ມຽນມາອະນຸມັດໃຫ້ອົງການພະລັງງານປະລະມານູສາກົນກວດກາສິ່ງກໍ່ສ້າງນິວເຄຼຍຂອງຕົນ
ໜັງສືພິມລຽນເຮີສາວປ້າວຂອງສິງກະໂປລາຍງານວ່າ, ວັນທີ 17 ກັນຍານີ້, ມຽນມາ ກັບ ອົງການພະລັງງານປະລະມານູສາກົນໄດ້ເຊັນສັນຍາຮ່ວມກັນ, ໂດຍອະນຸມັດໃຫ້ພະນັກງານກວດກາຂອງສະຫະປະຊາຊາດໄປກວດກາສິ່ງກໍ່ສ້າງນິວເຄຼຍຂອງມຽນມາໄດ້ໃນທຸກເວລາ.
ວັນທີ 17 ກັນຍານີ້, ທ່ານວັນນະ ໝ່ອງລະວິນ ລັດຖະມົນຕີວ່າການກະຊວງການຕ່າງປະເທດມຽນມາໄດ້ລົງນານໃນສັນຍາດັ່ງກ່າວໃນກອງປະຊຸມປະເທດສະມາຊິກປະຈຳປີຂອງອົງການພະລັງງານປະລະມານູສາກົນ. ອີງຕາມຖະແຫຼງການຂອງອົງການພະລັງງານປະລະມານູສາກົນ, ສັນຍາສະບັບນີ້ "ຈະຮຽກຮ້ອງໃຫ້ປະເທດທີ່ກ່ຽວຂ້ອງສະໜັບສະໜູນຢ່າງກວ້າງຂວາງຕໍ່ການກວດກາຂໍ້ມູນແຜນການນິວເຄຼຍ, ເພິ່ມຈຳນວນການກວດກາທາງຟິຊິກຂອງອົງການພະລັງງານປະລະມານູສາກົນ, ແລະສະໜອງການຄຸ້ມຄອງທີ່ມີປະສິດທິຜົນກວ່າເກົ່າ."
ການເຄື່ອນໄຫວນີ້ຈະມີຜົນດີຕໍ່ການເຮັດໃຫ້ຄົນທັງຫຼາຍຫຼຸດໜ້ອຍຄວາມສົງໄສ, ຄື, ມຽນມາແມ່ນຢາກພັດທະນາອາວຸດນິວເຄຼຍມາໂດຍຕະຫຼອດຫຼືບໍ່. ລັດຖະບານມຽນມາໄດ້ປະຕິເສດການກ່າວຫາມາໂດຍຕະຫຼອດ, ຜູ້ຊ່ຽວຊານຈຳນວນບໍ່ໜ້ອຍກໍ່ກ່າວວ່າ, ເຕັກນິກ ແລະ ລະດັບຂອງມຽນມາໃນປັດຈຸບັນຍັງໄກຫຼາຍເມື່ອປຽບທຽບກັບລະດັບເຕັກນິກໃນການຜະລິດອາວຸດນິວເຄຼຍ.
