ຕຳຫຼວດໄທເລັ່ງເກັບກຳຫຼັກຖານຂອງຄະດີສະເທືອນຂວັນ"5ຕຸລາ"ທີ່ເກີດຂຶ້ນຢູ່ແມ່ນ້ຳຂອງ
(GMT+08:00) 2012-08-09 16:59:56 cri
CRIລາຍງານວ່າ:ສື່ມວນຊົນໄທລາຍງານໃນວັນທີ8ສິງຫານີ້ວ່າ,ໂດຍຕອບສະໜອງຕາມຄຳເຊີນຂອງເຈົ້າໜ້າທີ່ຕຳຫຼວດຈີນ,ຄະນະຜູ່ແທນນາຍຕຳຫຼວດຂັ້ນສູງຂອງໄທທີ່ນຳໂດຍພົນຕຳຫຼວດເອກ ປານສິຣິ ປຼະພາວັດ ຮອງຜູ່ບັນຊາການຕຳຫຼວດແຫ່ງຊາດໄທພວມສອບສວນຜູ່ຕ້ອງຫາຕົ້ນຕໍ3ຄົນເຊັ່ນທ້າວໜໍ່ຄຳທີ່ກໍ່ຄະດີສັງຫານລູກເຮືອຈີນຕາມລຳແມ່ນ້ຳຂອງໃນວັນທີ5ຕຸລາປີຜ່ານມາ,ເພື່ອເກັບກຳຫຼັກຖານລະອຽດແລະຄົບຖ້ວນຫຼາຍກວ່າເກົ່າເພື່ອໃຊ້ເປັນຫຼັກຖານ ກ່າວຟ້ອງທະຫານໄທ9ຄົນທີ່ມີສ່ວນກ່ຽວຂ້ອງກັບຄະດີເພື່ອນຳມາລົງໂທດຕາມກົດໝາຍໂດຍໄວ.
ວັນທີ5ຕຸລາປີ2011ຜ່ານມາ,ກ່ຳປັ່ນບັນທຸກສິນຄ້າຂອງຈີນ2ລຳຖືກໂຈມຕີຢູ່ຕາມລຳແມ່ນ້ຳຂອງໃນເຂດນ່ານນ້ຳຈັງຫວັດຊຽງຣາຍປະເທດໄທບໍລິເວນເຂດສາມຫຼ່ຽມຄຳ,ເຮັດໃຫ້ລູກເຮືອ13ຄົນເສຍຊີວິດໝົດ.ພາຍຫຼັງເຫດການເກີດຂຶ້ນແລ້ວ,ເຈົ້າໜ້າທີ່ຕຳຫຼວດໄທໄດ້ແຈ້ງສະພາບຄະດີໃຫ້ຈີນຊາບໂດຍໄວແລະຈັດຕັ້ງຄະນະນິຕິແພດຊັນນະສູດສົບແລ້ວພົບວ່າຜູ່ເສຍຊີວິດລ້ວນແຕ່ແມ່ນຖືກຍິງສັງຫານຈາກໄລຍະໃກ້.
ພາຍຫຼັງເຫດການສະເທືອນຂວັນ"5ຕຸລາ"ເກີດຂຶ້ນແລ້ວ,ລັດຖະບານໄທໄດ້ໃຫ້ຄວາມສຳຄັນຫຼາຍຕໍ່ຄະດີນີ້,ທ່ານນາງຍິ່ງລັກ ຊິນນະວັດ ນາຍົກລັດຖະມົນຕີໄທຮູ້ສຶກເສຍໃຈທີ່ສຸດຕໍ່ລູກເຮືອຈີນທີ່ຖືກສັງຫານຢູ່ແມ່ນ້ຳຂອງ,ນາງກ່າວວ່າລັດຖະບານໄທຈະສອບສວນຄະດີຢ່າງຈະແຈ້ງ,ລົງໂທດຜູ່ກໍ່ເຫດຕາມກົດໝາຍແລະຍິນດີເພີ່ມທະວີການຮ່ວມມືກັບຈີນແລະປະເທດທີ່ກ່ຽວຂ້ອງ,ຮັບປະກັນຄວາມປອດໄພໃນການເດີນເຮືອຕາມລຳແມ່ນ້ຳຂອງ.
