|
ກະຊວງການຄ້າຈີນຖະແຫຼງກ່ຽວກັບອາເມລິກາແລະສະຫະພາບເອີລົບມີຂໍ້ສະເໜີເພື່ອໃຫ້ຫາລືກັນຢູ່ WTO ກ່ຽວກັບບັນຫາການຄຸ້ມຄອງຂໍ້ມູນຂ່າວສານດ້ານການເງິນຂອງຈີນ
cri
Author: cai
ຕາມຂ່າວສານຈີນ:ວັນທີ 4 ມີນານີ້,ກະຊວງການຄ້າຈີນໄດ້ຖະແຫຼງກ່ຽວກັບອາເມລິກາແລະສະຫະພາບເອີລົບມີຂໍ້ສະເໜີໃຫ້ຫາລືກັນຢູ່ໃນອົງການການຄ້າໂລກຫຼື WTO ກ່ຽວກັບບັນຫາຄຸ້ມຄອງຂໍ້ມູນຂ່າວສານດ້ານການເງິນຂອງຈີນ.
ໂຄສົກກ່າວວ່າ,ລະບຽບການແກ້ໄຂຄວາມເຫັນຂັດແຍ່ງກັນຂອງWTOແມ່ນຊ່ອງທາງໜຶ່ງໃນການແກ້ໄຂຄວາມເຫັນຂັດແຍ່ງກັນດ້ານການຄ້າລະຫວ່າງປະເທດສະມາຊິກ.ໃນນາມເປັນສະມາຊິກWTO,ຈີນເຄົາລົບການເລືອກເອົາຂອງສະມາຊິກອື່ນໆ.ຈີນຈະຄົ້ນຄວ້າຂໍ້ສະເໜີກ່ຽວກັບການຫາລືກັນຢ່າງຈິງຈັງ,ແລະຈະແກ້ໄຂບັນຫານີ້ຕາມລະບຽບການແກ້ໄຂຄວາມເຫັນຂັດແຍ່ງກັນຂອງWTO.
ວັນທີ 3 ມີນານີ້,ອາເມລິກາແລະສະຫະພາບເອີລົບຮ່ວມກັນກ່າວຟ້ອງຈີນຕໍ່WTO,ໂດຍກ່າວວ່າ,ຂ່າວສານຊີນຮວາ ອົງການຂ່າວແຫ່ງລັດຈີນທັງເປັນຄູ່ແຂ່ງຂັນຂອງອົງການສະໜອງຂໍ້ມູນຂ່າວສານດ້ານການເງິນຕ່າງປະເທດ,ທັງເປັນຜູ້ຕິດຕາມຄຸ້ມຄອງໃນດ້ານການບໍລິການຂໍ້ມູນຂ່າວສານດ້ານການເງິນ.ເຂົາເຈົ້າເຫັນວ່າ,ການກະທຳແບບເປັນນັກກິລາທັງເປັນກຳມະການແບບນີ້,ໄດ້ລະເມີດຫຼັກການຍຸດຕິທຳຂອງWTO.
ຕາມກົດບັດWTO,ຖ້າອາເມລິກາແລະສະຫະພາບເອີລົບກັບຈີນບໍ່ສາມາດກ້າວເຖິງຂັ້ນເປັນເອກະສັນກັນໃນໄລຍະປຶກສາຫາລືເປັນເວລາ 60 ວັນແລ້ວ,ຄະດີດັ່ງກ່າວກໍ່ຕ້ອງໃຫ້ອົງການແກ້ໄຂຄວາມຂັດແຍ່ງດ້ານການຄ້າຂອງWTOມາຕັດສິນ.
|
|
