳຂອງບາງປະເທດໄດ້ຝ່າຝືນຜົນປະໂຫຍດຮ່ວມຂອງອາຊຽນ, ຈະບໍ່ໄດ້ຮັບການສະໜັບສະໜູນຈາກຫຼາຍປະເທດ.