ສປປລາວໄດ້ຮັບການອະນຸມັດເຂົ້າເປັນສະມາຊິກອົງການການຄ້າໂລກ
ໃນກອງປະຊຸມສະພາມົນຕີອົງການການຄ້າໂລກ(WTO)ທີ່ໄຂຂຶ້ນຢູ່ນະຄອນເຊີແນວຂອງສວິສໃນວັນທີ 26 ຕຸລານີ້,ໄດ້ອະນຸມັດຮັບເອົາສປປລາວເຂົ້າເປັນສະມາຊິກອົງການການຄ້າໂລກຢ່າງເປັນທາງການ.
ຂ່າວຈາກແວັບໄຊທາງການຂອງອົງການການຄ້າໂລກກ່າວວ່າ,ທ່ານນາມ ວິຍະເກດ, ລັດຖະມົນຕີວ່າການກະຊວງອຸດສາຫະກຳແລະການຄ້າລາວກັບທ່ານບັສກາ ລາມີ,ຜູ່ອຳນວຍການໃຫຍ່ອົງການການຄ້າໂລກໄດ້ຮ່ວມກັນລົງນາມໃນສັນຍາກ່ຽວກັບສປປລາວເຂົ້າເປັນສະມາຊິກອົງການການຄ້າໂລກ.ທ່ານນາມ ວິຍະເກດກ່າວວ່າ, ທ່ານມີຄວາມຫມັ້ນໃຈຕໍ່ສະພາແຫ່ງຊາດລາວຈະຜ່ານຮັບຮອງສັນຍາສະບັບນີ້ໃນເດືອນທັນວາປີນີ້.
ອີງຕາມສັນຍາທີ່ກ່ຽວຂ້ອງ, ໃນດ້ານການຄ້າສິນຄ້າ, ລາວໃຫ້ຄຳໝັ້ນສັນຍາຈະຈຳກັດອັດຕາພາສີທີ່ປະຕິບັດໃນປະຈຸບັນ,ອັດຕາພາສີສະເລ່ຍຂອງສິນຄ້ານຳເຂົ້າທັງຫມົດຢູ່ໃນ 18,8%,ໃນນັ້ນ ອັດຕາພາສີສະເລ່ຍຂອງຜະລິດຕະພັນກະສິກຳແມ່ນ 19,3%, ອັດຕາພາສີຂອງຜະລິດຕະພັນອື່ນໆສະເລ່ຍແລ້ວແມ່ນ 18,7%.ໃນດ້ານການຄ້າການບໍລິການ, ລາວໃຫ້ຄຳຫມັ້ນສັນຍາວ່າຈະເປີດປະຕູສູ່ພາຍນອກໃນ 10 ຂະແຫນງການເຊິ່ງລວມທັງ 79 ຂະແຫນງການສາຂາ.
ນັບແຕ່ຮ້ອງຂໍເຂົ້າເປັນສະມາຊິກອົງການການຄ້າໂລກເມື່ອປີ 1997 ເປັນຕົ້ນມາ, ປະເທດລາວໄດ້ຕອບຄຳຖາມປະມານ 1300 ຂໍ້ທີ່ວາງອອກໂດຍສະມາຊິກອົງການການຄ້າໂລກຕ່າງໆແລະໄດ້ເຊັນສັນຍາສອງຝ່າຍກັບ 9 ສະມາຊິກອົງການການຄ້າໂລກກ່ຽວກັບບັນຫາທີ່ກ່ຽວຂ້ອງຕ່າງໆ.
