ພັກໄທເພື່ອໄທຮຽກຮ້ອງໃຫ້ພັກປະຊາທິປັດປ່ຽນແປງຫຼັກໝັ້ນ,ເຂົ້າຮ່ວມການສົນທະນາໃນເວທີປຶກສາຫາລືປະຕິຮູບການເມືອງ
ວັນທີ 10 ສິງຫານີ້, ທ່ານອະນຸສອນ ຮອງໂຄສົກພັກໄທເພື່ອໄທຮຽກຮ້ອງໃຫ້ພັກປະຊາທິປັດປະລະຫຼັກໝັ້ນເປັນປໍລະປັກ, ເຂົ້າຮ່ວມການສົນທະນາໃນເວທີປຶກສາຫາລືປະຕິຮູບການເມືອງທີ່ນຳພາໂດຍສະຫະພັນກຳອຳນາດ, ເປີດທາງເພື່ອບັນລຸການປອງດອງຊາດ.
ທ່ານອະນຸສອນກ່າວວ່າ, ທ່ານແບຼ ອະດີດນາຍົກລັດຖະມົນຕີອັງກິດ ແລະ ທ່ານອັນນານ ອະດີດເລຂາທິການໃຫຍ່ສະຫະປະຊາຊາດໄດ້ຮັບເອົາການເຊື້ອເຊີນ, ເຫັນດີຈະເຂົ້າຮ່ວມກອງປະຊຸມເວທີປຶກສາຫາລືນີ້ທີ່ຈະຈັດຂຶ້ນຢູ່ນະຄອນຫຼວງບາງກອກໃນເດືອນໜ້າ, ກ່ອນນີ້, ທ່ານພິໄຊ ລັດຕະກຸນ ອະດີດປະທານລັດຖະສະພາຂອງໄທ, ອະດີດຫົວໜ້າພັກປະຊາທິປັດກໍ່ກ່າວວ່າ, ເຫັນດີເຂົ້າຮ່ວມການສົນທະນາໃນເວທີປຶກສາຫາລືປະຕິຮູບການເມືອງເທື່ອນີ້.
ທ່ານອະນຸສອນກ່າວວ່າ, ປັດຈຸບັນ, ທ່ານອະພິສິດ ເວດຊະຊີວະ ຜູ້ນຳພັກປະຊາທິປັດຍັງຍຶດໝັ້ນວ່າ, ຕ້ອງຍົກເລີກການພິຈະລະນາຮ່າງຂໍ້ກຳນົດອະໄພຍະໂທດຢູ່ສະພາຜູ້ແທນລາຊະດອນແລ້ວ,ຈິ່ງຈະພິຈາລະນາເຂົ້າຮ່ວມການສົນທະນາໃນເວທີປຶກສາຫາລືປະຕິຮູບການເມືອງທີ່ນຳພາໂດຍສະຫະພັນກຳອຳນາດຫຼືບໍ່. ກ່ອນໜ້ານີ້, ທ່ານນາງຍິ່ງລັກ ຊີນນະວັດ ນາຍົກລັດຖະມົນຕີໄທຮຽກຮ້ອງໃຫ້ພັກປະຊາທິປັດປ່ຽນແປງຫຼັກໝັ້ນທີ່ເປັນປໍລະປັກ, ປຶກສາຫາລືກັນເພື່ອແກ້ໄຂຂໍ້ຂັດແຍ່ງກັນທາງການເມືອງ, ສະແຫວງຫາຊ່ອງທາງປອງດອງຊາດທີ່ຝ່າຍຕ່າງໆຮັບເອົາໄດ້.
ວັນທີ 9 ກັນຍານີ້, ທ່ານອະພິສິດກ່າວຢ່າງຄັກແນ່ວ່າ, ພັກປະຊາທິປັດຈະບໍ່ເຂົ້າຮ່ວມການສົນທະນາໃນເວທີປຶກສາຫາລືປະຕິຮູບການເມືອງ, ແລະຍຶດໝັ້ນຄັດຄ້ານທີ່ລັດຖະສະພາສຳຫຼວດພິຈາລະນາຮ່າງຂໍ້ກຳນົດອະໄພຍະໂທດ,ແລະກ່າວວ່າ, ຂໍ້ກຳນົດນີ້ແມ່ນຍັດຕິທີ່ເຮັດໃຫ້ສັງຄົມແບ່ງແຍກ ຢ່າງເຖິງກົກເຖິງຮາກ.
