ໄຂກອງປະຊຸມລັດຖະມົນຕີການຕ່າງປະເທດອາຊຽນ-ຈີນ
ກອງປະຊຸມລັດຖະມົນຕີການຕ່າງປະເທດອາຊຽນ-ຈີນຫຼື10+1ໄດ້ຈັດຂຶ້ນໃນວັນທີ11ກໍລະກົດນີ້ຢູ່ນະຄອນຫຼວງພະນົມເປັນຂອງກຳປູເຈຍ,ໂດຍມີລັດຖະມົນຕີການຕ່າງປະເທດຂອງ10ປະເທດສະມາຊິກອາຊຽນ,ທ່ານຢາງເຈສື ລັດຖະມົນຕີວ່າການກະຊວງການຕ່າງປະເທດຈີນແລະທ່ານສຸຣິນ ພິດສຸວັນ ເລຂາທິການໃຫຍ່ອາຊຽນໄດ້ເຂົ້າຮ່ວມ.ຝ່າຍຕ່າງໆທີ່ເຂົ້າຮ່ວມກອງປະຊຸມໄດ້ຕີລາຄາຢ່າງຕັ້ງໜ້າຕໍ່ຜົນສຳເລັດທີ່ຈີນແລະອາຊຽນໄດ້ຮັບນັບຕັ້ງແຕ່ສອງຝ່າຍສ້າງສາຍພົວພັນຄູ່ເຈລະຈາໃນ20ກວ່າປີຜ່ານມາ,ແລະຍັງໄດ້ປຶກສາຫາລືກັນຢ່າງກວ້າງຂວາງກ່ຽວກັບການຮ່ວມມືລະຫວ່າງຈີນກັບອາຊຽນໃນຂົງເຂດເສດຖະກິດ,ຄວາມໝັ້ນຄົງ,ວັດທະນະທຳແລະການສຶກສາເຫຼົ່ານີ້ເປັນຕົ້ນ.
ໃນເວລາກ່າວຄຳປາໄສໃນກອງປະຊຸມທີ່ຈັດຂຶ້ນໃນວັນທີ11ກໍລະກົດນີ້,ທ່ານຢາງເຈສື ລັດຖະມົນຕີວ່າການກະຊວງການຕ່າງປະເທດຈີນກ່າວເນັ້ນວ່າ,ພາຍໃຕ້ສະພາບການທີ່ໄດ້ຮັບຜົນສະທ້ອນຢ່າງຫຼວງຫຼາຍຈາກວິກິດການການເງິນສາກົນໃນປະຈຸບັນປະກົດອອກມາຢ່າງຕໍ່ເນື່ອງ,ຈີນແລະອາຊຽນມີຜົນປະໂຫຍດແລະຄວາມຮັບຜິດຊອບຮ່ວມກັນໃນການປົກປັກຮັກສາສັນຕິພາບແລະສະຖຽນລະພາບຂອງພາກພື້ນ,ເຮັດໃຫ້ການພັດທະນາຂອງອາຊີຮັກສາທ່າອ່ຽງການຂະຫຍາຍຕົວທີ່ດີ.ທ່ານຢ່າງເຈສືກ່າວວ່າ:
"ການພັດທະນາຂອງຈີນຕ້ອງການສະພາບແວດລ້ອມອ້ອມຂ້າງທີ່ມີສັນຕິພາບ,ສະຖຽນລະພາບແລະຄວາມຈະເລີນຮຸ່ງເຮືອງ,ພວກຂ້າພະເຈົ້າຢາກເຫັນອາຊຽນທີ່ມີຄວາມສາມັກຄີ,ເຂັ້ມແຂງຈະເລີນຮຸ່ງເຮືອງແລະມີຊີວິດຊີວາ,ເພາະວ່ານີ້ກໍ່ມີຜົນດີຕໍ່ຜົນປະໂຫຍດດ້ານຍຸດທະສາດຂອງຈີນເຊັ່ນກັນ.ລັດຖະບານຈີນໃຫ້ຄວາມສຳຄັນຫຼາຍຕໍ່ການພົວພັນກັບປະເທດອ້ອມຂ້າງເຊິ່ງລວມທັງປະເທດໃນອາຊຽນ.ການປັບປຸງການພົວພັນມິດຕະພາບກັບອາຊຽນໃຫ້ໝັ້ນຄົງ,ລົງເລິກການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ,ຊຸກຍູ້ການພັດທະນາຮ່ວມກັນນັ້ນແມ່ນເປົ້າໝາຍອັນສຳຄັນຂອງຈີນໃນການເສີມຂະຫຍາຍການພົວພັນກັບອາຊຽນ."
