ຕາມຂ່າວCRI: ວັນທີ 8 ມັງກອນນີ້, ທ່ານນາງຮວ໋າຊຸ່ນຢິງ, ໂຄສົກກະຊວງການຕ່າງປະເທດຈີນກ່າວໃນກອງປະຊຸມຂ່າວວ່າ, ກຳປັ່ນຢຽນເຊີງຈີນທີ່ເຂົ້າຮ່ວມການປ້ອງກັນການເດີນເຮືອຮ່ວມໄດ້ເດີນເຮືອເຂົ້າໃນເຂດນ່ານທະເລຂອງຊີຣີໃນວັນທີ 7 ມັງກອນນີ້, ເພື່ອປະສານງານຢ່າງແໜ້ນແຟ້ນກັບກຳປັ່ນຮົບຂອງຣັດເຊຍ, ດານມາກແລະນັອກແວ, ເລີ່ມປະຕິບັດໜ້າທີ່ປ້ອງກັນການເດີນເຮືອຂອງການຂົນສົ່ງອາວຸດເຄມີຊີຣີຢ່າງເປັນທາງການ. ຈີນຈະສືບຕໍ່ເພີ່ມທະວີການປະສານງານກັບຝ່າຍຕ່າງໆ, ຮ່ວມກັນຮັບປະກັນໃຫ້ການຂົນສົ່ງອາວຸດເຄມີຂອງຊີຣີທາງທະເລມີຄວາມປອດໄພແລະສະດວກ.
ທ່ານນາງຮວ໋າຊຸ່ນຢິງກ່າວວ່າ, ຜູ້ອຳນວຍການໃຫຍ່ຂອງອົງາການເກືອດຫ້າມອາວຸດເຄມີ, ເລຂາທິການໃຫຍ່ຂອງອົງການສະຫະປະຊາຊາດລ້ວນແຕ່ໄດ້ອອກຖະແຫຼງການສະແດງຄວາມຍິນດີຕໍ່ການໄດ້ຮັບຄວາມຄືບໜ້າດັ່ງກ່າວ, ແລະສະແດງຄວາມຊົມເຊີຍວ່າການກະທຳຄັ້ງນີ້ແມ່ນບາດກ້າວທີ່ສຳຄັນຂອງການທຳລາຍອາວຸດເຄມີຂອງຊີຣີຢ່າງສິ້ນເຊີງ.