ບົດບັນທຶກປະຈຳວັນຂອງນັກຂ່າວທີ່ຕິດຕາມຂະບວນລົດແລ່ນລີຈີນອາຊຽນ
ສະບາຍດີທ່ານຜູ້ອ່ານ, ພົບກັນໃນຕອນເຊົ້າວັນທີ 24 ສິງຫາ, ລັດຕະນະຈະພາ ທ່ານເດີນທາງປະເທດທີ 4 ກັບຂະບວນລົດແລ່ນລີ້ຈີນ-ອາຊຽນ, ເຊິ່ງກໍ່ຄື: ປະເທດມາເລເຊຍ. ມາເລເຊຍເປັນປະເທດທີ່ລັດຕະນະຝັນຢາກໄປແລະຫຼາຍທ່ານຄົງຈະຄິດເຊັ່ນ ກັນ, ເພາະເປັນປະເທດມີຄວາມກ້າວໜ້າສໍາລັບທຸລະກິດການທ່ອງທ່ຽວ, ເປັນປະເທດທີ່ມີຫຼາກຫຼາຍທາງດ້ານວັດທະນະທໍາທີ່ແຕກຕ່າງກັນ.
ຂະບວນລົດເລີ່ມອອກເດີນທາງແຕ່ເຊົ້າຈາກຈັງຫວັດຫາດໃຫຍ່ໄປຫາປະເທດມາເລເຊຍ ໂດຍຜ່ານດ່ານສະເດົາເປັນດ່ານຊາຍແດນໄທມາເລເຊຍ, ພໍໄດ້ຂ້າມໄປຮອດຝັ່ງມາເລເຊຍ, ກໍ່ເຮັດໃຫ້ຫຼາຍຄົນເຊົາຄວາມອິດເມື່ອຍໃນທັນທີ, ເພາະວ່າຄວາມງົດງາມຂອງພາບທໍາມະຊາດມາເລເຊຍເຮັດໃຫ້ຄົນຫຼົງໄຫຼ, ບວກກັບພາບບັນຍາກາດງາມໆ, ອາກາດກໍສະບາຍໆ.
ຈາກນັ້ນຂະບວນລົດໄດ້ເດີນທາງຈາກຊາຍແດນໄທ-ມາເລເຊຍໄປຫາກົວລາລໍາເປີເມືອງຫຼວງຂອງປະເທດມາເລເຊຍ, ໄລຍະທາງປະມານ 580 ກິໂລແມັດ. ເສັ້ນທາງສັນຈອນຂອງມາເລເຊຍງາມ, ສະດວກສະບາຍ, ຂະບວນເດີນທາງໄກ້ຈະຮອດຕົວເມືອງເທົ່າໃດຍິ່ງເຫັນຄວາມຈະເລີນຫຼາຍ, ເປັນຕົ້ນແມ່ນເສັ້ນທາງການສັນຈອນ, ເຮືອນຊານບ້ານຊ່ອງ, ເຮັດໃຫ້ຫຼາຍຄົນຕື່ນເຕັ້ນໄປນໍາການເດີນທາງໃນຄັ້ງນີ້. ຄົນມາເລເຊຍສ່ວນຫຼາຍກໍຄ້າຍຄືກັບຄົນພາກໄຕ້ຂອງໄທເປັນຕົ້ນແມ່ນພາສາ, ວັດທະນະທໍາ, ການນຸ່ງຖືຕະຫຼອດຮອດການດໍາລົງຊີວິດ ສ່ວນຫຼາຍຈະຄ້າຍຄືກັນ.
