ຜູ້ວ່າການທະນາຄານກາງຂອງໄທກ່າວວ່າ,ຈີນປັບປຸງຮູບແບບການເຕີບໂຕຂອງເສດຖະກິດມີຜົນດີຕໍ່ການພັດທະນາເສດຖະກິດໃນພາກພື້ນ
ຕາມຂ່າວCRI: ຕົວເລກທີ່ກົມສະຖິຕິແຫ່ງຊາດຈີນປະກາດໃນຫວ່າງມໍ່ໆນີ້ສະແດງໃຫ້ເຫັນວ່າ, ໃນ 6 ເດືອນຕົ້ນປີນີ້, GDP ຂອງຈີນໄດ້ເພິ່ມຂຶ້ນ 7,6% ເມື່ອທຽບກັບໄລຍະດຽວກັນຂອງປີ 2012, ຈັງຫວະການເຕີບໂຕຂອງເສດຖະກິດໄດ້ຫຼຸດລົງໜ້ອຍໜຶ່ງ. ຕໍ່ເລື່ອງນີ້, ທ່ານປະສານ ໄຕຣຣັດວໍຣະກຸນ
ຜູ້ວ່າການທະນາຄານກາງຂອງໄທກ່າວວ່າ, ເສດຖະກິດຈີນມີບົດບາດອັນມະຫາສານໃນການຊຸກຍູ້ເສດຖະກິດໃນພາກພື້ນ, ອົງກອນເສດຖະກິດອາຊີຕາເວັນອອກ ແລະ ອາຊີຕາເວັນອອກສຽງໃຕ້ລ້ວນແຕ່ຈະໄດ້ຮັບຜົນສະທ້ອນຈາກແງ່ຂະຫຍາຍຂອງເສດຖະກິດຈີນ. ຕົວເລກຫຼ້າສຸດຂອງເສດຖະກິດຈີນສະແດງໃຫ້ເຫັນຄວາມປະສົງທີ່ລັດຖະບານຈີນປັບປຸງອົງປະກອບການເຕີບໂຕ ແລະ ເອົາໃຈໃສ່ນຳຄຸນນະພາບການພັດທະນາ, ນີ້ຈະມີຜົນດີຕໍ່ການພັດທະນາເສດຖະກິດໃນພາກພື້ນ.
ນອກນີ້, ທ່ານປະສານ ໄຕຣຣັດວໍຣະກຸນຍັງກ່າວວ່າ, ເມື່ອໄດ້ຜ່ານສະພາບທີ່ຈັງຫວະການເຕີບໂຕຫຼຸດລົງໃນສອງໄຕມາດທຳອິດປີນີ້, ເສດຖະກິດໄທຈະຟື້ນຟູເປັນປົກກະຕິໃນ 6 ເດືອນທ້າຍປີນີ້, ສະນັ້ນ, ປັດຈຸບັນຍັງບໍ່ຈຳເປັນຕ້ອງປະຕິບັດມາດຕະການກະຕຸ້ນເສດຖະກິດໃນໄລຍະສັ້ນ.
