ມຽນມາສະແຫວງຫາການເຂົ້າຮ່ວມການຊ້ອມຮົບຮ່ວມ"ຈົງອາງຄຳ"
(GMT+08:00) 2012-08-23 17:25:51 cri
ຫວ່າງມໍ່ໆມານີ້,ໃນເວລາໃຫ້ສຳພາດຕໍ່ນັກຂ່າວໄທ,ທ່ານສຸກຳພົນ ສຸວັນນະທັດລັດຖະມົນຕີວ່າການກະຊວງປ້ອງກັນປະເທດໄທໃຫ້ຮູ້ວ່າ,ລັດຖະບານມຽນມາ ມີຈຸດປະສົງຈະເຂົ້າຮ່ວມການຊ້ອມຮົບຮ່ວມ"ຈົງອາງຄຳ"ທີ່ອາເມລິກາແລະໄທຈະຮ່ວມກັນດຳເດີນໃນປີໜ້າ.
ການຊ້ອມຮົບ"ຈົງອາງຄຳ"ແມ່ນການຊ້ອມຮົບຮ່ວມຫຼາຍປະເທດທີ່ມີຂະໜາດໃຫຍ່ທີ່ສຸດໃນພາກພື້ນອາຊີອາຄະເນຊຶ່ງມີອາເມລິກາເປັນຜູ່ນຳພາ,ອາເມລິກາແລະໄທຮ່ວມກັນເປັນເຈົ້າພາບຈັດຂຶ້ນ.ທຳອິດ,ມີພຽງແຕ່ອາເມລິກາແລະໄທເຂົ້າຮ່ວມເທົ່ານັ້ນ,ແຕ່ຕໍ່ມາຫຼາຍປະເທດອາຊີອາຄະເນເຊັ່ນຟີລິບປິນ,ສິງກະໂປ,ອິນໂດເນເຊຍ,ມະເລເຊຍແລະຫວຽດນາມກໍ່ໄດ້ພາກັນເຂົ້າຮ່ວມ.ກອງປ້ອງກັນຕົວຍີ່ປຸ່ນແລະກອງທັບສ.ເກົາຫຼີກໍ່ໄດ້ເຂົ້າຮ່ວມການຊ້ອມຮົບຮ່ວມນີ້ເປັນປະຈຳ.ສ່ວນການຊ້ອມຮົບຮ່ວມ"ຈົງອາງຄຳ"ທີ່ຈັດຂຶ້ນໃນເດືອນກຸມພາປີນີ້ແມ່ນຄັ້ງທີ່ມີຂະໜາດໃຫຍ່ທີ່ສຸດນັບຕັ້ງແຕ່ເລີ່ມມີການຊ້ອມຮົບຮ່ວມເປັນຕົ້ນມາ.
ທາງດ້ານການທະຫານແລ້ວ,ລະບົບອາວຸດຍຸດໂທປະກອນແລະປະຫວັດການຝຶກຊ້ອມຂອງກອງທະຫານທີ່ເຂົ້າຮ່ວມການຊ້ອມຮົບນັ້ນລ້ວນແຕ່ເປັນແບບອາເມລິກາ,ມີມາດຕະຖານດຽວກັນ,ຊຶ່ງສ້າງຄວາມສະດວກໃຫ້ແກ່ການປະສານສົມທົບກັນໃນເວລາຊ້ອມຮົບຮ່ວມ.ແລະກໍ່ມີຄຸນຄ່າຕົວຈິງໃນການສູ້ຮົບໃນອະນາຄົດ.
ສ່ວນລະບົບອາວຸດຍຸດໂທປະກອບຂອງກອງທັບມຽນມາແມ່ນສັບສົນສົມຄວນ,ຍ້ອນນຳເຂົ້າມາຈາກຫຼາຍປະເທດ,ເມື່ອທຽບກັບອາເມລິກາແລະໄທແລ້ວມຽນມາຍັງມີລະດັບຫຼ້າຫຼັງ.ລະບົບບັນຊາການຝຶກຊ້ອມທະຫານຂອງມຽນມາກໍ່ຕ່າງກັບກອງທະຫານອາເມລິກາຢ່າງຫຼວງຫຼາຍ,ຍາກທີ່ຈະປະສານສົມທົບກັບກອງທະຫານປະເທດອື່ນໃຫ້ດີ.ເຖິງວ່າມຽນມາຈະໄດ້ສົ່ງທະຫານເຂົ້າຮ່ວມການຊ້ອມຮົບຮ່ວມກໍ່ຕາມ,ແຕ່ຈຳນວນທະຫານກໍ່ຈະບໍ່ຫຼາຍປານໃດ.ແຕ່ວ່າ,ມຽນມາເຂົ້າຮ່ວມການຊ້ອມຮົບ"ຈົງອາງຄຳ"ເທື່ອນີ້ຕົ້ນຕໍເພື່ອຊອກຫາປະສົບການເທົ່ານັ້ນ.