ສະບາຍດີທ່ານຜູ້ອ່ານຮ່າ…ຮ່າ…ພົບກັນອີກແລ້ວກັບລັດຕະນະກັບຄວາມຄືບໜ້າຂອງການເດີນທາງຂະບວນລົດແລ່ນລີ້ຈີນ-ອາຊຽນທີ່ໄກ້ຈະນັບຖອຍຫຼັງແລ້ວຍັງເຫຼືອພຽງບໍ່ພໍເທົ່າໃດມື້, ເຊົ້າມື້ນີ້ຂະບວນລົດເລີ່ມອອກເດີນທາງແຕ່ເຊົ້າຈາກທີ່ພັກຢູ່ມາເລເຊຍໄປໄທ. ລະຫວ່າງທາງໄດ້ພັກຜ່ອນເອົາແຮງ, ແລ້ວເດີນທາງຕໍ່. ຕອນສວຍໄດ້ກິນເຂົ້າທີ່ເມືອງຕັງ, ປະຈຸບັນ, ຂະບວນພວກເຮົາໄປຮອດຈັງຫວັດສຸລາດທານີ ພາກໄຕ້ຂອງໄທເປັນທີ່ຮຽບຮ້ອຍແລ້ວ, ໂດຍຜ່ານດ່ານສະເດົາຊາຍແດນລະຫວ່ງໄທກັບມາເລເຊຍ, ໄລຍະທາງພຽງແຕ່ປະມານ 580 ກິໂລແມັດເທົ່ານັ້ນ.
ສໍາລັບຈັງຫວັດສຸລາດທານີ, ລັດຕະນະເຄີຍພາທ່ານຜ່ານມາແລ້ວໃນໄລຍະເດີນທາງຕອນໄປນັ້ນລະ, ຈັງຫວັດສຸລາດທານີຂອງປະເທດໄທເປັນແຂວງໜື່ງທີ່ມີພູມສັນຖານພູຜາປ່າໄມ້ຫຼາຍ, ການທໍາມາຫາກິນບໍ່ຕ່າງຫຍັງກັບປະເທດມາເລເຊຍ,ເພາະມີຊາຍແດນຕິດກັນ, ວັດທະນະທໍາຫຼາກຫຼາຍສີສັນ, ການດໍາລົງຊີວິດ, ອາຫານການກິນ, ເຮືອນຊານບ້ານຊ່ອງແລະອື່ນໆເກືອບວ່າບໍ່ມີຫຍັງຕ່າງກັນ. ການເດີນທາງມື້ນີ້ເຖິງວ່າໄລຍະທາງບໍ່ໄກ, ແຕ່ຫຼາຍຄົນກໍ່ເລີ່ມອ່ອນເພຍ, ເພາະໄລຍະທາງແຕ່ລະມື້ບວກກັນຖືວ່າກາຍເຄິ່ງແລ້ວ, ແລະໄກສົມຄວນ, ແລະຍັງຈະເດີນທາງໄປຕາມພາກໄຕ້ຂອງລາວອີກ, ຜ່ານກໍາປູເຈ້ຍ, ຫວຽດນາມ, ກັບຄືນຮອດໜານໜິງປະເທດຈີນຈື່ງຈະຈົບ.ສໍາລັບການເດີນທາງຂອງຂະບວນລົດແລ່ນລີ້ໃນຄັ້ງນີ້, ປັດຈຸບັນແມ່ນເດີນທາງມາໄດ້ 13 ວັນແລ້ວ, ແຕ່ໜ້າເສຍດາຍ, ບ່ອນທີ່ພັກໄກຈາກຕົວເມືອງ, ລັດຕະນະເລີຍບໍ່ໄດ້ຖ່າຍຮູບໃຫ້ທ່ານຜູ້ອ່ານໄດ້ເບິ່ງ, ມື້ນີ້ເລີຍພັກເອົາແຮງກ່ອນ, ມື້ອື່ນລັດຕະນະຈະພາທ່ານໄປຫຼິ້ນທະເລຢູ່ພັດທະຍາ ຕ້ອງເດີນທາງອີກປະມານ 810 ກິໂລແມັດແຕ່ເຊົ້າໆ. ສໍາລັບມື້ນີ້ບາຍໆ.
© China Radio International.CRI. All Rights Reserved. 16A Shijingshan Road, Beijing, China. 100040 |