ສຳນັກງານໃຫຍ່ອາຊຽນດຶງດູດຄະນະນັກການທູດຈຳນວນຫຼວງຫຼາຍໄປປະຈຳຖາວອນ
(GMT+08:00) 2012-08-07 17:07:27 cri
ໜັງສືພິມປະຊາຊົນລາຍວັນຂອງຈີນລາຍງານວ່າ:ວັນທີ6ສິງຫານີ້,ທ່ານນາງຢາງຊິ້ວຜິງ ເອກອັກຄະລັດຖະທູດຈີນປະຈຳອາຊຽນຜູ່ທຳອິດໄດ້ຍື່ນໜັງສືແຕ່ງຕັ້ງໃຫ້ດຳລົງຕຳແໜ່ງຕໍ່ທ່ານສຸລິນ ພິດສຸວັນ ເລຂາທິການໃຫຍ່ອາຊຽນຢູ່ສຳນັກງານໃຫຍ່ອາຊຽນ.
ສຳນັກງານໃຫຍ່ອາຊຽນຕັ້ງຢູ່ນະຄອນຫຼວງຈາກາກຕາຂອງອິນໂດເນເຊຍ,ໂດຍແມ່ນທ່ານຊູຮາໂຕ ປະທານາທິບໍດີອິນໂດເນເຊຍຕາງໜ້າລັດຖະບານອິນໂດເນເຊຍມອບໃຫ້ອາຊຽນໃນປີ1976.ພາກສ່ວນຈຳນວນໜຶ່ງຂອງສຳນັກງານໃຫຍ່ອາຊຽນຈະຍ້າຍເຂົ້າໄປຢູ່ຕຶກໃຫຍ່ອີກແຫ່ງໜຶ່ງທີ່ລັດຖະບານອິນໂດເນເຊຍບໍລິຈາກໃຫ້.
ປະຈຸບັນ,ຈຳນວນຄະນະນັກການທູດຂອງປະເທດສະມາຊິກ,ປະເທດຄູ່ເຈລະຈາຂອງອາຊຽນແລະປະເທດອື່ນໆໄດ້ເພີ່ມຂຶ້ນຫຼາຍກວ່າ1ເທົ່າ.ໃນເມື່ອກ່ອນ,ຫຼາຍປະເທດລ້ວນແຕ່ໃຫ້ເອກອັກຄະລັດຖະທູດຂອງຕົນທີ່ປະຈຳອິນໂດເນເຊຍນັ້ນດຳລົງຕຳແໜ່ງເປັນເອກອັກຄະລັດຖະທູດອາຊຽນໄປພ້ອມ.ໃນຊຸມປີມໍ່ໆມານີ້,ມີຫຼາຍປະເທດໄດ້ແຕ່ງຕັ້ງເອກອັກຄະລັດຖະທູດສະເພາະປະຈຳອາຊຽນ.ປະຈຸບັນ,ຢ່າງໜ້ອຍມີ64ປະເທດແລະອົງການຈັດຕັ້ງສາກົນໄດ້ຕັ້ງຄະນະການທູດຖາວອນປະຈຳອາຊຽນແລ້ວ.ປີ2012,ຈີນໄດ້ຕັ້ງຄະນະການທູດຖາວອນປະຈຳອາຊຽນ.
ປະຈຸບັນ,ກອງເລຂາອາຊຽນມີ4ພາກສ່ວນຊຶ່ງຮັບຜິດຊອບການປະຕິບັດງານກ່ຽວກັບປະຊາຄົມເສດຖະກິດ,ປະຊາຄົມຄວາມໝັ້ນຄົງດ້ານການເມືອງ,ປະຊາຄົມວັດທະນະທຳສັງຄົມແລະວຽກງານສາທາລະນະ.ປະຈຸບັນ,ກອງເລຂາອາຊຽນມີພະນັກງານທັງໝົດ237ຄົນ,ຄາດວ່າຍອດຈຳນວນພະນັກງານຈະມີເຖິງ300ຄົນ.ເນື່ອງຈາກວ່າຂາດພະນັກງານເຮັດວຽກ,ກອງເລຂາອາຊຽນພວມວາງແຜນຈະເພີ່ມພະນັກງານຕື່ມອີກ.