"ສະໜອງການບໍລິການໃນການລົງທຶນໃຫ້ແກ່ວິສາຫະກິດຂອງຈີນແລະອາຊຽນ"--ສຳພາດທ່ານມາມີງຊຽງ,ເລຂາທິການໃຫຍ່ສູນຈີນ-ອາຊຽນ
(GMT+08:00) 2012-07-25 16:59:47 cri
ຕາມຂ່າວ CRI:ກິດຈະກຳການເດີນທາງບັນລະຍາຍນະໂຍບາຍເຂດການຄ້າເສລີຈີນ-ອາຊຽນຢູ່ແຫ່ງຕ່າງໆຮອບທີ 2 ທີ່ມີຫົວຂໍ້ວ່າ:"ກ້າວເຂົ້າສູ່ອາຊຽນ"--ຊຸດສຳມະນາທີ່ມີຫົວຂໍ້ສະເພາະກ່ຽວກັບແຂວງຈ່ຽງຊູ່ທີ່ມີຄວາມຊີວິດຊີວາແລະອິນໂດເນເຊຍທີ່ມີຫຼາກຫຼາຍສີສັນໄດ້ຈັດຂຶ້ນຢູ່ເມືອງເຈີ້ນຈ່ຽງແຂວງຈ່ຽງຊູ່ໃນຫວ່າງກ່ອນນີ້ບໍ່ດົນ.ໃນເວລາທ່ານມາມີງຊຽງ,ເລຂາທິການໃຫຍ່ສູນຈີນ-ອາຊຽນທີ່ເປັນເຈົ້າພາບຈັດກິດຈະກຳຄັ້ງນີ້ໃຫ້ສຳພາດຕໍ່ນັກຂ່າວ CRI,ທ່ານກ່າວວ່າ,ໃນຖານະທີ່ເປັນອົງການຈັດຕັ້ງສາກົນລະຫວ່າງລັດຖະບານພຽງໜຶ່ງດຽວທີ່ສ້າງຂຶ້ນລະຫວ່າງຈີນກັບອາຊຽນ,ສູນຈີນ-ອາຊຽນຈະໃຫ້ການບໍລິການແກ່ວິສາຫະກິດຂອງຈີນແລະອາຊຽນທີ່ໄປລົງທຶນເຊິ່ງກັນແລະກັນ.
ທ່ານມາມີງຊຽງກ່າວວ່າ,ສູນຈີນ-ອາຊຽນສາມາດເສີມຂະຫຍາຍສອງບົດບາດສຳຄັນໃນການ"ກ້າວໄປສູ່ສາກົນ"ຂອງວິສາຫະກິດຈີນ,ທ່ານກ່າວວ່າ:
"ອັນທີໜຶ່ງແມ່ນສະໜອງຂໍ້ມູນຂ່າວສານທີ່ດີ,ວິໄຈສະພາບແວດລ້ອມການລົງທຶນຢູ່ຕ່າງປະເທດໃຫ້ແກ່ວົງການນັກທຸລະກິດຂອງຈີນ,ຊ່ວຍໃຫ້ເຂົາເຈົ້າເຂົ້າໃຈນະໂຍບາຍການລົງທຶນຂອງຕ່າງປະເທດ;ອັນທີສອງແມ່ນຈັດກິດຈະກຳຕ່າງໆເພື່ອຊຸກຍູ້ການຮ່ວມມືຕົວຈິງ.ດ້ານໜຶ່ງແມ່ນເຊື່ອມຕໍ່ຂະແໜງການ,ເຮັດໃຫ້ນັກທຸລະກິດຈີນສາມາດຊອກພົບຄູ່ຮ່ວມມືທີ່ໄວ້ເນື້ອເຊື່ອໃຈໄດ້,ມີກຳລັງຕົວຈິງແລະສົມຄູ່ກັນໄດ້ຢູ່ຕ່າງປະເທດ;ອີກດ້ານໜຶ່ງ,ສູນຈີນ-ອາຊຽນສາມາດສ້າງເວທີໃນການແລກປ່ຽນລະຫວ່າງວົງການນັກທຸລະກິດກັບລັດຖະບານ,ໃນການ'ກ້າວໄປສູ່ສາກົນ'ຂອງວິສາຫະກິດຈີນ,ພວກຂ້າພະເຈົ້າສາມາດພົວພັນໂດຍກົງກັບລັດຖະບານຂອງປະເທດເປົ້າໝາຍ,ເຮັດແນວນີ້ຈະສາມາດຫຼຸດຄວາມສ່ຽງໃນການລົງທຶນໃຫ້ໜ້ອຍທີ່ສຸດ."
ທ່ານມາມີງຊຽງກ່າວວ່າ,ສູນຈີນ-ອາຊຽນກໍ່ຈະໃຫ້ການບໍລິການແກ່ວິສາຫະກິດຂອງປະເທດອາຊຽນທີ່ຫຼວງຫຼາຍທີ່ຢາກມາລົງທຶນຢູ່ຈີນເຊັ່ນດຽວກັນ,ທ່ານກ່າວວ່າ:
"ສູນຈີນ-ອາຊຽນບໍ່ພຽງແຕ່ໃຫ້ການບໍລິການແກ່ວິສາຫະກິດຈີນແລະປະຊາຊົນຈີນເທົ່ານັ້ນ,ຍັງໃຫ້ການບໍລິການແກ່ວິສາຫະກິດຂອງປະເທດອາຊີອາຄະເນແລະປະຊາຊົນອາຊີອາຄະເນເຊັ່ນດຽວກັນ.ພວກເຮົາມີຊ່ອງທາງຄືແນວນີ້:ກ່ອນອື່ນ,ພວກເຮົາມີເວັບໄຊທາງການສະບັບພາສາອັງກິດ,ເວັບໄຊທີ່ໃຫ້ການບໍລິການອັນນີ້ຈະອັບເດດເລື້ອຍໆ,ສະນັ້ນ,ຈະມີຂໍ້ມູນຂ່າວສານຢ່າງຫຼວງຫຼາຍແລະຄົບຖ້ວນ,ການບໍລິການກໍ່ຍິ່ງດີຂຶ້ນ.ໃນອະນາຄົດ,ພວກເຮົາຍັງອາດຈະສ້າງເວັບໄຊດ້ວຍທຸກພາສາໃນອາຊີອາຄະເນ,ເຮັດໃຫ້ປະຊາຊົນອາຊີອາຄະເນສາມາດຮູ້ກິດຈະກຳຕ່າງໆຂອງສູນຈີນ-ອາຊຽນດ້ວຍພາສາຂອງປະເທດຕົນ,ແລະຕິດຕໍ່ພົວພັນກັບພວກເຮົາໂດຍຜ່ານເວັບໄຊ.ສຳຄັນແມ່ນໃນບາດກ້າວຕໍ່ໄປ,ພວກເຮົາຈະສ້າງສູນທີ່ເປັນຕົວແທນຢູ່ປະເທດອາຊີອາຄະເນ,ຂ້າພະເຈົ້າຫວັງວ່າ,ໃນອະນາຄົດ,ຈະສ້າງສູນທີ່ເປັນຕົວແທນຢູ່ທຸກປະເທດຂອງອາຊີອາຄະເນ,ນີ້ຈະມີຜົນດີຕໍ່ການເຮັດໃຫ້ການບໍລິການຂອງພວກເຮົາໃກ້ຊິດກັບປະຊາຊົນປະເທດເຫຼົ່ານີ້ຫຼາຍກວ່າເກົ່າ."