ພາຍຫຼັງເຫດການເກີດຂຶ້ນແລ້ວ,ເຈົ້າໜ້າທີ່ຕຳຫຼວດໄທໄດ້ສ້າງຕັ້ງໜ່ວຍງານສອບສວນຄະດີນີ້ໂດຍສະເພາະແມ່ນຮອງຜູ່ບັນຊາການຕຳຫຼວດແຫ່ງຊາດໄທທ່ານໜຶ່ງເປັນຫົວໜ້າເພື່ອຮັບຜິດຊອບໃນການສອບສວນຄະດີ.ພາຍຫຼັງລົງຢ້ຽມຢາມປະຊາຊົນທີ່ຢູ່ໃກ້ສະຖານທີ່ເກີດເຫດແລະການສຳຫຼວດດ້ານອື່ນໆ.ຕຳຫຼວດໄທສອບສວນແລ້ວພົບວ່າ,ກຸ່ມຄ້າຢາເສບຕິດໜໍ່ຄຳຂອງມຽນມາເປັນໜ້າສົງໃສຫຼາຍໃນການກໍ່ຄະດີ.ທະຫານ9ຄົນຈາກຄ້າຍທະຫານຜາເມືອງທີ່ຂຶ້ນກັບເຂດທະຫານພາກ3ຂອງໄທຖືກສົງໄສວ່າໄດ້ຮ່ວມກັບກຸ່ມຄ້າຢາເສບຕິດໜໍ່ຄຳກໍ່ຄະດີສະເທືອນຂວັນຄັ້ງນີ້.ຄົນໄທທີ່ຊື່ໂອລັນ ເປັນຜູ່ຕິດຕໍ່ພົວພັນໃຫ້ແກ່ກຸ່ມຄ້າຢາເສບຕິດໜໍ່ຄຳກັບທະຫານໄທທີ່ມີສ່ວນກ່ຽວຂ້ອງກໍ່ຄະດີ,ປະຈຸບັນ,ທ້າວໂອລັນກຳລັງຫຼົບໜີການຈັບກຸມຢູ່.ລູກເຮືອຈີນທີ່ປະສົບເຄາະຮ້າຍບໍ່ໄດ້ມີສ່ວນກ່ຽວພັນກັບຢາເສບຕິດທີ່ພົບຢູ່ເທິງເຮືອ,ຢາເສບຕິດແມ່ນມີຄົນເອົາມາວາງໄວ້ໃນເຮືອຕາມພາຍຫຼັງ.ຕຳຫຼວດໄທຍັງກ່າວເນັ້ນວ່າ,ການກໍ່ອາຊະຍາກຳຂອງທະຫານໄທ9ຄົນໃນຄະດີນີ້ແມ່ນເປັນການກະທຳສ່ວນຕົວ.
ຫຼັງຈາກນັ້ນ,ເຈົ້າໜ້າທີ່ຕຳຫຼວດໄທໄດ້ອອກຄຳສັ່ງນຳຈັບທະຫານໄທ9ຄົນດັ່ງກ່າວ,ແຕ່ການສອບສວນຕໍ່ທະຫານໄທເຫຼົ່ານີ້ບໍ່ມີຄວາມຄືບໜ້າພໍປານໃດ,ທະຫານເຫຼົ່ານີ້ເວົ້າກ່າວປະຕິເສດດ້ວຍຄວາມໝັ້ມໃຈວ່າເຂົາເຈົ້າບໍ່ໄດ້ມີສ່ວນຮ່ວມໃນການສັງຫານລູກເຮືອຈີນ.ສ່ວນການສະແດງອອກຂອງ ເຈົ້າໜ້າທີ່ຂັ້ນສຳຂອງທະຫານໄທບາງຄົນນັ້ນເຫັນວ່າເປັນໜ້າຄິດຫຼາຍ.ວັນທີ29ມິຖຸນາຜ່ານມານີ້,ໃນເວລາໃຫ້ສຳພາດຕໍ່ນັກຂ່າວກ່ຽວກັບຄະດີນີ້,ພົນເອກປຼາຢຸດ ຈັນ ໂອຊາ ຜູ່ບັນຊາການ ກອງທັບບົກໄທກ່າວວ່າ:"ປະຈຸບັນ,ຄະດີຍັງຢູ່ໃນຂັ້ນຕອນສືບສວນຢູ່,ຖ້າວ່າເຂົາເຈົ້າຖືກຕັດສິນວ່າກະທຳຜິດແທ້,ເຂົາເຈົ້າກໍ່ມີໂທດແທ້,ພວກຂ້າພະເຈົ້າຈະບໍ່ເຂົ້າຂ້າງຜູ່ກະທຳຜິດ,ແຕ່ບັນຫາມີຢູ່ວ່າ,ປະຈຸບັນຍັງບໍ່ທັນສາມາດຢືນຢັນໄດ້ວ່າເຂົາເຈົ້າໄດ້ກະທຳຜິດຫຼືບໍ່.ຖ້າວ່າແມ່ນຍ້ອນມີຄວາມຜິດພາດໃນການປະຕິບັດງານ,ຫາກບໍ່ແມ່ນບັນຫາຂອງສ່ວນບຸກຄົນ,ກໍ່ຕ້ອງເບິ່ງແຍງເຂົາເຈົ້າ."
ສາມາດເຫັນໄດ້ວ່າ,ການສອບສວນທະຫານໄທ9ຄົນທີ່ມີສ່ວນກ່ຽວຂ້ອງກັບຄະດີຂອງເຈົ້າໜ້າທີ່ຕຳຫຼວດໄທນັ້ນແມ່ນດຳເນີນໄປບໍ່ຄ່ອຍສະດວກປານໃດ.ເພື່ອຊອກໄດ້ຫຼັກຖານຫຼາຍກວ່າເກົ່າໂດຍໄວ,ໃນໄລຍະນີ້,ຕຳຫຼວດໄທໄດ້ເພີ່ມທະວີການແລກປ່ຽນຄວາມເຫັນແລະຮ່ວມມືກັບເຈົ້າໜ້າທີ່ຕຳຫຼວດຈີນເພື່ອສາມາດກ່າວຟ້ອງຕໍ່ທະຫານໄທ9ຄົນດັ່ງກ່າວໂດຍໄວ.