ບົດບັນທຶກປະຈຳວັນຂອງນັກຂ່າວທີ່ຕິດຕາມຂະບວນລົດແລ່ນລີຈີນອາຊຽນ
ສະບາຍດີທ່ານຜູ້ອ່ານຮ່າ… ຮ່າ… ພົບກັນອີກແລ້ວກັບລັດຕະນະທີ່ຈັງຫວັດສຸລາດທານີທີ່ປະເທດໄທ, ຫຼັງຈາກພັກເອົາແຮງເປັນທີ່ຮຽບຮ້ອຍແລ້ວ, ລັດຕະນະຈະພາທ່ານເດີນທາງແຕ່ເຊົ້າໆໄປພັດທະຍາເພື່ອເບິ່ງຕາເວັນລັບຂອບຟ້າ. ເມືອງພັດທະຍາຖືວ່າເປັນແຫຼ່ງທ່ຽວທ່ອງທີ່ສໍາຄັນອີກແຫ່ງໜື່ງ, ດັ່ງທີ່ສັນຍາກັບຜູ້ອ່ານຫັ້ນລະ! ຫຼັງຈາກທີ່ຮັບປະທານອາຫານເຊົ້າເປັນທີ່ຮຽບຮ້ອຍແລ້ວ, ແຕ່ລະຄົນກໍກຽມເດີນທາງຄືດັ່ງທຸກມື້, ແຕ່ມື້ນີ້ອ່າວເດີນທາງແຕ່ເຊົ້າໆແດ່, ເພາະໄລຍະທາງໄກຫຼາຍປະມານ 810 ກິໂລແມັດ, ລະຫວ່າງການເດີນທາງ, ໄດ້ເບິ່ງທັດສະນີຍະພາບສອງຂ້າງທາງ, ການດໍາລົງຊີວິດຂອງປະຊາຊົນ, ສອງຝາກທາງມີຮ້ານຂາຍເຄື່ອງສະລັບກັບຕືກແຖວວາງເດຍລະດາດ, ການທໍາມາຫາກິນຂອງຄົນຢູ່ນີ້ກໍບໍ່ຕ່າງຫຍັງກັບປະເທດລາວ, ຕື່ນເຊົ້າມາກໍໄປຮີບເຮັດໜ້າທີ່ຂອງໃຜລາວ, ຊາວຄ້າຊາວຂາຍໄດ້ຂົນເຄື່ອງອອກໄປຂາຍ, ຜູ້ເຮັດວຽກກໍ່ເລີ່ມໄປວຽກຂອງໃຜລາວ, ແລະຫຼາຍໆປະເທດກໍ່ຈະເປັນເຊັ່ນດຽວກັນນີ້ລະ. ພໍຄໍ່າມາ, ກໍ່ກັບຄືນເຮືອນຂອງໃຜງລາວ. ເອົາ, ເວົ້າໄປໄກແລ້ວ! ທ່ານພ້ອມທີ່ຈະເດີນທາງໄປກັບລັດຕະນະຫຼືຍັງລະ! ຕອນສວຍ, ຂະບວນລົດໄດ້ພັກກິນເຂົ້າທີ່ຊົນບູລີ, ຄ້າຍກັບອາຫານທຸກມື້ນັ້ນລະເປັນອາຫານແບບຟູດ. ເປັນຕົ້ນແມ່ນກຸ້ງ, ຫອຍ, ຂົ້ວພັກ, ແລະທີ່ຂາດບໍ່ໄດ້ແມ່ນຕົ້ມຍໍາອານຫານທະເລແລະອື່ນໆ.
ຫຼັງຈາກຮັບປະທານອາຫານທ່ຽງແລ້ວ, ຂະບວນລົດກໍ່ເລີຍເຄື່ອນອອກຈາກຊົນບູລີເພື່ອເດີນທາງໄປຈຸດໝາຍກໍ່ຄືເມືອງພັດທະຍາ, ແຕ່ໜ້າເສຍດາຍ, ມື້ນີ້ຂະບວນລົດພວກເຮົາເກີດບັນຫາໃນລະຫວ່າງການເດີນທາງ, ຈຶ່ງເສຍດາຍທີ່ບໍ່ໄດ້ພາທ່ານເລາະທ່ຽວເມືອງພັດທະຍາຕາມທີ່ສັນຍາກັບທ່ານຜູ້ອ່ານ, ແຕ່ໂຊກດີທີ່ຂະບວນລົດເຮົາກໍ່ມີຜູ້ເກັ່ງທາງດ້ານການແປງລົດ, ໃຊ້ບໍ່ເທົ່າໃດຊົ່ວໂມງກໍ່ແປງໃຫ້ຮຽບຮ້ອຍແລ້ວ.