ຫວຽດນາມແມ່ນປະເທດປະທານຮ່ວມຂອງກອງປະຊຸມລັດຖະມົນຕີການ ຕ່າງປະເທດອາຊຽນ-ຈີນໃນຄັ້ງນີ້.ທ່ານຟາມບິ່ງມິງ ລັດຖະມົນຕີການຕ່າງປະເທດຫວຽດນາມກ່າວວ່າ,ໃນຊຸມປີມໍ່ໆມານີ້,ການຮ່ວມມືລະຫວ່າງອາຊຽນກັບຈີນໄດ້ຮັບຜົນສຳເລັດທີ່ສຳຄັນຢ່າງຫຼວງຫຼາຍ.ປີ2011,ກອງປະຊຸມສຸດຍອດຈີນ-ອາຊຽນຄັ້ງທີ14ໄດ້ຜ່ານຮັບຮອງແຜນການດຳເນີນງານໃໝ່ສົກ2011ຫາ2015ກ່ຽວກັບການປະຕິບັດຖະແຫຼງການຮ່ວມສາຍພົວພັນຄູ່ຮ່ວມມືຍຸດທະສາດທີ່ຫັນໜ້າໄປສູ່ສັນຕິພາບແລະຄວາມຈະເລີນຮຸ່ງເຮືອງລະຫວ່າງຈີນ-ອາຊຽນ.ຊຶ່ງໄດ້ລົງເລິກການພົວພັນຄູ່ຮ່ວມມືແບບຕ່າງຝ່າຍຕ່າງມີຜົນປະໂຫຍດລະຫວ່າງຈີນກັບອາຊຽນ,ແລະມີຄວາມໝາຍສຳຄັນຫຼາຍຕໍ່ສັນຕິພາບ,ສະຖຽນລະພາບແລະຄວາມຈະເລີນຮຸ່ງເຮືອງຂອງພາກພື້ນ.
ຫຼັງກອງປະຊຸມລັດຖະມົນຕີການຕ່າງປະເທດຄັ້ງນີ້ສິ້ນສຸດລົງແລ້ວ, ທ່ານນາງຟູ້ອິງ ລັດຖະມົນຕີຊ່ວຍວ່າການກະຊວງການຕ່າງປະເທດຈີນໃຫ້ສຳພາດຕໍ່ສື່ມວນຊົນວ່າ:ໃນກອງປະຊຸມລັດຖະມົນຕີການຕ່າງປະເທດອາຊຽນ-ຈີນຄັ້ງນີ້,ມີບາງປະເທດສະມາຊິກອາຊຽນສະເໜີວ່າຈະສາມາດດຳເນີນການປຶກສາຫາລືກ່ຽວກັບຫຼັກການເຄື່ອນໄຫວຢູ່ທະເລຈີນໃຕ້ຫຼືບໍ່?ທ່ານນາງຟູ້ອິງກ່າວວ່າ,ຈີນຍິນດີປຶກສາຫາລືບັນຫານີ້ໃນເວລາທີ່ມີເງື່ອນໄຂພຽບພ້ອມ,ແຕ່ວ່າຈີນກ່າວເນັ້ນວ່າ,ການປຶກສາຫາລືບັນຫາທະເລຈີນໃຕ້ຕ້ອງເຄົາລົບປະຕິບັດຕາມຖະແຫຼງການວ່າດ້ວຍການປະຕິບັດງານຂອງຝ່າຍຕ່າງໆຢູ່ທະເລຈີນໃຕ້.ນາງກ່າວວ່າ:
"ບັນຫາສຳຄັນອັນໜຶ່ງທີ່ທ່ານລັດຖະມົນຕີຢາງເຈສືກ່າວເນັ້ນມາກໍ່ແມ່ນຖະແຫຼງການວ່າດ້ວຍການປະຕິບັດງານຂອງຝ່າຍຕ່າງໆຢູ່ທະເລຈີນໃຕ້ແມ່ນຝ່າຍຕ່າງໆຮ່ວມກັນລົງນາມ,ຝ່າຍຕ່າງໆຄວນຮ່ວມກັນປະຕິບັດແລະຜັນຂະຫຍາຍນຳກັນ.ຖ້າວ່າມີບາງປະເທດບໍ່ເຄົາລົບຖະແຫຼງການ,ກໍ່ຈະບໍ່ມີຜົນດີຕໍ່ການເພີ່ມຄວາມໄວ້ເນື້ອເຊື່ອໃຈກັນ,ແລະກໍ່ບໍ່ມີຜົນດີຕໍ່ການກ້າວໄປຫາການປຶກສາຫາລືຫຼັກການປະຕິບັດງານຢູ່ທະເລຈີນໃຕ້."
