ນະຄອນຫລວງວຽງຈັນສະເຫລີມສະຫລອງວັນລ້າງມື້ສາກົນ
(ນະຄອນຫລວງວຽງຈັນສະເຫລີມສະຫລອງວັນລ້າງມື້ສາກົນ)
ຕາມຂ່າວ cri: ວັນທີ 15 ຕຸລາແມ່ນວັນລ້າງມື້ສາກົນ.ໃນວັນທີ 13 ຕຸລານີ້,ທີ່ເດີ່ນພະທາດຫລວງນະຄອນຫລວງວຽງຈັນໄດ້ຈັດກິດຈະກຳສະເຫລີມສະຫລອງວັນລ້າງມືສາກົນພາຍໃຕ້ຫົວຂໍ້ທີ່ວ່າ:"ຊ່ວຍເດັກນ້ອຍໃຫ້ໄດ້ສະຫລອງວັນເກີດປີທີ 5 ຂອງເຂົາເຈົ້າ".ໂດຍການຮ່ວມມືລະຫວ່າງກະຊວງສຶກສາທິການແລະກິລາ, ສູນກາງຊາວຫນຸ່ມປະຊາຊົນປະຕິວັດລາວ, ອົງ ການ UNISEP ກັບ GIZ ເຢຍລະມັນ ໂດຍການເປັນປະທານຂອງທ່ານລີຕູ ບົວປາວ,ລັດຖະມົນຕີຊ່ວຍວ່າການກະຊວງສຶກສາທິການແລະກິລາ, ທ່ານນາງເຂັມແພງ ພົນເສນາ, ປະທານຄະນະກຳມາທິການແຫ່ງຊາດເພື່ອແມ່ແລະເດັກ, ເພື່ອນຮ່ວມງານໃນອົງການສະຫະປະຊາຊາດປະຈຳລາວ, ມີນັກຮຽນແລະນ້ອງນ້ອຍ, ຄູ-ອາຈານ, ພາກສ່ວນທີ່ກ່ຽວຂ້ອງເຂົ້າຮ່ວມຢ່າງເປັນຂະບວນຝົດຟື້ນ.
ສຳລັບກິດຈະກຳໃນຄັ້ງນີ້, ປະກອບມີການແຂ່ງຂັນສິລະປະ,ຟ້ອນການລ້າງມື 7 ຂັ້ນຕອນ, ການລະບາຍສີໃສ່ຮູບພາບຫລືແຕ້ມຮູບມື, ສາທິດການລ້າງມື,ຖາມ-ຕອບຄຳຖາມວິທະຍາສາດແລະກິດຈະກຳອື່ນໆຈາກນັກຮຽນແລະນ້ອງນ້ອຍທີ່ມາຈາກ 4 ຕົວເມືອງເທດສະບານໃນນະຄອນຫລວງວຽງຈັນ.
ໂອກາດດັ່ງກ່າວ, ທ່ານລີຕູ ບົວປາວ, ລັດຖະມົນຕີຊ່ວຍວ່າການກະຊວງສຶກສາທິການແລະກິດລາກ່າວວ່າ,ການລ້າງມືແມ່ນວິທີຫນຶ່ງໃນການປ້ອງກັນພະຍາດໄປສູ່ຕົວເຮົາໄດ້,ເປັນຕົ້ນວ່າ:ພະຍາດຖອກທ້ອງ, ພະຍາດທີ່ເຮົາກິນອາຫານບໍ່ສົດຫລືເຮົາຈັບສິ່ງທີ່ບໍ່ສະອາດເຂົ້າປາກ, ນອກນັ້ນ, ເພື່ອເປັນການປູກຈິດສຳນຶກໃຫ້ທຸກຄົນບໍ່ວ່າຈະເປັນຜູ້ໃຫຍ່ຜູ່ນ້ອຍໃນສັງຄົມສ້າງຄວາມຄຸ້ນເຄີຍໃນການລ້າງມືໃສ່ສະບູທຸກຄັ້ງເພື່ອປ້ອງກັນແມ່ພະຍາດຕ່າງໆ.
