ສະຖານະການບາງກອກຟື້ນຟູເປັນປົກກະຕິ
ວັນທີ 9 ສິງຫານີ້, ທ່ານປຣະຊາ ພອມນອກ ຮອງນາຍົກລັດຖະມົນຕີຜູ້ຮັບຜິດຊອບວຽກງານຄວາມປອດໄພໄທກ່າວວ່າ, ເຖິງວ່າຍັງມີຜູ້ສະໜັບສະໜູນ "ທະຫານປະຊາຊົນ" ທີ່ຕ້ານລະບອບທັກສິນສືບຕໍ່ຈັດງານປະທ້ວງຢູ່ສວນລົນພິດນີ, ແຕ່ພວກເຂົາເຈົ້າບໍ່ມີຄວາມເປັນໄປໄດ້ສ້າງສິ່ງທ້າທາຍຕໍ່ຄວາມປອດໄພຂອງນະຄອນຫຼວງບາງກອກ. ທ່ານກ່າວວ່າ, ສະຖານະການຂອງບາງກອກໄດ້ຟື້ນຟູເປັນປົກກະຕິແລ້ວ, ລັດຖະບານຈິ່ງໄດ້ຍົກເລີກກົດໝາຍໝັ້ນຄົງໃນລາດຊະອະນາຈັກທີ່ໄດ້ດຳເນີນເປັນເວລາ 8 ມື້ຢູ່ 3 ຄຸ້ມຂອງນະຄອນຫຼວງບາງກອກ.
ຕອນຄ່ຳວັນທີ 8 ສິງຫານີ້, ທ່ານນາງຍິງລັກ ຊິນນະວັດ ນາຍົກລັດຖະມົນຕີໄທໄດ້ເຊັນຄຳສັ່ງ, ຍົກເລີກກົດໝັ້ນຄົງໃນລາດຊະອະນາຈັກທີ່ປະຕິບັດມາເປັນເວລາ 8 ມື້ຢູ່ 3 ຄຸ້ມບາງກອກ ຄື, ດຸສິດ, ພະນະຄອນ ແລະ ປ້ຼອມປຼາບສັດຕູພ່າຍ. ຄຳສັ່ງດັ່ງກ່າວໄດ້ມີຜົນບັງຄັບໃຊ້ໃນທັນທີ, ສິ່ງຂວາງທາງທີ່ຕັ້ງໄວ້ໃນໄລຍະດຳເນີນກົດດັ່ງກ່າວນັ້ນກໍ່ຖືກລົບລ້າງແລ້ວ, ຖະໜົນທັງໝົດທີ່ຈຳກັດແລ່ນລົດໃນໄລຍະນີ້ກໍ່ເປີດໃຫ້ແລ່ນລົດທັງໝົດໃນຕອນຄ່ຳມື້ດຽວກັນ.
ເພື່ອຮັບມືກັບການປະທ້ວງທີ່"ທະຫານປະຊາຊົນ" ຕ້ານລະບອບທັກສິນ ແລະ ອົງການອື່ນໆຈັດຂຶ້ນຫຼັງໄລຍະຈັດກອງປະຊຸມໃໝ່ຂອງລັດຖະສະພາ, ປົກປັກຮັກສາກົດໝາຍ ແລະ ລະບຽບການຂອງນະຄອນຫຼວງບາງກອກ, ວັນທີ 31 ກໍລະກົດແລ້ວນີ້, ຄະນະລັດຖະບານໄທປະກາດວ່າ, ແຕ່ວັນທີ 1 ສິງຫາ ຫາ ວັນທີ 10 ສິງຫາ, ປະຕິບັດກົດຄວາມໝັ້ນຄົງໃນລາດຊະອະນາຈັກຢູ່ 3 ຄຸ້ມບາງກອກ ຄື, ດຸສິດ, ພະນະຄອນ ແລະ ປ້ຼອມປຼາບສັດຕູພ້າຍ.
ໃນໄລຍະປະຕິບັດດຳລັດຄວາມປອດໄພ, ຕຳຫຼວດໄທໄດ້ຈັດສັນ ຕຳຫຼວດປະມານ 3 ໝື່ນ 8 ພັນຄົນລາດຕະເວນຢູ່ອົງການສຳຄັນ ເຊັ່ນ, ອາຄານລັດຖະສະພາ ແລະ ທຳນຽບນາຍົກລັດຖະມົນຕີເປັນຕົ້ນ ແລະ ເຂດອ້ອມຂ້າງ, ເພື່ອປົກປັກຮັກສາຄວາມປອດໄພ ແລະ ລະບຽບການຂອງເຂດເຫຼົ່ານີ້.
