ຮົງກົງເຂົ້າເປັນສະມາຊິກເຂດການຄ້າເສລີຈີນ-ອາຊຽນຈະຊ່ວຍໃຫ້ພາກພື້ນນີ້ມີການພັດທະນາແບບຕ່າງຝ່າຍຕ່າງມີຜົນປະໂຫຍດ
(GMT+08:00) 2012-08-28 16:19:25 cri
ຂ່າວສານຊິນຮວາລາຍງານວ່າ:ກອງປະຊຸມຕ່າງໆຂອງລັດຖະມົນຕີເສດຖະກິດອາຊຽນຄັ້ງທີ44ທີ່ເລີ່ມຈັດຂຶ້ນມາແຕ່ວັນທີ27ສິງຫານີ້ຢູ່ນະຄອນຊຽມຣຽບຂອງກຳປູເຈຍມີຫົວຂໍ້ປຶກສາຫາລື ໜຶ່ງເວົ້າກ່ຽວກັບເຂດບໍລິຫານພິເສດຮົງກົງຂອງຈີນເຂົ້າເປັນສະມາຊິກເຂດການຄ້າເສລີຈີນ-ອາຊຽນ.ຜົນການຄົ້ນຄວ້າສະແດງໃຫ້ເຫັນວ່າ,ຖ້າວ່າຮົງກົງເຂົ້າຮ່ວມເຂດການຄ້າເສລີຈີນ-ອາຊຽນຈະມີຜົນດີຕໍ່ການເພີ່ມທະວີເສດຖະກິດໃນພາກພື້ນເຊື່ອມໂຍງເຂົ້າກັນຕື່ມອີກ,ສ້າງໂອກາດການພັດທະນາແບບຕ່າງຝ່າຍຕ່າງມີຜົນປະໂຫຍດໃຫ້ແກ່ຈີນແຜ່ນດິນໃຫຍ່,ຮົງກົງແລະບັນດາປະເທດອາຊຽນ.
ຕາມການຄົ້ນຄວ້າເຫັນວ່າ,ຮົງກົງເຂົ້າເປັນສະມາຊິກເຂດການຄ້າເສລີຈີນ-ອາຊຽນຍັງຈະສາມາດນຳເອົາຜົນປະໂຫຍດມາໃຫ້ການພັດທະນາຂອງອາຊຽນໃນດ້ານຕ່າງໆເຊັ່ນຂະແໜງການການເງິນ,ການບໍລິການທາງດ້ານວິຊາການ,ວິທະຍາສາດເຕັກໂນໂລຊີຂໍ້ມູນຂ່າວສານແລະການສື່ສານ,ໂຮງແຮມ,ການທ່ອງທ່ຽວແລະອະສັງຫາລິມະຊັບ.ຄາດວ່າວິສາຫະກິດຈີນແຜ່ນດິນໃຫຍ່ທີ່ຈຳໜ່າຍບັດຫຸ້ນສ່ວນຢູ່ຮົງກົງນັ້ນຈະເພີ່ມການລົງທຶນໃນອາຊຽນໃຫ້ຫຼາຍຂຶ້ນຢ່າງຕໍ່ເນື່ອງແລະສ້າງໂອກາດໃນການຊອກຫາວຽກເຮັດງານທຳໃຫ້ພາກພື້ນອາຊຽນໃຫ້ຫຼາຍຂຶ້ນກວ່າເກົ່າ.
ນອກນີ້,ຮົງກົງເຂົ້າຮ່ວມເຂດການຄ້າເສລີຈີນ-ອາຊຽນຈະກະຕຸ້ນການເຕີບໂຕໃຫ້ຮົງກົງເປັນຜູ່ຄ້າມືກາງ,ມີຜົນດີຕໍ່ຮົງກົງເປີດກວ້າງການບໍລິການທາງດ້ານວິຊາສະເພາະ.ຍ້ອນໄດ້ຮັບຜົນປະໂຫຍດທີ່ບໍ່ຕ້ອງເສຍພາສີ,ມູນຄ່າການຄ້າພາຍໃນເຂດການຄ້າເສລີຈະເພີ່ມຂຶ້ນຕື່ມອີກ,ຊຶ່ງມີຜົນດີຕໍ່ຮົງກົງໃນການປັບປຸງຖານະທີ່ເປັນສູນການຄ້າແລະການຂົນສົ່ງທາງນ້ຳ.ວິສາຫະກິດຂອງປະເທດຕ່າງໆໃນອາຊຽນກໍ່ອາດຈະສ້າງຕັ້ງສຳນັກງານໃຫຍ່ຢູ່ຮົງກົງໃຫ້ຫຼາຍຂຶ້ນກວ່າເກົ່າເພື່ອນຳໃຊ້ການບໍລິການທາງດ້ານການເງິນແລະວິຊາສະເພາະຂອງຮົງກົງລະດົມທຶນເພື່ອຈຳໜ່າຍບັດຫຸ້ນສ່ວນໃນຕະຫຼາດ,ພັດທະນາກິດຈະການຄຸ້ມຄອງຊັບສິນແລະອື່ນໆ,ຊ່ວຍຮົງກົງເປີດກວ້າງຂະແໜງການການເງິນແລະການບໍລິການທາງດ້ານວິຊາການຕ່າງໆຕື່ມອີກ.
ທ່ານຊ້າຍກວ້ານເຊິ່ນ ປະທານສະມາຄົມການຄ້າຈີນຮົງກົງຊີ້ອອກວ່າ,ຮົງກົງແມ່ນທາງຜ່ານອັນສຳຄັນໃນການຄ້າລະຫວ່າງຈີນກັບອາຊຽນຕະຫຼອດມາ,ຖ້າວ່າຮົງກົງເຂົ້າເປັນສະມາຊິກເຂດການຄ້າເສລີຈີນ-ອາຊຽນ,ກໍ່ຈະສາມາດເສີມຂະຫຍາຍບົດບາດສື່ກາງຂອງຮົງກົງໄດ້ຢ່າງມີປະສິດທິຜົນສູງກວ່າເກົ່າ,ແລະກໍ່ສາມາດນຳໃຊ້ທ່າແຮງຕ່າງໆຂອງຮົງກົງເຊັ່ນຮົງກົງເປັນສູນການເງິນສາກົນເພື່ອໃຫ້ການບໍລິການດ້ານວິຊາການເຊັ່ນການເງິນແລະການຄຸ້ມຄ້ອງບໍລິຫານໃຫ້ແກ່ການຄ້າແລະການລົງທຶນລະຫວ່າງຈີນແຜ່ນດິນໃຫຍ່ ກັບອາຊຽນ,ຮ່ວມກັນຊຸກຍູ້ການຮ່ວມມືໃນທົ່ວພາກພື້ນເພື່ອເຮັດໃຫ້ຕ່າງຝ່າຍຕ່າງໄດ້ຮັບຜົນປະໂຫຍດ.